ନୂଆଦିଲ୍ଲୀ, ୮।୫: ଭାରତୀୟ ସଶସ୍ତ୍ର ବାହିନୀ ମଙ୍ଗଳବାର ମଧ୍ୟରାତ୍ରିରେ ‘ଅପରେଶନ ସିନ୍ଦୂର’ ନାମକ ଏକ ବଡ଼ ସାମରିକ ଅଭିଯାନ ଆରମ୍ଭ କରି ପାକିସ୍ତାନ ଓ ପାକିସ୍ତାନ ଅଧିକୃତ କଶ୍ମୀର (ପିଓକେ)ରେ ଥିବା ୯ଟି ଆତଙ୍କବାଦୀ ଶିବିର ଉପରେ ମିସାଇଲ ଆକ୍ରମଣ କରିଛି। ୧୯୭୧ର ଭାରତ-ପାକିସ୍ତାନ ଯୁଦ୍ଧ ପରେ ପ୍ରଥମ ଥର ପାଇଁ ଭାରତ ପାକିସ୍ତାନର ପଞ୍ଜାବ ଅଞ୍ଚଳରେ ଏପରି ଆକ୍ରମଣ କରିଛି। ଏହି ଅଭିଯାନ ଏପ୍ରିଲ ୨୨ରେ ଜମ୍ମୁ ଓ କଶ୍ମୀରର ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣର ପ୍ରତିଶୋଧ ସ୍ବରୂପ କରାଯାଇଥିଲା, ଯେଉଁଥିରେ ୨୬ ଜଣ ନାଗରିକଙ୍କ ମୃତ୍ୟୁ ହୋଇଥିଲା।
ଏହି ଅଭିଯାନରେ ଭାରତୀୟ ବାୟୁସେନା ରାଫେଲ ଯୁଦ୍ଧ ବିମାନ ଏବଂ ହାମର ବୋମା ବ୍ୟବହାର କରି ଆକାଶରୁ ମିସାଇଲ ଆକ୍ରମଣ କରିଥିବା ବେଳେ ଭାରତୀୟ ସ୍ଥଳସେନା ମଧ୍ୟ ସ୍ଥଳରୁ ସ୍ଥଳକୁ ମିସାଇଲ ନିକ୍ଷେପ କରିଛି। ମୋଟ ୨୪ଟି ଉଚ୍ଚ-ର୍ନିଦ୍ଦିଷ୍ଟ ମିସାଇଲ ବ୍ୟବହାର କରାଯାଇ ମାତ୍ର ୨୫ ମିନିଟରେ ଏହି ଅଭିଯାନ ସମ୍ପନ୍ନ ହୋଇଥିଲା। ଟାର୍ଗେଟ ମଧ୍ୟରେ ଲସ୍କର-ଏ-ତୋଇବାର ମୁରିଦକେ ମୁଖ୍ୟାଳୟ, ଜୈଶ-ଏ-ମହମ୍ମଦର ବାହାୱାଲପୁର ମୁଖ୍ୟାଳୟ ଏବଂ ସିଆଲକୋଟରେ ହିଜବୁଲ ମୁଜାହିଦ୍ଦିନର ଶିବିର ସାମିଲ ଥିଲା।
ପିଓକେର ମୁଜାଫରାବାଦ, କୋଟଲି ଓ ଭିମ୍ବେରରେ ୫ଟି ଏବଂ ପାକିସ୍ତାନର ସିଆଲକୋଟ, ମୁରିଦକେ ଓ ବାହାୱାଲପୁରରେ ୪ଟି ଶିବିରକୁ ଧ୍ୱଂସ କରାଯାଇଛି। ସୂଚନା ଅନୁଯାୟୀ, ଏହି ଆକ୍ରମଣରେ ପ୍ରାୟ ୮୦ ଜଣ ଆତଙ୍କବାଦୀ ନିହତ ହୋଇଛନ୍ତି। ଭାରତୀୟ ସେନା ଦାବି କରିଛି ଯେ ଏହି ଆକ୍ରମଣ କେବଳ ଆତଙ୍କବାଦୀ ସ୍ଥାନକୁ ଲକ୍ଷ୍ୟ କରିଥିଲା ଏବଂ ପାକିସ୍ତାନୀ ସେନାର କୌଣସି ସ୍ଥାପନାକୁ ଟାର୍ଗେଟ କରାଯାଇ ନଥିଲା।
ଅନ୍ୟପକ୍ଷରେ, ପାକିସ୍ତାନ ପ୍ରଧାନମନ୍ତ୍ରୀ ଶେହବାଜ ସରିଫ ଏହି ଆକ୍ରମଣକୁ ‘ଯୁଦ୍ଧର କାର୍ଯ୍ୟ’ ବୋଲି ଅଭିହିତ କରି ପ୍ରତିଶୋଧ ନେବାକୁ ଧମକ ଦେଇଛନ୍ତି। ପାକିସ୍ତାନ ଦାବି କରିଛି ଯେ ଏହି ଆକ୍ରମଣରେ ନାଗରିକ ହତାହତ ହୋଇଛନ୍ତି। ବୁଧବାର ଦିନ ପାକିସ୍ତାନୀ ସେନା ନିୟନ୍ତ୍ରଣ ରେଖା (ଏଲଓସି) ନିକଟରେ ଗୁଳିଚାଳନା କରିଥିଲା, ଯେଉଁଥିରେ ୧୫ ଜଣ ନାଗରିକଙ୍କ ମୃତ୍ୟୁ ହୋଇଥିବା ଜଣାପଡିଛି।
ଏହି ଘଟଣା ପରେ ଭାରତରେ ୩୦୦ରୁ ଅଧିକ ‘ସିଭିଲ ଡିଫେନ୍ସ’ ଜିଲ୍ଲାରେ ସୁରକ୍ଷା ଅଭ୍ୟାସ ଆରମ୍ଭ ହୋଇଛି। ଅନେକ ବିମାନବନ୍ଦର ବନ୍ଦ ରହିଛି ଏବଂ ୩୦୦ରୁ ଅଧିକ ବିମାନ ଉ ବାତିଲ ହୋଇଛି। ପାକିସ୍ତାନ ମଧ୍ୟ ୪୮ ଘଣ୍ଟା ପାଇଁ ନିଜର ଆକାଶ ସୀମା ବନ୍ଦ କରିଛି। ଏହା ଭାରତ ଓ ପାକିସ୍ତାନ ମଧ୍ୟରେ ଉତ୍ତେଜନାକୁ ଆହୁରି ବୃଦ୍ଧି କରିଛି।
