ଛତ୍ରପୁର,୨୩।୩ (ଦିଲ୍ଲୀପ ସାମଲ): ଏଣିକି ବେପରୁଆଓ ନିୟମ ଉଲ୍ଲଙ୍ଘନ କରୁଥିବା ଗାଡି ଚାଳକଙ୍କୁ ସାବାଡ କରାଯିବ । ସଡ଼କ ଦୁର୍ଘଟଣା ଓ ମୃତ୍ୟୁସଂଖ୍ୟା ହ୍ରାସ ଲକ୍ଷ୍ୟରେ ସ୍ବତନ୍ତ୍ର ଧରପକଡ ଅଭିଯାନ ଜାରି ରହିଛି । ଚଳିତ ମାସ ୨୧ ରୁ ୩୧ ତାରିଖ ପର୍ଯ୍ୟନ୍ତ ଜୋରଦାର ଧରପକଡ ଜାରି ରହିବ । ଏହିକ୍ରମରେ ଗଞ୍ଜାମ ପରିବହନ ବିଭାଗ ପକ୍ଷରୁ ଯାଞ୍ଚକୁ ଜୋରଦାର କରାଯାଇଛି ।
ଗଞ୍ଜାମ ପରିବହନ ବିଭାଗ ପକ୍ଷରୁ ୫ ସ୍ବତନ୍ତ୍ର ଟିମ ଗଠନ କରାଯାଇ ପୋଲିସ ଟିମ ସହ ନିୟୋଜିତ ରହିଥିବା ଗଞ୍ଜାମ ଆରଟିଓ ଇଂ.ଦେବାଶିଷ ସ୍ବାଇଁ ସୂଚନା ଦେଇଛନ୍ତି । ଦ୍ରୃତଗତି,ନିଶାସକ୍ତ ଅବସ୍ଥାରେ ଗାଡି ଚାଳନା, ବିନା ହେଲମେଟରେ ବାଇକ ଚଳାଇବା ସହ ନିୟମ ଉଲ୍ଲଘଂନ ବିରୁଦ୍ଧରେ ଦୃଢ କାର୍ଯ୍ୟାନୁଷ୍ଠାନ ନିଆଯିବା ସହ ବ୍ୟାପକ ସଚେତନତା ମଧ୍ୟ କରାଯାଉଛି। ସଡ଼କ ସୁରକ୍ଷା ନିୟମ ନେଇ କଲେଜ, ବିଭିନ୍ନ ଛକମାନଙ୍କରେ ସଚେତନତା କରାଯାଉଛି । ବିଭିନ୍ନ ଘାଟିରେ ମଧ୍ୟ ଯାଞ୍ଚ କଡାକଡି କରାଯିବା ସହ ରାସ୍ତାରେ ରେଡିୟମ ଲଗାଯିବା ସହ ବିଭିନ୍ନ ପଦକ୍ଷେପ ନିଆଯାଉଛି ।
୨୧ ରୁ ଆରମ୍ଭ ହୋଇଥିବା ଏହି ଅଭିଯାନରେ ତିନି ଦିନ ମଧ୍ୟରେ ୬୨୧ ଚାଲାଣ କଟାଯାଇଥିବା ବେଳେ ବିନା ହେଲିମେଟରେ ୩୩୨ ଜଣ ଧରାପଡିଛନ୍ତି। ସେହିପରି ୩୩ ଜଣ ମଦ୍ୟପାନ କରିଧରାପଡିଥିବା ବେଳେ ସମୁଦାୟ ୩୯ ଲକ୍ଷ ୨୦ ହଜାର ୪ଶହ ଟଙ୍କା ଜରିମାନା ପକାଯାଇଥିବା ଆରଟିଓ ପକ୍ଷରୁ କୁହାଯାଇଛି । ଆଜି ତପ୍ତପାଣି ଘାଟିରେ ଗଞ୍ଜାମ ଆରଟିଓ, ଗଜପତି ଆରଟିଓ ପକ୍ଷରୁ ମିଳିତ ଭାବେ ଯାଞ୍ଚ ହୋଇଥିଲା । ଏଥିରେ ଡେପୁଟି କମିସନର ଟ୍ରାନ୍ସପୋର୍ଟ ଗୋପାଳ କୃଷ୍ଣ ଦାସ ପ୍ରମୁଖ ଉପସ୍ଥି ଥିଲେ । ସୂଚନା ଥାଉକି ଜିଲାରେ ପ୍ରତ୍ୟେକ ବର୍ଷ ଦୁର୍ଘଟଣା ହାର ଓ ମୃୃତ୍ୟୁ ହାର ଯଥେଷ୍ଟ ପରିମାଣରେ ବୃଦ୍ଧି ପାଉଛି ।
