ନୂଆଦିଲ୍ଲୀ,୧୪।୭: ଆଇସିସିର ପ୍ରତିଟି ଟୁର୍ନାମେଣ୍ଟରେ ଟିମ୍ ଇଣ୍ଡିଆର ଗୁରୁତ୍ୱ ଅଧିକ ରହିଥାଏ। କାରଣଟି ହେଲା ଦଳର ପ୍ରଶଂସକ ଏବଂ ହେବାକୁ ଥିବା ରୋଜଗାର। ଟିମ୍ ଇଣ୍ଡିଆ ଖେଳିଲେ ଆୟୋଜକ ଦେଶ ଭଲ ରୋଜଗାର କରିଥାଏ। ୨୦୨୫ରେ ଆଇସିସି ଚାମ୍ପିଅନ୍ସ ଟ୍ରଫି କରାଇବାକୁ ଯାଉଛି, ଯାହାକି ପାକିସ୍ତାନ ଆୟୋଜନ କରିବ। ହେଲେ ଦୁଇ ଦେଶ ମଧ୍ୟରେ ଥିବା ତିକ୍ତତା କାରଣରୁ ଭାରତୀୟ ଟିମ୍ ପାକିସ୍ତାନ ଯାଇ ନ ପାରେ ବୋଲି କୁହାଯାଉଛି। ଏପରିକି ଆଇସିସିକୁ ବିସିସିଆଇ ପକ୍ଷରୁ ହାଇବ୍ରିଡ୍ ମଡେଲ ଦାବି କରାଯାଇଥିବା ରିପୋର୍ଟ ପ୍ରକାଶ ପାଉଛି।ଏହାକୁ ନେଇ ପାକିସ୍ତାନର ପୂର୍ବତନ କ୍ରିକେଟରମାନେ ବୟାନବାଜି କରୁଛନ୍ତି। ଏହି କ୍ରମରେ ପାକିସ୍ତାନର ପୂର୍ବତନ କ୍ରିକେଟର ତନବୀର ଅହମ୍ମଦ ବଡ଼ ବୟାନ ଦେଇଛନ୍ତି ଯାହାକୁ ଶୁଣି ପ୍ରତ୍ୟେକ ଭାରତୀୟ ପ୍ରଶଂସକ ରାଗରେ ନିଆଁବାଣ ହେଉଛନ୍ତି। ସୋସିଆଲ ମିଡିଆରେ ସେ ବିସିସିଆଇକୁ ନେଇ ବିବାଦୀୟ ଶବ୍ଦ ବ୍ୟବହାର କରିଛନ୍ତି।
ତନବୀର ପାକିସ୍ତାନ ନ ଯିବାକୁ ନେଇ ଭାରତ ଉପରେ ଖପ୍ପା ଅଛନ୍ତି। ଏହାକୁ ନେଇ ତାଜା ବୟାନରେ ସେ କହିଛନ୍ତି, ବିସିସିଆଇର ଲୋକମାନଙ୍କ ପାଇଁ ଚୁଡ଼ି ପଠାଇଛି, ଏହାକୁ ପିନ୍ଧ, କାହିଁକି ନା ତୁମମାନଙ୍କ ହୃଦୟ ଛେଳି ପରି, ଯିଏ ପାକିସ୍ତାନ ଆସିବାକୁ ଡରୁଛି। ହୃଦୟ ତ ପାକିସ୍ତାନୀ ଟିମ୍ର, ଯିଏ କି ସିଂହ ଭଳି ଭାରତ ଗଲା ଏବଂ ବିଶ୍ୱକପ୍ ଖେଳି ଆସିଲା। ’ଏବେ ତାଙ୍କର ଏହି ବୟାନ ଭାଇରାଲ ହେଉଛି।
କହିରଖୁଛୁ, ବିସିସିଆଇ ଉପାଧ୍ୟକ୍ଷ ରାଜୀବ ଶୁକ୍ଳା ଭାରତର ପାକିସ୍ତାନ ନ ଯିବା ଏବଂ ଆଇସିସି ନିକଟରେ ହାଇବ୍ରିଡ ମଡେଲ ଲାଗି ଦାବି କରିବା ଖବର ଉପରୁ ପରଦା ଉଠାଇଥିଲେ। ଏସବୁ ଖବର ଗୁଜବ ବୋଲି ସେ କହିଥିଲେ। ଏପରିକି ସେ ସ୍ପଷ୍ଟ କରିଥିଲେ ଯେ ଏଯାବତ ଚାମ୍ପିଅନ୍ସ ଟ୍ରଫିକୁ ନେଇ ବିସିସିଆଇ ଏବଂ ଆଇସିସି ମଧ୍ୟରେ କୌଣସି ଆଧିକାରୀକ ଆଲୋଚନା ହୋଇନାହିଁ।
BCCI walon ye tumharey liye churian bheje hain isko pehno kyn k tumhara dil bakri ki tarhan ha jo pakistan aney say darta ha dil tou pakistan team ka ha shairon jaisa jo india gaya or world cup khail kar aya pic.twitter.com/4gBynrqekX
— Tanveer Says (@ImTanveerA) July 13, 2024
