ଓ୍ବାଶିଂଟନ,୭।୬: ଅପରେଶନ ସିନ୍ଦୂର ପରେ, ଭାରତ ଆତଙ୍କବାଦ ପ୍ରସଙ୍ଗରେ ପାକିସ୍ତାନର ପର୍ଦ୍ଦାଫାସ କରିବା ପାଇଁ ବିଦେଶରେ ଏକ ସର୍ବଦଳୀୟ ପ୍ରତିନିଧି ଦଳ ପଠାଇଥିଲା। ଏହାକୁ ନକଲ କରି, ପାକିସ୍ତାନ ବିଲାୱଲ ଭୁଟ୍ଟୋଙ୍କ ନେତୃତ୍ୱରେ ଏକ ପ୍ରତିନିଧି ଦଳ ମଧ୍ୟ ଆମେରିକାକୁ ପଠାଇଥିଲା, ଯେଉଁଠାରେ ଏହାକୁ ଅପମାନିତ କରାଯାଇଥିଲା। ଅନ୍ତର୍ଜାତୀୟ ସ୍ତରରେ ଭାରତର ଆତଙ୍କବାଦ ବିରୋଧୀ ଦୃଷ୍ଟିକୋଣକୁ ପ୍ରୋତ୍ସାହିତ କରି, ବରିଷ୍ଠ ଆମେରିକୀୟ କଂଗ୍ରେସ ସଦସ୍ୟ ବ୍ରାଡ ଶେର୍ମାନ ପାକିସ୍ତାନୀ ପ୍ରତିନିଧି ଦଳକୁ ଆତଙ୍କବାଦୀ ଗୋଷ୍ଠୀ ଜୈଶ-ଏ-ମହମ୍ମଦ ବିରୁଦ୍ଧରେ ନିର୍ଣ୍ଣାୟକ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଏବଂ ପାକିସ୍ତାନ ଭିତରେ ସଂଖ୍ୟାଲଘୁଙ୍କ ସୁରକ୍ଷା ସୁନିଶ୍ଚିତ କରିବାକୁ କହିଥିଲେ।
ଗୁରୁବାର (ଜୁନ ୦୫, ୨୦୨୫) ୱାଶିଂଟନ ଡିସିରେ ପାକିସ୍ତାନୀ ପ୍ରତିନିଧି ଦଳକୁ ଭେଟି ଶର୍ମାନ ଡାକ୍ତର ଶକିଲ ଆଫ୍ରିଦିଙ୍କ ମୁକ୍ତି ପାଇଁ ଅନୁରୋଧ କରିଥିଲେ। ଡାକ୍ତର ଆଫ୍ରିଦି ଜଣେ ପାକିସ୍ତାନୀ ଡାକ୍ତର ଯିଏ ଓସାମା ବିନ ଲାଡେନଙ୍କୁ ଖୋଜିବାରେ CIAକୁ ସାହାଯ୍ୟ କରିବା ପାଇଁ ଜେଲ ଯାଇଥିଲେ। ଆଫ୍ରିଦି ଖାଇବର ପଖତୁନଖ୍ବା ପ୍ରଦେଶରେ ଲାଡେନଙ୍କ ପରିବାରରୁ DNA ନମୁନା ସଂଗ୍ରହ କରିବା ପାଇଁ ଏକ ଗୁପ୍ତ ପୋଲିଓ ଟୀକାକରଣ କାର୍ଯ୍ୟକ୍ରମ ଚଳାଇବାରେ ସାହାଯ୍ୟ କରିଥିଲେ। ୨୦୧୧ ମସିହା ମେ’ ମାସରେ ଆବୋଟାବାଦରେ ବିନ ଲାଡେନଙ୍କ ଆଡ୍ଡା ଉପରେ ଆମେରିକାର ଚଢାଉ ପରେ ଗିରଫ ହୋଇଥିବା ଆଫ୍ରିଦିଙ୍କୁ ୨୦୧୨ ମସିହାରେ ୩୩ ବର୍ଷ ଜେଲଦଣ୍ଡ ଦିଆଯାଇଥିଲା। ଶର୍ମାନ ଆଫ୍ରିଦିଙ୍କ ମୁକ୍ତିକୁ ୯/୧୧ ପୀଡିତଙ୍କ ପାଇଁ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ବୋଲି ବର୍ଣ୍ଣନା କରିଥିଲେ।
