ଝାରସୁଗୁଡା ଅଫିସ୍,୧୭ା୧: ଲଖନପୁର ତହସିଲ ପିପିଲିମାଲ ଆର୍ଆଇ ସର୍କଲ ଅଧୀନ ୧,୦୫୮ଏକର ସରକାରୀ ଜମିକୁ ଇଡ୍କୋ ରାଜସ୍ବ ବିଭାଗ ମାଧ୍ୟମରେ ଅଧିଗ୍ରହଣ କରିବାପାଇଁ ପ୍ରୟାସ ଆରମ୍ଭ କରିଛି। ଏଥିମଧ୍ୟରେ ଜଙ୍ଗଲ, ପତିତ, ଗୋଚର ଆଦି କିସମର ଜମି ରହିଛି। ଏହିସବୁ ଜମିକୁ ସ୍ଥାନୀୟ ଲୋକେ ପୂର୍ବପୁରୁଷରୁ ଦଖଲ କରି ବ୍ୟବହାର କରିଆସୁଛନ୍ତି। ରାଜସ୍ବ ବିଭାଗ ତରଫରୁ ଦଖଲରେ ଥିବା ପ୍ରଜାଙ୍କୁ ନୋଟିସ୍ ଜାରି ହୋଇଛି। ଏ ସମ୍ପର୍କରେ କାହାର କୌଣସି ଅଭିଯୋଗ ଥିଲେ ସମୟସୀମା ମଧ୍ୟରେ ଲଖନପୁର ତହସିଲଦାରଙ୍କ କୋର୍ଟରେ ଅଭିଯୋଗ କରିପାରିବେ। ଏହି ନିର୍ଦ୍ଦେଶବଳରେ ପ୍ରଜାମାନେ ଲଖନପୁର ତହସିଲ୍ କୋର୍ଟରେ ହାଜର ହୋଇ ଜମି ନ ଛାଡିବା ପାଇଁ ଲିଖିତ ଭାବେ ଜଣାଇଥିଲେ। ଏହାକୁ ଜିଲା ପ୍ରଶାସନ ବିଚାରକୁ ନ ନେଇ ଜମି ଅଧିଗ୍ରହଣ ପ୍ରକ୍ରିୟା ଜାରି ରଖିଛନ୍ତି। ଏହା ଜଣାପଡିବା ପରେ ଲୋକଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ଏହି ପରିପ୍ରେକ୍ଷୀରେ ବଞ୍ଜାରୀ କ୍ରିୟାନୁଷ୍ଠାନ କମିଟି ତରଫରୁ ସୋମବାର ବଞ୍ଜାରୀ କଲ୍ୟାଣ ମଣ୍ଡପରେ ଗୋପିନାଥ ମାଝିଙ୍କ ଅଧ୍ୟକ୍ଷତାରେ ଏକ ଜରୁରୀ ବୈଠକ ଅନୁଷ୍ଠିତ ହୋଇଥିଲା। ଏଥିରେ ଦଖଲରେ ଥିବା ସରକାରୀ ଜମି ନ ଛାଡିବା ପାଇଁ ପ୍ରସ୍ତାବ ଗୃହୀତ ହୋଇଛି। ଜିଲା ପ୍ରଶାସନ ଜୋରଜବରଦସ୍ତ କଲେ ଆଗାମୀ ଦିନରେ ଆନ୍ଦୋଳନକୁ ଓହ୍ଲାଇ ଉଚିତ ଜବାବ ଦେବେ ବୋଲି କୁହାଯାଇଛି। ବୈଠକରେ ସାମାଜିକ କର୍ମୀ ବିରଞ୍ଚତ୍ ସାହୁ, ନାଏବ ସରପଞ୍ଚ ବିରଞ୍ଚତ୍ କରାଳୀ, କୃଷ୍ଣଚନ୍ଦ୍ର ଭୋଇ, ମଧୁସୂଦନ ଛତ୍ରିଆ, କୈଳାସ ମାଝି, ହୃଦାନନ୍ଦ ଭୋଇ, ଦେବାନନ୍ଦ କରାଲୀ, ତରୁଣ କିଷାନ, ଲଳିତ ଦୀପ୍, ଶଙ୍କର୍ଷଣ ମହାନନ୍ଦ, ରମଣ ସାହୁ, ବିନୋଦ ମାଝି, ଧନଞ୍ଜୟ ଭୋଇ ପ୍ରମୁଖ ଉପସ୍ଥିତଥିଲେ ା
