କରାଚୀ,୧୧ା୧୨: ଭିଜା, ପାସ୍ପୋର୍ଟ ସମସ୍ୟାରେ ପଡିଛି ପାକିସ୍ତାନ କ୍ରିକେଟ ଦଳ। ପାକିସ୍ତାନ ସିନିୟର କ୍ରିକେଟ ଦଳ ଡାକ୍ତରଙ୍କ ବିନା ଅଷ୍ଟ୍ରେଲିଆରେ ପହଞ୍ଚି ଥିବା ବେଳେ ୧୯ ବର୍ଷରୁ କମ୍ ଦଳ ବିନା ଟିମ୍ ମ୍ୟାନେଜରରେ ସଂଯୁକ୍ତ ଆରବ ଏମିରେଟ୍ସରେ ପହଞ୍ଚିଛି। ଅଷ୍ଟ୍ରେଲିଆ ଓ ନ୍ୟୁଜିଲାଣ୍ଡ ସିରିଜ ପାଇଁ ସୋହେଲ ସଲିମ୍ ଅଫିସିଆଲ ଟିମ୍ ଡାକ୍ତର ମନୋନୀତ ହୋଇଥିବା ବେଳେ ସେ ଦଳରେ ଯୋଗଦେଇ ନାହାନ୍ତି। ଡାକ୍ତର ସଲିମ୍ଙ୍କ ପାଇଁ ଭିଜା ଯୋଗାଡ଼ କରିବା ଲାଗି ପାକିସ୍ତାନ କ୍ରିକେଟ ବୋର୍ଡ (ପିସିବି) ଏବେ ସୁଦ୍ଧା ଚେଷ୍ଟା ଜାରି ରଖିଛି।
ପର୍ଥରେ ପ୍ରଥମ ଟେଷ୍ଟ ବେଳକୁ ସେ ଦଳ ସହ ଯୋଗ ଦେଇସାରିଥିବେ ବୋଲି ପିସିବି ସୂତ୍ରରୁ ପ୍ରକାଶ। ସେହିପରି ପୂର୍ବତନ ଟେଷ୍ଟ ବ୍ୟାଟ୍ସମ୍ୟାନ ଶୋଏବ ମହମ୍ମଦଙ୍କୁ ୟୁଏଇରେ ଏସିଆ କପ୍ରେ ଭାଗନେବାକୁ ଯାଇଥିବା ପାକିସ୍ତାନ ଜୁନିୟର ଦଳର ମ୍ୟାନେଜର ଭାବେ ମନୋନୀତ କରାଯାଇଛି। ମାତ୍ର ସେ ଦଳ ସହ ଗସ୍ତ କରିପାରିନାହାନ୍ତି।
ଶୋଏବଙ୍କ ପାସ୍ପୋର୍ଟ ଅବଧି ଶେଷ ହୋଇଯାଇଛି। ବୋର୍ଡ ତରଫରୁ ଏହି ସମସ୍ୟାର ସମାଧାନ ପାଇଁ ପ୍ରଚେଷ୍ଟା ଚାଲିଛି। ସେ ଖୁବ୍ଶୀଘ୍ର ୟୁଏଇରେ ପହଞ୍ଚିଯିବେ ବୋଲି ପିସିବି ପକ୍ଷରୁ ଆଶା ପ୍ରକାଶ କରାଯାଇଛି।
