କାବୁଲ,୪ ।୯: ତାଲିବାନ ଖୁବଶୀଘ୍ର ଆଫଗାନିସ୍ତାନରେ ସରକାର ଗଠନ କରିବାକୁ ଯାଉଛି । ଏହି ସମୟରେ ତାଲିବାନର ବଡ ବଡ ନେତା ପାକିସ୍ତାନ ସହ କୌଣସି ସମ୍ପର୍କ ନ ଥିବା କହୁଥିବା ବେଳେ ଏମାନଙ୍କ ସମ୍ପର୍କ କିନ୍ତୁ ଦାଣ୍ଡରେ ପଡି ହାଟରେ ଗଡୁଛି ଭଳି ଦେଖାଯାଉଛି । ଏଥର ପାକିସ୍ତାନର ଗୁଇନ୍ଦା ସଂସ୍ଥା ଆଇଏସ୍ଆଇର ମୁଖ୍ୟ ଫୈଜ ହମିଦ ହିଁ କାବୁଲ ପହଞ୍ଚିଛନ୍ତି । ପାକିସ୍ତାନର କୌଣସି ଅଧିକାରୀ ଏମିତି ଭାବେ ତାଲିବାନ ସରକାର ଗଠନ ପୂର୍ବରୁ ଆଫଗାନିସ୍ତାନରେ ପହଞ୍ଚିବା ଆପଣା ଛାଏଁ ବହୁତ କିଛି ସ୍ପଷ୍ଟ କରୁଛି ବୋଲି ଆଲୋଚନା ହେଉଛି । କୁହାଯାଉଛି କି ଆଇଏସ୍ଆଇ ମୁଖ୍ୟଙ୍କ ସହ କେତେଜଣ ସେନା ଅଧିକାରୀ ବି ଆଫଗାନିସ୍ତାନରେ ପହଞ୍ଚିଛନ୍ତି । ସେମାନେ କାବୁଲର ଏକ ହୋଟେଲରେ ରହିଛନ୍ତି । ସେଠାରେ ସେମାନେ ପାକିସ୍ତାନ ରାଷ୍ଟ୍ରଦୂତଙ୍କ ସହ ସାକ୍ଷାତ୍ କରିଥିବା କହିଛନ୍ତି । ହେଲେ ସୋସିଆଲ ମିଡିଆରେ ପୂର୍ବରୁ କିଛି ଫଟୋ ସାମ୍ନାକୁ ଆସିଥିଲା ଯେଉଁଥିରେ ଆଇଏସ୍ଆଇ ମୁଖ୍ୟଙ୍କୁ ତାଲିବାନ ମୁଖ୍ୟ ମୁଲ୍ଲା ଅବଦୁଲ ଗନି ବରାଦରଙ୍କ ସହ ଦେଖିବାକୁ ମିଳିଥିଲା ।
