ବରଗଡ଼,୧୪।୬(ପ୍ରେମାନନ୍ଦ ଖମାରୀ): ସରକାର ବଦଳିବା ପରେ ବିକଶିତ ବରଗଡ଼ ଲକ୍ଷ୍ୟ ନେଇ ଡ୍ରେନ ନିର୍ମାଣଠାରୁ ଆରମ୍ଭ କରି ରାସ୍ତା ପ୍ରଶସ୍ତୀକରଣ, ଆଲୋକୀକରଣ, ଧନୁଯାତ୍ରାର ସ୍ଥାୟୀ ମଞ୍ଚ ଓ ସ୍ମାରକୀ ସ୍ବାଗତ ତୋରଣ, କେନାଲ ଉପରେ ବକ୍ସ କଣ୍ଡୁଇଟ୍ ନିର୍ମାଣ ଭଳି ଅନେକ ପ୍ରକଳ୍ପ ହାତକୁ ନିଆଯାଇଛି। ସହରରେ ଏଭଳି ବିକାଶମୂଳକ କାର୍ଯ୍ୟକୁ ବିଭିନ୍ନ ମହଲରେ ସ୍ବାଗତ ମଧ୍ୟ କରାଯାଉଛି। ଅନ୍ୟପଟେ ବିଭିନ୍ନ ପ୍ରକଳ୍ପ ନିର୍ମାଣରେ ଗୋଟିଏ ପରେ ଗୋଟିଏ ଅନିୟମିତତା ପଦାକୁ ଆସିବାରେ ଲାଗିଛି। ଏହାକୁ ନେଇ ଗତ କିଛିଦିନ ହେଲା ଥାନା ଛକ ଧନୁଯାତ୍ରା ତୋରଣ ଭାଙ୍ଗିବାଠୁ ଆରମ୍ଭ କରି କେନାଲ ଉପରେ ବକ୍ସ କଣ୍ଡୁଇଟ୍ ନିର୍ମାଣ ଅଧୁରା ରହିବାକୁ ନେଇ ଚା’ ଖଟିଠାରୁ ଆରମ୍ଭ କରି ସବୁଠି ଚର୍ଚ୍ଚା ଥମିବା ନାଁ ନେଉନାହିଁ। ବକ୍ସ କଣ୍ଡୁଇଟ୍ ନିର୍ମାଣ ପାଇଁ କେନାଲକୁ ଖୋଳାଯାଇ ସେଥିରୁ ମାଟି, କଂକ୍ରିଟ୍ ଉଠାଯାଇଥିବାବେଳେ ଏବେ ପୁଣି ସେହି ଖାଲିସ୍ଥାନରେ ମାଟି କିମ୍ବା କଂକ୍ରିଟ୍ ବଦଳରେ ବାଲିବସ୍ତା ପକାଇ ପ୍ୟାଚଅପ୍ ମରାଯାଉଛି। ଆଗକୁ ବର୍ଷା ଆସିବା ସହିତ କେନାଲ ପାଣି ଛଡ଼ାଯିବାକୁ ଥିବାବେଳେ ସେଥିରେ କେନାଲର ଉଭୟ ପାର୍ଶ୍ୱରେ ରହିଥିବା ରାସ୍ତାର ସ୍ଥାୟିତ୍ୱ ନେଇ ସାଧାରଣରେ ଏବେଠାରୁ ଆଶଙ୍କା ପ୍ରକାଶ ପାଇଛି। ବିଭାଗୀୟ ଅଧିକାରୀଙ୍କ ଦୂରଦୃଷ୍ଟିହୀନତା ଏବଂ ବକ୍ସ କଣ୍ଡୁଇଟ୍ ନିର୍ମାଣରେ ହୋଇଥିବା ଅନିୟମିତତା ଯୋଗୁ ଏବେ ଅଞ୍ଚଳର ଚାଷୀ ତଥା ସ୍ଥାନୀୟ ଲୋକଙ୍କ ଜୀବନ ଜୀବିକା ବିପଦ ମୁହଁକୁ ଠେଲି ହୋଇଯାଇଛି। କେନାଲ ତଳମୁଣ୍ଡକୁ ପୂର୍ବଭଳି ପାଣି ଯୋଗାଣ ହେବ କି ନାହିଁ, ତାକୁ ନେଇ ମଧ୍ୟ ସମ୍ପୃକ୍ତ ଅଞ୍ଚଳର ଚାଷୀମାନଙ୍କୁ ଏବେଠୁ ଚିନ୍ତା ଘାରିଲାଣି। ଅନ୍ୟପଟେ ସରକାରୀ ଅଧିକାରୀଙ୍କ ତ୍ରୁଟି ପାଇଁ ଅଯଥାରେ ଲକ୍ଷାଧିକ ଟଙ୍କା ବରବାଦ୍ ହେଲା ବୋଲି ସାଧାରଣରେ ମତପ୍ରକାଶ ପାଇଛି।
ସୂଚନା ଅନୁଯାୟୀ, ପ୍ରାୟ ୧୦୦ କୋଟି ଟଙ୍କା ବ୍ୟୟ ଅଟକଳରେ ବରଗଡ଼-ଭେଡ଼େନ କେନାଲର ଆର୍ଡ଼ି ୩୫୬୧ଏମ୍ଠାରୁ ୫୪୭୩ଏମ୍ ପର୍ଯ୍ୟନ୍ତ ବକ୍ସ କଣ୍ଡୁଇଟ୍ ନିର୍ମାଣ ପାଇଁ ରାଜ୍ୟ ସରକାର ନିଷ୍ପତ୍ତି ନେଇଛନ୍ତି। ଏହି ପ୍ରକଳ୍ପର ପ୍ରଥମ ପର୍ଯ୍ୟାୟରେ ବରଗଡ଼ ସହର ନିକଟସ୍ଥ ଉକ୍ତ କେନାଲର ଆର୍ଡ଼ି ୪୧୪୫ଏମ୍ରୁ ଆର୍ଡି ୫୧୪୦ଏମ୍ ପର୍ଯ୍ୟନ୍ତ ଏହା ନିର୍ମାଣ ପାଇଁ ପ୍ରାୟ ୫୦କୋଟି ଟଙ୍କା ମଞ୍ଜୁର ହୋଇଥିଲା। ଗତ ମାସ ୧୭ତାରିଖ ସନ୍ଧ୍ୟାରେ ଏକ ବିଶାଳ ଶୋଭାଯାତ୍ରାରେ ଆସି ସ୍ଥାନୀୟ ବିଧାୟକ ଅଶ୍ୱିନୀ ଷଡ଼ଙ୍ଗୀ ବିଭାଗୀୟ ଯନ୍ତ୍ରୀ, ଅଧକାରୀ ଏବଂ ହଜାର ହଜାର ଲୋକଙ୍କ ଉପସ୍ଥିତିରେ ଏହି ପ୍ରକଳ୍ପ ନିର୍ମାଣ କାର୍ଯ୍ୟର ଶୁଭାରମ୍ଭ କରିଥିଲେ। ବକ୍ସ କଣ୍ଡୁଇଟ୍ ପ୍ରକଳ୍ପ କଣ ଲୋକେ ତାହା ଜାଣି ନ ଥିଲେ ମଧ୍ୟ ସୌନ୍ଦର୍ଯ୍ୟକରଣ ପାଇଁ ପ୍ରଥମ ପର୍ଯ୍ୟାୟରେ ୫୦କୋଟି ଟଙ୍କା ମଞ୍ଜୁର ହୋଇଥିବା ଜାଣି ସ୍ଥାନୀୟ ଲୋକେ ମଧ୍ୟ ଖୁସି ହୋଇଥିଲେ। ହେଲେ ପ୍ରକଳ୍ପ ନିର୍ମାଣ ଆରମ୍ଭରୁ ଅନିୟମିତତା ହୋଇଥିବା ନେଇ ସ୍ଥାନୀୟ କେହି ଜଣେ ବି ଟେର୍ ପାଇ ପାରି ନ ଥିଲେ।
ତେବେ ଗତ ମାସ ୨୫ତାରିଖ ଝଡ଼ବତାସରେ ବରଗଡ଼ ଥାନା ଛକ ସ୍ଥିତ ଧନୁଯାତ୍ରା ତୋରଣ ଭାଙ୍ଗିଯିବା ପରେ ନିମ୍ନମାନର କାମ ହୋଇଥିବା ନେଇ ଅଭିଯୋଗ ଜୋର୍ ଧରିଥିଲା। ଅନ୍ୟପଟେ ତୋରଣ ଭାଙ୍ଗିବା ଘଟଣାର ତଦନ୍ତ ଆରମ୍ଭ ନ ହେଉଣୁ ବରଗଡ଼-ଭେଡ଼େନ କେନାଲର ବକ୍ସ କଣ୍ଡୁଇଟ୍ ନିର୍ମାଣ କାର୍ଯ୍ୟକୁ ସମ୍ପୃକ୍ତ ଠିକାଦାର ହଠାତ୍ ବନ୍ଦ କରି ଦେଇଥିଲେ। ଏପରିକି ସେହି କାର୍ଯ୍ୟରେ ବ୍ୟବହୃତ ବିଭିନ୍ନ ମେଶିନ, ଗାଡ଼ିକୁ ରାତାରାତି କେନାଲରୁ ଉଠାଇ ନେଇଥିଲେ। କେବଳ ସେତିକି ନୁହେଁ, ହଠାତ୍ ଅଧୀକ୍ଷଣ ଯନ୍ତ୍ରୀ ମଦନ ମୋହନ ସେଠୀଙ୍କୁ ବରଗଡ଼ରୁ ମୁଖିଗୁଡ଼ାକୁ ବଦଳି କରି ଦିଆଯାଇଥିଲା। ଏଭଳି ଘଟଣାକ୍ରମରୁ ବକ୍ସ କଣ୍ଡୁଇଟ୍ ନିର୍ମାଣରେ ହୋଇଥିବା ଅନିୟମିତତାର ଗନ୍ଧ ଧୀରେ ଧୀରେ ସବୁଆଡ଼େ ବ୍ୟାପିଥିଲା ଏବଂ ବିଜେଡ଼ି ବି ଏହାର ଖୋଳତାଡ଼ କରିଥିଲା। ପରେ ବିନା ଏଗ୍ରିମେଣ୍ଟରେ ବିଜେଡ଼ି ଶାସନକାଳରେ କଳା ତାଳିକାଭୁକ୍ତ ହୋଇଥିବା ଜଣେ କଣ୍ଟ୍ରାକ୍ଟର ସେହି ବକ୍ସ କଣ୍ଡୁଇଟ୍ ନିର୍ମାଣ କରୁଥିବା ଜଣାପଡ଼ିଥିଲା। ଏଭଳି ଅଭିଯୋଗ ନେଇ ଗତ ୪ତାରିଖରେ ବିଜେଡ଼ି ଜିଲାପାଳଙ୍କୁ ଫେରାଦ ହୋଇ ଉଚ୍ଚସ୍ତରୀୟ ତଦନ୍ତ ଦାବି କରିଥିଲା। ତଦନ୍ତ ପରେ ଅନିୟମିତତା ପଦାକୁ ଆସିଥିଲା ଏବଂ ରାଜ୍ୟ ସରକାରଙ୍କ ଜଳସମ୍ପଦ ବିଭାଗରେ କାର୍ଯ୍ୟରତ ତତ୍କାଳୀନ ଅଧୀକ୍ଷଣ ଯନ୍ତ୍ରୀ, ନିର୍ବାହୀ ଯନ୍ତ୍ରୀ ଏବଂ ସହକାରୀ ଯନ୍ତ୍ରୀଙ୍କୁ ନିଲମ୍ବିତ କରିଥିଲେ। ତେବେ ସେମାନେ ନିଲମ୍ବିତ ହେବାର ଅଳ୍ପ ସମୟ ପରେ ଖୋଦ୍ ବରଗଡ଼ ଏମ୍ପି ପ୍ରଦୀପ ପୁରୋହିତ ସେଥିରେ ପି.ସି କାରବାର ହୋଇଥିବା ପ୍ରସଙ୍ଗ ଉଠାଇଥିଲେ। ତେବେ ବର୍ତ୍ତମାନ କେନାଲରେ ବାଲିବସ୍ତା ଦେଇ ଯେଉଁ ପ୍ୟାଚଅପ୍ ମରାଯାଉଛି, ତାହା ଯଦି ବର୍ଷା କିମ୍ବା କେନାଲ ପାଣିରେ ଧୋଇ ହୋଇ ପାର୍ଶ୍ୱସ୍ଥ ରାସ୍ତାକୁ କ୍ଷତି ପହଞ୍ଚାଏ କିମ୍ବା କେନାଲରେ ପାଣି ସ୍ରୋତକୁ ପୂର୍ବଭଳି ନ ଛାଡ଼ି କମାଇ ଦିଆଗଲେ ଆଗକୁ ଏହାକୁ ନେଇ ଅସନ୍ତୋଷ ତୀବ୍ର ହୋଇପାରେ ବୋଲି ଏବେଠାରୁ ଆଶଙ୍କା ପ୍ରକାଶ ପାଇଛି।
