ନୂଆଦିଲ୍ଲୀ, ୧୫।୯: ଦେଶର ଅଣୁ, କ୍ଷୁଦ୍ର ଏବଂ ମଧ୍ୟମ ଉଦ୍ୟୋଗ(ଏମ୍ଏସ୍ଏମ୍ଇ)ର ବକେୟା ରାଶି ପଇଠ କରିଦେବା ଲାଗି ଏମ୍ଏସ୍ଏମ୍ଇ ମନ୍ତ୍ରଣାଳୟ ପକ୍ଷରୁ କର୍ପୋରେଟଗୁଡ଼ିକୁ ନିର୍ଦ୍ଦେଶ ରହିଛି। ବର୍ତ୍ତମାନ କୋଭିଡ୍-୧୯ ଲାଗି କ୍ଷୁଦ୍ରଶିଳ୍ପଗୁଡିକ ବିଭିନ୍ନ ସମସ୍ୟା ଦେଇ ଗତି କରୁଛନ୍ତି। ଏହି ଶିଳ୍ପର ପରିଚାଳନାକୁ ଉନ୍ନତ କରିବା ଏବଂ ନିଯୁକ୍ତି ସୃଷ୍ଟିକୁ ଉତ୍ସାହିତ କରିବା ଦିଗରେ କର୍ପୋରେଟଗୁଡିକ ଧ୍ୟାନଦେବା ଆବଶ୍ୟକତା ରହିଛି। ବକେୟା ଦେୟ ପଇଠ ହୋଇଗଲେ ଏମ୍ଏସ୍ଏମ୍ଇଗୁଡିକର ନଗଦ ସମସ୍ୟା ସମାଧାନ ହୋଇପାରିବ ବୋଲି ସରକାରଙ୍କ ପକ୍ଷରୁ ସୋମବାର ଜାରି କରାଯାଇଥିବା ଏକ ବିବୃତିରେ କୁହାଯାଇଛି।
ଏହାକୁ ଧ୍ୟାନରେ ରଖି ମନ୍ତ୍ରଣାଳୟ ପକ୍ଷରୁ ଦେଶର ୫୦୦ କର୍ପୋରେଟ ଗ୍ରୁପ୍କୁ ଚିଠି ଲେଖାଯାଇଛି। ଏଥିଲାଗି ଏକ ସୋସିଆଲ ମିଡିଆ ଆଉଟରିଚ୍ କାର୍ଯ୍ୟକ୍ରମ ମଧ୍ୟ ହାତକୁ ନିଆଯାଇଛି। କ୍ଷୁଦ୍ରଶିଳ୍ପଗୁଡିକର ଦେୟ ୪୫ ଦିନ ମଧ୍ୟରେ ମିଳିଯିବା ଦିଗରେ କର୍ପୋରେଟ ଜଗତ କାର୍ଯ୍ୟ କରିବାକୁ କେନ୍ଦ୍ର ସରକାର ଆହ୍ବାନ ଜଣାଇଛନ୍ତି। ରାଷ୍ଟ୍ରାୟତ୍ତ ଉଦ୍ୟୋଗ ଏବଂ ମନ୍ତ୍ରଣାଳୟ ବର୍ତ୍ତମାନ ସୁଦ୍ଧା ପ୍ରାୟ ୧୦ ହଜାର କୋଟି ଟଙ୍କା ପଇଠ କରିଛି। ଘରୋଇ କ୍ଷେତ୍ର ଏଣ୍ଟରପ୍ରାଇଜଗୁଡିକ ଏମ୍ଏସ୍ଏମ୍ଇ ଦେୟ ପ୍ରଦାନ ଦିଗରେ ମଧ୍ୟ ଯତ୍ନବାନ ହେବାକୁ ସରକାର ଗୁରୁତ୍ୱାରୋପ କରିଛନ୍ତି।
କର୍ପୋରେଟଗୁଡିକ ଟ୍ରେଡ୍ ରିସିଭେବଲ ଡିସ୍କାଉଣ୍ଟ ସିଷ୍ଟମ(ଟିଆର୍ଇଡିଏସ୍) ପ୍ଲାଟ୍ଫର୍ମରେ ଯୋଗଦେବା ସହ ନେଣଦେଣ କରିବା ଲାଗି ସରକାର କହିଛନ୍ତି। ୫୦୦ କୋଟିରୁ ଊର୍ଦ୍ଧ୍ୱ କାରବାର କର୍ପୋରେଟ ସଂସ୍ଥା ଏବଂ ରାଷ୍ଟ୍ରାୟତ୍ତ ଉଦ୍ୟୋଗଗୁଡିକ ଟିଆର୍ଇଡିଏସ୍ ପ୍ଲାଟ୍ଫର୍ମରେ ଅଂଶଗ୍ରହଣ ବାଧ୍ୟତାମୂଳକ ବୋଲି କୁହାଯାଇଥିଲା। ସୂଚନାଯୋଗ୍ୟ, କୋଭିଡ୍-୧୯ ବଜାର ବ୍ୟବସ୍ଥାକୁ କ୍ଷତିଗ୍ରସ୍ତ କରିଛି। ବଜାରରେ ଚାହିଦର ନ ଥିବାରୁ କମ୍ପାନୀଗୁଡିକ ବିଭିନ୍ନ ସମସ୍ୟା ସାମ୍ନା କରୁଛନ୍ତି। ଏମ୍ଏସ୍ଏମ୍ଇଗୁଡିକର ସ୍ଥିତି ବିଗିଡ଼ିଯାଇଛି। ଏଥିଲାଗି ସରକାର ଋଣ ସହାୟତା ଯୋଜନା ହାତକୁ ନେଇଛନ୍ତି। ଏମ୍ଏସ୍ଏମ୍ଇ ବକେୟା ଅର୍ଥ ପାଇଲେ ଏହା କାରବାରକୁ ସମ୍ଭାଳିବା ଦିଗରେ ଯୋଗଦାନ ରଖିବ ବୋଲି କୁହାଯାଉଛି।
