ଧାମନଗର,୧୦।୫ (ଡି.ଏନ.ଏ/ସ୍ବ.ପ୍ର.) ଭଦ୍ରକ ଜିଲା ଧାମନଗର ବିଡିଓଙ୍କ କାର୍ଯ୍ୟାଳୟରେ ସୋମବାର ମିଳିତ ଜନଅଭିଯୋଗ ଶୁଣାଣି ଶିବିର ଅନୁଷ୍ଠିତ ହୋଇଯାଇଛି। ଜିଲାପାଳ ତ୍ରିଲୋଚନ ମାଝି, ଆରକ୍ଷୀ ଅଧୀକ୍ଷକ ଚରଣ ସିଂ ମୀନା, ଗ୍ରାମ୍ୟ ଉନ୍ନୟନ ପ୍ରକଳ୍ପ ନିର୍ଦ୍ଦେଶକ ଇନ୍ଦ୍ରମଣି ନାୟକ, ଉପଜିଲାପାଳ ମନୋଜ ପାତ୍ର, ସିଡିଏମ୍ଓ ସନ୍ତୋଷ କୁମାର ପାତ୍ର, ବିଡିଓ ଦୁର୍ଗା ଚରଣ ମୁର୍ମୁ ପ୍ରମୁଖ ଯୋଗ ଦେଇଥିଲେ। ଶିବିରରେ ମୋଟ ୬୦ଟି ଅଭିଯୋଗ ପ୍ରଶାସନର ହସ୍ତଗତ ହୋଇଥିଲା। ୪ ଅଭିଯୋଗର ସମାଧାନ ହୋଇଥିବା ବେଳେ ୫୬ ଅଭିଯୋଗର ତୁରନ୍ତ ସମାଧାନ ପାଇଁ ଜିଲାପାଳ ବିଭାଗୀୟ ଅଧିକାରୀଙ୍କୁ ନିର୍ଦେଶ ଦେଇଛନ୍ତି। ୫୦ଟି ଅଭିଯୋଗ ବ୍ୟକ୍ତିଗତ ଥିବାବେଳେ ୧୦ଟି ବିଭିନ୍ନ ଗ୍ରାମ ସମସ୍ୟା ଉପରେ ରହିଥିଲା। ଘରପୋଡ଼ିରେ ଆର୍ଥିକ ସାହାଯ୍ୟ ଟଙ୍କା ନ ମିଳିବା, ରାସ୍ତା କାମ ନ ହେବା, କାଳିଆ ଯୋଜନାରେ ଟଙ୍କା ନ ମିଳିବା, ଇନ୍ଦିରା ଆବାସ, ବିଧବା ଭତ୍ତା ସମ୍ପର୍କିତ ଅଭିଯୋଗ ହୋଇଥିଲା। ବିଶେଷ କରି ଦେହୁଡ଼ି ଆନନ୍ଦପୁର ପଞ୍ଚାୟତର ବୈତରଣୀ ନଦୀରେ ନିର୍ମାଣାଧୀନ ସେତୁର ସଂଯୋଗକାରୀ ରାସ୍ତା ନିର୍ମାଣରେ ପ୍ରିୟାପ୍ରୀତି ଯୋଗୁ ଠିକ୍ ଭାବେ ନ ହେବା, ବାଲି ଚୋରା ଚାଲାଣ ଯୋଗୁ ନଦୀ କୂଳ କ୍ଷୟ, ଧାମନଗର ସୀମାରେ ନ ଥିବାରୁ ଯାଜପୁର ସୀମାରୁ ବାଲି ଉଠାଯାଇ ଧାମନଗର ପଟେ ଚୋରା ଚାଲାଣ ନେଇ ଅଭିଯୋଗ ହୋଇଥିଳା। ଜିଲାପାଳ ଧାମନଗର ଅତିରିକ୍ତ ତହସିଲଦାରଙ୍କ ଉପରେ ଅସନ୍ତୋଷ ପ୍ରକାଶ କରି ବାଲି ଚୋରା ଚାଲାଣ ରୋକିବା ପାଇଁ ନିର୍ଦ୍ଦେଶ ଦେଇଥିଲେ। ଉପଜିଲାପାଳ ପାତ୍ରଙ୍କୁ ମଧ୍ୟ ଏ ଦିଗରେ ପଦକ୍ଷେପ ନେବାକୁ ଜିଲାପାଳ କହିଥିଲେ। ଏଥିସହ ଆବଶ୍ୟକ ପଡ଼ିଲେ ପୋଲିସ ଯୋଗାଇ ଦେବାକୁ ସେ ଏସ୍ପିଙ୍କୁ ନିର୍ଦ୍ଦେଶ ଦେଇଛନ୍ତି।
ସେହିପରି ମୁସ୍ତାଫାପୁର ପଞ୍ଚାୟତରେ ୨୩ଏକର ଜମି ଜବରଦଖଲରେ ଅଛି। ସେଠାରେ କେତେଜଣ ମୁଷ୍ଟିମେୟ ଲୋକ ଘର କରି ରହିଛନ୍ତି। ବହୁ ଅଭିଯୋଗ ପରେ ପ୍ରଶାସନ ପକ୍ଷରୁ ରାସ୍ତାପାର୍ଶ୍ୱ ଦୋକାନ କେବିନ ଉଚ୍ଛେଦ କରାଯାଇଥିବା ବେଳେ ଘରଦ୍ୱାର ଏବେବି ରହିଥିବା ଅଭିଯୋଗ ହୋଇଥିଲା। ସେଠାରୁ ତୁରନ୍ତ ଜବରଦଖଲ ହଟାଇବା ପାଇଁ ଜିଲାପାଳ ଅତିରିକ୍ତ ତହସିଲଦାର ଓ ଉପଜିଲାପାଳଙ୍କୁ ନିର୍ଦ୍ଦେଶ ଦେଇଛନ୍ତି। ଏହି ଶିବିର ପ୍ରହସନରେ ପରିଣତ ହୋଇଥିବା ଉପସ୍ଥିତ ଅଭିଯୋଗକାରୀମାନେ କହିଛନ୍ତି। ବ୍ଲକ ସମ୍ମିଳନୀ ଗୃହରେ ଏସି ଖରାପ ଥିବାରୁ ବିଡିଓଙ୍କ ଅଫିସରେ ଶିବିର କରାଯାଇଥିଲା। ବିଡିଓଙ୍କ ଅଫିସରେ ଅଧିକାରୀମାନେ ବସିଯିବାରୁ ଅଭିଯୋଗକାରୀଙ୍କ ପାଇଁ ସ୍ଥାନ ନ ଥିଲା। ଜଣେ ଜଣେ ଅଭିଯୋଗକାରୀ ଯାଇ ଦୁଇ ମିନିଟ୍ରେ ଆସୁଥିଲେ। ଏହାକୁ ନେଇ ଅଭିଯୋଗକାରୀମାନେ ଅସନ୍ତୋଷ ପ୍ରକାଶ କରିଥିଲେ। ପରେ ଜିଲାପାଳ ଧାମନଗର ଏନ୍ଏସି କାର୍ଯ୍ୟାଳୟକୁ ଗସ୍ତ କରି ଅଧ୍ୟକ୍ଷା ନିବେଦିତା ଯେନା, ଉପାଧ୍ୟକ୍ଷ ୱାସିମ ଏଜଦାନୀ କାଦରୀ ଏବଂ ନଗର ସଭାପତି ସୁଶାନ୍ତ ନାୟକଙ୍କ ସମେତ ଉପସ୍ଥିତ ଅଧିକାରୀ ଯତୀନ୍ଦ୍ର କୁମାର ମିଶ୍ରଙ୍କ ସହ ଆଲୋଚନା କରି ସମସ୍ତ ପ୍ରକାର ଉନ୍ନୟନମୂଳକ କାର୍ଯ୍ୟ ତୁରନ୍ତ ସାରିବାକୁ କହିଥିଲେ।
