ପଦ୍ମପୁର,୧୮।୬(ପ୍ରଦୀପ୍ତ ଦାଶ): ବରଗଡ଼ ଜିଲା ପଦ୍ମପୁର ଉପଖଣ୍ଡରେ ଧାନ କିଣାବିକା ସମସ୍ୟା ସୁଧୁରୁ ନ ଥିବା ବେଳେ ଆଗାମୀ ମୌସୁମୀ ବର୍ଷାକୁ ନେଇ ଚାଷୀ ଚିନ୍ତାରେ ପଡ଼ିଛନ୍ତି। ପଦ୍ମପୁର ଉପଖଣ୍ଡରେ ଗତ ୧୧ ତାରିଖରୁ ଚାଲିଛି ରବିଋତୁର ଧାନ କିଣାବିକା। କିନ୍ତୁ ଏଠାରେ ଧାନ ସଂଗ୍ରହ ପ୍ରକ୍ରିୟା ଦିନକୁ ଦିନ ଜଟିଳ ହେବାର ଲାଗିଛି। ମଣ୍ଡିକୁ ଧାନ ଆସୁଛି, କିନ୍ତୁ ଆବଶ୍ୟକ ଟାର୍ଗେଟ୍ ନ ଥିବାରୁ ଧାନ ଉଠାଇବାକୁ ମିଲର୍ସ ଆସୁନାହାନ୍ତି ବୋଲି ଚାଷୀମାନେ ଅଭିଯୋଗ କରିଛନ୍ତି। ସେହିପରି ଟୋକନ କଟକଣା ଧାନ ବିକ୍ରିବଟାରେ ବଡ଼ ସମସ୍ୟା ଭାବେ ଉଭା ହୋଇଛି। ଚାଷୀମାନେ ଧାନ ଅମଳ କରିସାରିଛନ୍ତି, କିନ୍ତୁ ମାସାଧିକ କାଳ ବିତିଯାଇଥିଲେ ମଧ୍ୟ ଅନେକ ଚାଷୀଙ୍କ ପାଖକୁ ଏପର୍ଯ୍ୟନ୍ତ ଧାନବିକ୍ରି ଟୋକନ ପହଞ୍ଚତ୍ ନାହିଁ। ଯେଉଁ ଚାଷୀଙ୍କୁ ଟୋକନ ମିଳିଛି, ସେମାନଙ୍କ ମଧ୍ୟରୁ ଅନେକଙ୍କ ଟୋକନରେ ବିକ୍ରିଯୋଗ୍ୟ ଧାନ ପରିମାଣଠାରୁ ଯଥେଷ୍ଟ କମ୍ ରହିଛି। ଏହାକୁ ନେଇ ସାରା ଅଞ୍ଚଳରେ ଚାଷୀ ଅସନ୍ତୋଷ ତେଜିଛି। ସେହିପରି ଆସନ୍ନ ମୌସୁମୀ ବର୍ଷାକୁ ନେଇ ଚାଷୀ ଆତଙ୍କିତ ହୋଇପଡୁଛନ୍ତି।
ଯଦି ବର୍ଷାରେ ସେମାନଙ୍କ ଧାନ ଭିଜିଯାଏ ତେବେ ତାହା ବିକ୍ରିଯୋଗ୍ୟ ହୋଇପାରିବନାହିଁ। ପଦ୍ମପୁର ଉପଖଣ୍ଡରେ ରବିଧାନ ସଂଗ୍ରହ ପାଇଁ ପ୍ରଶାସନ ତରଫରୁ ୫୯ଟି ମଣ୍ଡି ଖୋଲାଯାଇଛି। ସୋହେଲା ବ୍ଲକରେ ଧାନ ସଂଗ୍ରହ ପାଇଁ ସର୍ବାଧିକ ୧୬ଟି ମଣ୍ଡି ଖୋଲିଥିବା ବେଳେ ବିଜେପୁରରେ ୧୩ଟି, ଗାଇସିଲେଟରେ ୩ଟି, ଝାରବନ୍ଧରେ ୧୨ଟି, ପାଇକମାଳରେ ୯ଟି ଓ ପଦ୍ମପୁର ବ୍ଲକରେ ୬ଟି ମଣ୍ଡି ଖୋଲିଛି। ବିଶେଷକରି ଉପଖଣ୍ଡର ପାଇକମାଳ ଓ ଝାରବନ୍ଧ ବ୍ଲକର ବିଭିନ୍ନ ମଣ୍ଡିରୁ ଧାନ ଉଠାଣ ବନ୍ଦ ରହିଛି। ପାଇକମାଳ ବ୍ଲକ ଧାରୋଲରେ ୫୦ହଜାର ୧୬୫ ବସ୍ତା, ପାଇକମାଳ ମଣ୍ଡିରେ ୪୪ ହଜାର ୨୬୦ ବସ୍ତା, ଜାମ୍ସେଟ ମଣ୍ଡିରେ ୧୮ ହଜାର ବସ୍ତା ଧାନ ପଡ଼ିଥିବା ବେଳେ ଝାରବନ୍ଧ ବ୍ଲକ ଡଭା ମଣ୍ଡିରେ ୨୪ ହଜାର ବସ୍ତା ଧାନ ପଡ଼ିରହିଛି। ମଙ୍ଗଳବାର ସୁଦ୍ଧା ଉପଖଣ୍ଡର ୧୨ ହଜାର ୩ ଶହ ୮୧ ଜଣ ଚାଷୀ ୧୨ ଲକ୍ଷ ୬୩ ହଜାର ବସ୍ତା ଧାନ ବିକ୍ରି କରିଥିବା ବେଳେ ବିଭିନ୍ନ ମଣ୍ଡିରେ ୪ ଲକ୍ଷ ୪୧ ହଜାର ୬୦୩ ବସ୍ତା ଧାନ ପଡ଼ିଥିବା ଆର୍ଏମ୍ସି ସମ୍ପାଦକ ରବି ନାରାୟଣ ପଣ୍ଡା ସୂଚନା ଦେଇଛନ୍ତି। ସରକାର ଯଥାଶୀଘ୍ର ମିଲରମାନଙ୍କୁ ଟାର୍ଗେଟ ଦେଇ ଧାନ ଉଠାଇବାକୁ ବ୍ୟବସ୍ଥା କରନ୍ତୁ ବୋଲି ଚାଷୀମାନେ ଦାବି କରିଛନ୍ତି।
