ନୂଆଦିଲ୍ଲୀ,୭।୧: ଭାରତର ଅର୍ଥନୀତିକୁ ମାପିବାର ମୁଖ୍ୟ ମାପକ ଗ୍ରସ୍ ଡୋମେଷ୍ଟିକ୍ ପ୍ରଡକ୍ଟ (GDP) ବଦଳରେ ନେଟ୍ ଡୋମେଷ୍ଟିକ୍ ପ୍ରଡକ୍ଟ (NDP) ଆସିପାରେ। ଦେଶର ଅର୍ଥନୀତିକୁ ଆକଳନ କରିବାର ମୂଳ ମାପକରେ ପରିବର୍ତ୍ତନ ଆଣିବା ପାଇଁ ପରିସଂଖ୍ୟାନ ମନ୍ତ୍ରଣାଳୟ ବିଚାର କରୁଥିବା ଜଣାପଡ଼ିଛି। ବିଶ୍ୱସ୍ତରୀୟ ପରିସଂଖ୍ୟାନ ନିୟମ, SNA 2025 ସୁପାରିଶକୁ ଆଧାର କରି ଏହି ପରିବର୍ତ୍ତନ କରାଯିବାର ସମ୍ଭାବନା ରହିଛି।
ଏହା ଏକ ଦେଶରେ ଉତ୍ପାଦିତ ସମସ୍ତ ସାମଗ୍ରୀ ଓ ସେବାର ମୋଟ ମୂଲ୍ୟକୁ ମାପିଥାଏ। ତେବେ ଏହା ଉତ୍ପାଦନ ପ୍ରକ୍ରିୟାରେ ବ୍ୟବହୃତ ପୁଞ୍ଜି (ମେସିନ୍, ଭିତ୍ତିଭୂମି ଆଦି)ର କ୍ଷତି ବା ମୂଲ୍ୟହ୍ରାସକୁ ଗଣନା କରି ନ ଥାଏ। ଏହା GDPରୁ ସେହି ପୁଞ୍ଜିଗତ ସମ୍ପତ୍ତିର କ୍ଷତି ବା ମୂଲ୍ୟହ୍ରାସକୁ ବାଦ୍ ଦେଇ ମାପ କରାଯାଏ।
NDP କାହିଁକି ଗୁରୁତ୍ୱପୂର୍ଣ୍ଣ?
ବିଶେଷଜ୍ଞଙ୍କ ମତରେ, NDP ଅର୍ଥନୀତିର ‘ଧାର୍ଯ୍ୟ କ୍ଷମତା’ର ଏକ ସ୍ୱଚ୍ଛ ଚିତ୍ର ଦେଇଥାଏ। ଏହା ପ୍ରକୃତରେ ଘରୋଇ ସଂସ୍ଥା ଓ ପରିବାର ପାଇଁ ଉପଲବ୍ଧ ଥିବା ଆୟର ନିକଟତମ ଆକଳନ। ଆଗାମୀ SNA 2025 ଢାଞ୍ଚା ସ୍ପଷ୍ଟ କରିଛି ଯେ, ‘ମୂଲ୍ୟହ୍ରାସକୁ ବାଦ୍ ଦେଉଥିବା ହେତୁ NDP ଅର୍ଥନୈତିକ ପ୍ରଗତିର ଏକ ଧାରଣାତ୍ମକ ଭାବେ ଉନ୍ନତ ମାପକ।’
ଭାରତ ବର୍ତ୍ତମାନ GDP ସହିତ NDP ରିପୋର୍ଟ ମଧ୍ୟ ପ୍ରକାଶ କରୁଛି। ଆର୍ଥିକ ବର୍ଷ ୨୦୨୪-୨୫ ରେ ଭାରତରେ ମୂଲ୍ୟହ୍ରାସ ପାଖାପାଖି ₹୩୭ ଲକ୍ଷ କୋଟି ଥିଲା। ଫଳରେ ₹୩୩୦.୭ ଲକ୍ଷ କୋଟି GDP ତୁଳନାରେ NDP ମାତ୍ର ₹୨୯୩.୯ ଲକ୍ଷ କୋଟି ଥିଲା। ଏହି ବଡ଼ ବ୍ୟବଧାନ ଦର୍ଶାଉଛି ଯେ ପୁଞ୍ଜିର କ୍ଷୟ ଆକଳନ କରିବା ଜରୁରୀ।
ତେବେ ଅଧିକାରୀମାନେ ସୂଚନା ଦେଇଛନ୍ତି ଯେ, ଏହି ପରିବର୍ତ୍ତନ ତୁରନ୍ତ ହେବାର ସମ୍ଭାବନା ନାହିଁ। ଏହା ହୁଏତ ୨୦୨୯ ପରେ ହେବାକୁ ଥିବା ଜାତୀୟ ଆକାଉଣ୍ଟଗୁଡ଼ିକର ପରବର୍ତ୍ତୀ ସଂଶୋଧନ ସହିତ ଆସିପାରେ।
ଏହି ମଧ୍ୟରେ, ଭାରତ ପରିସଂଖ୍ୟାନ ପ୍ରଣାଳୀର ଏକ ବଡ଼ ପରିବର୍ତ୍ତନ ପାଇଁ ପ୍ରସ୍ତୁତି କରୁଛି। ୨୦୨୬ ଫେବୃଆରୀରେ ସରକାର GDPର ଏକ ନୂତନ ଶୃଙ୍ଖଳା ଜାରି କରିବେ, ଯେଉଁଥିରେ ଆଧାର ବର୍ଷକୁ ୨୦୧୧-୧୨ ବଦଳରେ ୨୦୨୨-୨୩ କରାଯିବ।
