ନୂଆଦିଲ୍ଲୀ, ୨୧।୧୧: ଅକ୍ସଫୋର୍ଡ ବିଶ୍ୱବିଦ୍ୟାଳୟ ଦ୍ୱାରା ବିକଶିତ କୋଭିଡ୍ ଟିକା ଆସନ୍ତାବର୍ଷ ଫେବୃୟାରୀ ସୁଦ୍ଧା ସ୍ବାସ୍ଥ୍ୟକର୍ମୀ ଓ ବୟସ୍କ ବ୍ୟକ୍ତିମାନଙ୍କ ପାଇଁ ଏବଂ ଏପ୍ରିଲ ବେଳକୁ ସର୍ବସାଧାରଣଙ୍କ ଲାଗି ଉପଲବ୍ଧ ହେବ। ଏହାର ୨ଟି ଡୋଜ୍ର ଦାମ୍ ସର୍ବାଧିକ ହଜାରେ ଟଙ୍କା ରହିବ ବୋଲି ଭାରତର ସେରମ୍ ଇନ୍ଷ୍ଟିଚ୍ୟୁଟ୍ର ସିଇଓ ଆଦର ପୂନାଓ୍ବାଲା କହିଛନ୍ତି। ଜଣକୁ ଅନୂ୍ୟନ ୨ ଡୋଜ୍ ଟିକା ନେବାକୁ ପଡ଼ିବ। ୨୦୨୪ ବେଳକୁ ଦେଶର ସମସ୍ତଙ୍କୁ ଟିକା ମିଳିପାରିବ ବୋଲି ସେ ଆଶାବ୍ୟକ୍ତ କରିଛନ୍ତି। ସରକାର ବିପୁଳ ମାତ୍ରାରେ ଟିକା କିଣିବାକୁ ଥିବାରୁ ଏହାର ଦାମ୍ ୩ରୁ ୪ ଡଲାର ରହିବ। ବଜାରରେ ସବୁଠୁ ଶସ୍ତାରେ ଟିକା ଉପଲବ୍ଧ କରାଇବାକୁ ଉଦ୍ୟମ ହେଉଥିବା ପୂନାଓ୍ବାଲା କହିଛନ୍ତି। ଅନ୍ୟପକ୍ଷରେ ଆମେରିକାର ଫାଇଜର ଓ ବାୟୋଏନ୍ଟେକ୍ ଏବଂ ମଡର୍ନା ପ୍ରସ୍ତୁତ କରିଥିବା ଟିକା ତୃତୀୟ ପର୍ଯ୍ୟାୟ ପରୀକ୍ଷାରେ ଯଥାକ୍ରମେ ୯୫% ଓ ୯୪.୫% ଫଳପ୍ରଦ ବୋଲି ଘୋଷଣା କରାଯାଇଥିବା ବେଳେ ସେମାନଙ୍କ ତଥ୍ୟ ଯଥାର୍ଥ ବୋଲି ଆମେରିକାର ସର୍ବୋଚ୍ଚ ସ୍ବାସ୍ଥ୍ୟ ବିଶେଷଜ୍ଞ ଡ. ଆନ୍ଥୋନି ଫୌସି କହିଛନ୍ତି। ସେମାନେ ଭାକ୍ସିନ୍ର ଦ୍ରୁତ ବିକାଶ କରିଥିଲେ ହେଁ ନିରାପତ୍ତା କିମ୍ବା ଶୁଦ୍ଧତାରେ ସାଲିସ୍ କରିନାହାନ୍ତି। ଟିକାର ତ୍ୱରିତ ବିକାଶକୁ ନେଇ ସ୍ବାସ୍ଥ୍ୟ ବିଶେଷଜ୍ଞମାନେ ଯେଉଁ ଆଶଙ୍କା ବ୍ୟକ୍ତ କରୁଥିଲେ ତାହା ଠିକ୍ ନୁହେଁ ବୋଲି ଆନ୍ଥୋନି କହିଛନ୍ତି। ଟିକାର ଜରୁରୀ ବ୍ୟବହାର ଅନୁମତି ପାଇଁ ଏଫ୍ଡିଏ ନିକଟରେ ଶୁକ୍ରବାର ଆବେଦନ କରାଯିବା ନେଇ ଫାଇଜରର ସହଯୋଗୀ ବାୟୋଏନ୍ଟେକ୍ ପକ୍ଷରୁ ଗୁରୁବାର ଘୋଷଣା କରାଯାଇଥିଲା।
