ନୂଆଦିଲ୍ଲୀ,୨୯।୮: ଭାରତରେ ପ୍ରଧାନମନ୍ତ୍ରୀ ଗରିବ କଲ୍ୟାଣ ଅନ୍ନ ଯୋଜନା (PMGKAY) ଅଧୀନରେ ପ୍ରାୟ ୮୦ କୋଟି ଲୋକଙ୍କୁ ମାଗଣା ରାସନ ମିଳିଥାଏ, ଯାହା ଉପରେ ସରକାର ବାର୍ଷିକ ଲକ୍ଷ ଲକ୍ଷ କୋଟି ଟଙ୍କା ଖର୍ଚ୍ଚ କରନ୍ତି। ଏପରି ପରିସ୍ଥିତିରେ ପ୍ରଶ୍ନ ଉଠୁଛି ଯେ ଭାରତର ପଡ଼ୋଶୀ ଦେଶ ପାକିସ୍ତାନରେ ମଧ୍ୟ ଗରିବଙ୍କ ପାଇଁ ଏପରି କୌଣସି ମାଗଣା ରାସନ ଯୋଜନା ଅଛି କି? ଉତ୍ତର ହେଉଛି ହଁ, ପାକିସ୍ତାନରେ ମଧ୍ୟ ଦୁର୍ୱଳ ଏବଂ ଗରିବ ପରିବାରକୁ ସାହାଯ୍ୟ କରିବା ପାଇଁ ଭିନ୍ନ ଭିନ୍ନ ପ୍ରକାରର ସବସିଡି ଏବଂ ରାସନ ଯୋଜନା ଚାଲୁଛି, ଯଦିଓ ଏହାର ତରିକା ଭାରତର ଯୋଜନାଠାରୁ ଟିକିଏ ଅଲଗା।
ପାକିସ୍ତାନରେ ଗରିବଙ୍କ ସାହାଯ୍ୟ ପାଇଁ ସବୁଠାରୁ ବଡ଼ ଏବଂ ପୁରୁଣା ଯୋଜନା ହେଉଛି ବେନଜିର ଇନକମ ସପୋର୍ଟ ପ୍ରୋଗ୍ରାମ (BISP)। ଏହି ଯୋଜନା ବିଶେଷ କରି ଗରିବ ମହିଳାମାନଙ୍କୁ କେନ୍ଦ୍ରରେ ରଖି ଚଲାଯାଇଥାଏ, ଯାହାଫଳରେ ସେମାନଙ୍କ ଘର ଖର୍ଚ୍ଚ ଚାଲିପାରିବ ଏବଂ ଆର୍ଥିକ ଅନଟନ ଟିକିଏ କମ ହେବ। ଏହା ସମ୍ପୂର୍ଣ୍ଣ ମାଗଣା ରାସନ ବାଣ୍ଟୁଥିବା ଯୋଜନା ନୁହେଁ, ବରଂ ଏହା ଅଧୀନରେ ଯୋଗ୍ୟ ପରିବାରର ଆକାଉଣ୍ଟକୁ ସିଧାସଳଖ ନଗଦ ଟଙ୍କା ପଠାଯାଇଥାଏ, ଯାହାଦ୍ୱାରା ସେମାନେ ନିଜର ଆବଶ୍ୟକୀୟ ସାମଗ୍ରୀ କିଣିପାରିବେ। ପାକିସ୍ତାନ ସରକାର ସମୟ ସମୟରେ ଏହି ଯୋଜନାର ପରିସର ବୃଦ୍ଧି କରିଛନ୍ତି ଏବଂ ଆଜି ଏହା ସହିତ କୋଟି କୋଟି ପରିବାର ଯୋଡ଼ିହୋଇଛନ୍ତି। ସମ୍ପ୍ରତି ବର୍ଷଗୁଡ଼ିକରେ ଏଥିରେ ବାୟୋମେଟ୍ରିକ ସିଷ୍ଟମ ମଧ୍ୟ ଯୋଡ଼ାଯାଇଛି, ଯାହାଫଳରେ ଟଙ୍କା ସଠିକ ହିତାଧିକାରୀଙ୍କ ପାଖରେ ପହଞ୍ଚିପାରିବ ଏବଂ ହେରଫେରର ଆଶଙ୍କା କମ ରହିବ।
ପାକିସ୍ତାନର ପଞ୍ଜାବ ପ୍ରଦେଶ ସରକାର ମଧ୍ୟ ନିଜ ସ୍ତରରେ ଏକ ଅଲଗା ରାସନ କାର୍ଡ ଯୋଜନା ଆରମ୍ଭ କରିଛନ୍ତି। ଏହି ଯୋଜନା ଅଧୀନରେ ଯୋଗ୍ୟ ପରିବାରଗୁଡ଼ିକୁ CNIC (ଜାତୀୟ ପରିଚୟ ପତ୍ର) ସହ ଯୋଡ଼ା ହୋଇଥିବା ଏକ ରାସନ କାର୍ଡ ଦିଆଯାଇଥାଏ, ଯାହା ଦ୍ୱାରା ସେମାନେ ୟୁଟିଲିଟି ଷ୍ଟୋର୍ସ ଏବଂ ର୍ନିଦ୍ଧାରିତ ଦୋକାନଗୁଡ଼ିକରୁ ଅଟା, ଡାଲି, ଚିନି, ଘିଅ ଏବଂ ଚାଉଳ ଭଳି ସାମଗ୍ରୀ ରିହାତି ଦରରେ କିଣିପାରିବେ। ଏହି ଯୋଜନାର ତଦାରଖ ପଞ୍ଜାବ ସୋସିଆଲ ପ୍ରୋଟେକ୍ସନ ଅଥରିଟି କରେ। ଏହା ଅଧୀନରେ ପ୍ରାୟ ୧୨.୫ ଲକ୍ଷ କମ ଆୟବର୍ଗର ପରିବାରକୁ ପ୍ରତି ମାସରେ ଆର୍ଥିକ ସହାୟତା ଦେବା କଥା କୁହାଯାଇଛି, ଯାହାଫଳରେ ସେମାନେ ରୋଷେଇ ଘରର ଜରୁରୀ ସାମଗ୍ରୀ ସହଜରେ କିଣିପାରିବେ।
ପାକିସ୍ତାନ ସରକାରଙ୍କ ଦାବି ଅନୁଯାୟୀ, ସେଠାକାର ଯୋଜନାଗୁଡ଼ିକରୁ କୋଟି କୋଟି ଲୋକଙ୍କୁ ସହାୟତା ପହଞ୍ଚାଯାଉଛି। ପାକିସ୍ତାନର ପ୍ରଧାନମନ୍ତ୍ରୀ ଶହବାଜ ଶରିଫଙ୍କ ଦ୍ୱାରା ଘୋଷିତ ରମଜାନ ରିଲିଫ ପ୍ୟାକେଜ ଅଧୀନରେ ଦେଶର ପ୍ରାୟ ୧.୨ କୋଟି ଗରିବ ପରିବାରକୁ ସିଧାସଳଖ ଲାଭ ପହଞ୍ଚାଯାଇଥିଲା। ଯଦି ଗୋଟିଏ ପରିବାରରେ ହାରାହାରି ୫ ରୁ ୬ ଜଣ ସଦସ୍ୟ ଧରାଯାଏ, ତେବେ ଏହାଦ୍ୱାରା ପ୍ରାୟ ୬ ରୁ ୭ କୋଟି ଲୋକ ସିଧାସଳଖ ଫାଇଦା ପାଆନ୍ତି।
