ଇସ୍ଲାମାବାଦ,୫।୮: ପାକିସ୍ତାନର ଆର୍ଥିକ ସ୍ଥିତି ସମ୍ପୂର୍ଣ୍ଣ ବିଗିଡ଼ି ଯାଇଛି। ପ୍ରଧାନମନ୍ତ୍ରୀ ଇମ୍ରାନ ଖାନ୍ କ୍ଷମତାକୁ ଆସିବାର ୩ ବର୍ଷ ମଧ୍ୟରେ ଦେଶର ଅର୍ଥନୀତି ୧୯ ବିଲିୟନ ଡଲାର ହ୍ରାସ ପାଇଛି। ଅବସ୍ଥା ଏପରି ହୋଇଛି ଯେ, ପାକିସ୍ତାନ ସରକାର ପ୍ରଧାନମନ୍ତ୍ରୀଙ୍କ ସରକାରୀ ବାସଭବନକୁ ଭଡ଼ାରେ ଲଗାଇବାକୁ ନିଷ୍ପତ୍ତି ନେଇଛନ୍ତି।
୨୦୧୯ରେ ଇମ୍ରାନଙ୍କ ସରକାରୀ ବାସଭବନକୁ ଏକ ବିଶ୍ୱବିଦ୍ୟାଳୟରେ ପରିଣତ କରିବା ପାଇଁ ନିଷ୍ପତ୍ତି ହୋଇଥିଲା। ସେଥିପାଇଁ ତାଙ୍କୁ ଘର ଖାଲି କରିବାକୁ ପଡ଼ିଥିଲା। ଏବେ ସରକାର ପୂର୍ବ ନିଷ୍ପତ୍ତି ବଦଳାଇ ଉକ୍ତ ଘରକୁ ଭଡ଼ା ଲଗାଇବାକୁ ନିଷ୍ପତ୍ତି ନେଇଛନ୍ତି। ଏବେ ଜନସାଧାରଣ ସଂସ୍କୃତି, ଫେଶନ, ଶିକ୍ଷା ତଥା ଅନ୍ୟାନ୍ୟ ଉତ୍ସବ ପାଳନ ପାଇଁ ଇସ୍ଲାମାବାଦର ରେଡ୍ ଜୋନ୍ରେ ଥିବା ପ୍ରଧାନମନ୍ତ୍ରୀଙ୍କ ବାସଭବନକୁ ଭଡ଼ାରେ ନେଇପାରିବେ। ବାସଭବନର ଶୃଙ୍ଖଳା ଓ ଆଦବ କାଇଦା ଯେପରି ବ୍ୟାହତ ନ ହୁଏ, ତାହା ଦେଖିବା ପାଇଁ ଦୁଇଟି କମିଟି ଗଢ଼ାଯାଇଛି। ପାଣ୍ଠି ସଂଗ୍ରହ ପାଇଁ ଇମ୍ରାନ୍ଙ୍କ ବାସଭବନର ପ୍ରେକ୍ଷାଳୟ, ଦୁଇଟି ଗେଷ୍ଟ ହାଉସ୍, ଲନ୍କୁ ଭଡ଼ା ଲଗାଯିବ। ଏହାର ମୁଖ୍ୟ କାର୍ଯ୍ୟସ୍ଥଳୀରେ ଉଚ୍ଚସ୍ତରୀୟ କୂଟନୈତିକ କାର୍ଯ୍ୟକ୍ରମ ଏବଂ ଅନ୍ତର୍ଜାତୀୟ ସମ୍ମିଳନୀ ଅନୁଷ୍ଠିତ ହେବ।
