ନୂଆଦିଲ୍ଲୀ,୧୫।୧୨: ଅରୁଣାଚଳ ପ୍ରଦେଶର ତୱାଙ୍ଗ ସେକ୍ଟରରେ ଭାରତ ଏବଂ ଚାଇନା ସୈନ୍ୟଙ୍କ ମଧ୍ୟରେ ହୋଇଥିବା ସଂଘର୍ଷକୁ ନେଇ ଅଲ ଇଣ୍ଡିଆ ମଜଲିସ-ଇ-ଇଥାହାଦୁଲ ମୁସଲିମିନ (ଏଆଇଏମଆଇଏମ) ମୁଖ୍ୟ ଅସଦୁଦ୍ଦିନ ଓୱାଇସି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ସମାଲୋଚନା କରିଛନ୍ତି। ତୱାଙ୍ଗ ପ୍ରସଙ୍ଗରେ କେନ୍ଦ୍ର ମୋଦି ସରକାର ସତ ଲୁଚାଇଥିବା ଅଭିଯୋଗ କରିଛନ୍ତି ଓୱାଇସି।
ସରକାରଙ୍କୁ ଟାର୍ଗେଟ୍ କରି ଓୱାଇସି କହିଛନ୍ତି, ଏହା ଏକ ଗୁରୁତ୍ୱପୂର୍ଣ୍ଣ ଘଟଣା। ସେଥିପାଇଁ ସଂସଦରେ ଏକ ବିତର୍କ ଆବଶ୍ୟକ। ପ୍ରଧାନମନ୍ତ୍ରୀ ସବୁ ପ୍ରଶ୍ନର ଉତ୍ତର ଦେବା ଉଚିତ୍। ସତ ଆମ ଲୋକଙ୍କ କାହିଁକି ଲୁଚା ଯାଉଛି ବୋଲି ସେ ପ୍ରଶ୍ନ କରିଛନ୍ତି।
ଏକ ଇଂରାଜୀ ଖବରକାଗଜରେ ପ୍ରକାଶିତ ଖବରକୁ ଦର୍ଶାଇ ଓୱାଇସି କହିଛନ୍ତି, ଯଦି ବ୍ରିଟିଶ ଖବରକାଗଜର ରିପୋର୍ଟ ସତ୍ୟ, ତେବେ ଏହାର ଅର୍ଥ ହେଉଛି ଯେ ଚାଇନା ସୀମାରେ ଅବସ୍ଥା ଯାହା କୁହାଯାଉଛି ତା’ଠାରୁ ଅଧିକ ଗମ୍ଭୀର। ଲଦାଖରୁ ଅରୁଣାଚଳ ପର୍ଯ୍ୟନ୍ତ ମାମଲା ଗମ୍ଭୀର ରହିଛି। ଏଥିପାଇଁ ସରକାର ଉତ୍ତର ଦେବା ଉଚିତ୍।
ଓୱାଇସି ଟୁଇଟ୍ରେ ଲେଖିଛନ୍ତି, ଆମର ଏକ ଶକ୍ତିଶାଳୀ ସେନା କିନ୍ତୁ ବହୁତ ଦୁର୍ବଳ ପ୍ରଧାନମନ୍ତ୍ରୀ। ସେମାନେ ଚାଇନା ନାଁ ଧରିବାକୁ ମଧ୍ୟ ଭୟ କରୁଛନ୍ତି, ଦେଶ ତଥା ନେତାଙ୍କ ପ୍ରଶ୍ନରୁ ଦୂରେଇ ରହିଛନ୍ତି। ଏହା ଏକ ବଡ ସଙ୍କଟ। ଏହାର ଉତ୍ତର କେବଳ ଏକ ବିତର୍କ ମାଧ୍ୟମରେ ମିଳିପାରିବ, କିନ୍ତୁ ସରକାରଙ୍କ ଆଭିମୁଖ୍ୟ ସମ୍ପୂର୍ଣ୍ଣ ଗ୍ରହଣୀୟ ନୁହେଁ।
