ଲକ୍ଷ୍ନୌ,୬।୧: ଉତ୍ତରପ୍ରଦେଶରେ କଟିଗଲା ୨.୮୯ କୋଟି ଭୋଟରଙ୍କ ନାମ। ନିର୍ବାଚନ କମିଶନରଙ୍କ ପକ୍ଷରୁ ଚାଲିଥିବା ସ୍ୱତନ୍ତ୍ର ଭୋଟର ତାଲିକା ସଂଶୋଧନ (SIR) ପ୍ରକ୍ରିୟା ପରେ ଏସବୁ ନାମ କାଟି ଦିଆଯାଇଛି। ରାଜ୍ୟ ମୁଖ୍ୟ ନିର୍ବାଚନ ଅଧିକାରୀଙ୍କ ସୂଚନା ଅନୁଯାୟୀ, ବ୍ୟାପକ ଯାଞ୍ଚ ପରେ ଭୋଟରଙ୍କ ସଂଖ୍ୟା ପ୍ରାୟ ୧୫ କୋଟିରୁ ହ୍ରାସ ପାଇ ଏବେ ୧୨ କୋଟିରେ ପହଞ୍ଚିଛି।
ଭୋଟର ତାଲିକାରୁ ନାମ କଟାଯିବାର ମୁଖ୍ୟ କାରଣ ହେଉଛି, ପ୍ରାୟ ୪୬.୨୩ ଲକ୍ଷ ଭୋଟରଙ୍କ ମୃତ୍ୟୁ ହୋଇଥିବା ଜଣାପଡ଼ିଛି। ସେହିପରି ପ୍ରାୟ ୨.୧୭ କୋଟି ଭୋଟର ସେମାନଙ୍କ ପୂର୍ବ ଠିକଣା ଛାଡ଼ି ଅନ୍ୟତ୍ର ଚାଲିଯାଇଛନ୍ତି, ପ୍ରାୟ ୨୫.୪୭ ଲକ୍ଷ ଲୋକଙ୍କ ନାମ ଏକାଧିକ ସ୍ଥାନରେ ପଞ୍ଜୀକୃତ ହୋଇଥିବା ଜଣାପଡ଼ିଛି।
ଏହି ଯାଞ୍ଚ ପ୍ରକ୍ରିୟାରେ ପ୍ରାୟ ୮୧ ପ୍ରତିଶତ ଭୋଟର ସେମାନଙ୍କ ଫର୍ମ ସଠିକ୍ ଭାବେ ଦାଖଲ କରିଥିବା ବେଳେ ୧୮ ପ୍ରତିଶତ ଭୋଟରଙ୍କ ତଥ୍ୟ ମିଳିନଥିଲା। ଦେଶର ଅନ୍ୟ ରାଜ୍ୟଗୁଡ଼ିକ ତୁଳନାରେ ଉତ୍ତରପ୍ରଦେଶରେ ସର୍ବାଧିକ (୧୮.୭%) ନାମ କଟାଯାଇଛି।
ତେବେ ଯଦି କୌଣସି ଯୋଗ୍ୟ ଭୋଟରଙ୍କ ନାମ ତାଲିକାରୁ ବାଦ୍ ପଡ଼ିଛି, ତେବେ ସେମାନେ ଫେବୃଆରୀ ୬ ତାରିଖ ମଧ୍ୟରେ ନିଜର ଆପତ୍ତି କିମ୍ବା ନୂତନ ପଞ୍ଜୀକରଣ ପାଇଁ ଆବେଦନ କରିପାରିବେ। ସମସ୍ତ ଯାଞ୍ଚ ଓ ସଂଶୋଧନ ପରେ ମାର୍ଚ୍ଚ ୬ ତାରିଖରେ ଚୂଡ଼ାନ୍ତ ଭୋଟର ତାଲିକା ପ୍ରକାଶ ପାଇବ।
