ଇସଲାମାବାଦ,୯।୫: ଭାରତ ଏବଂ ପାକିସ୍ତାନ ମଧ୍ୟରେ ଯୁଦ୍ଧକୁ ନେଇ ସବୁଠି ଭୟର ବାତାବରଣ ରହିଛି। ଏବେ ପାକିସ୍ତାନ ଜେଲରେ ଥିବା ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ମୁକ୍ତି ପାଇଁ ଶୁକ୍ରବାର ପାକିସ୍ତାନର ଏକ କୋର୍ଟରେ ଏକ ଆବେଦନ ଦାଖଲ କରାଯାଇଥିଲା। ପାକିସ୍ତାନ ଏବଂ ଭାରତ ମଧ୍ୟରେ ଉତ୍ତେଜନା ମଧ୍ୟରେ ଏହି ଆବେଦନ ଦାଖଲ କରାଯାଇଛି।
ଇମ୍ରାନ ଖାନଙ୍କ ଦଳ ପାକିସ୍ତାନ ତେହେରିକ-ଏ-ଇନସାଫ ଏକ ହ୍ବାଟସଆପ ମେସେଜରେ କହିଛି ଯେ ଖାଇବର ପଖତୁନଖ୍ବା (କେପି) ମୁଖ୍ୟମନ୍ତ୍ରୀ ଏବଂ ଦଳର ନେତା ଅଲି ଆମିନ ଗଣ୍ଡାପୁର ଦଳର ପ୍ରତିଷ୍ଠାତାଙ୍କ ମୁକ୍ତି ପାଇଁ ଇସଲାମାବାଦ ହାଇକୋର୍ଟଙ୍କ ଦ୍ୱାରସ୍ଥ ହୋଇଛନ୍ତି।
୭୨ ବର୍ଷୀୟ ଇମ୍ରାନ ଖାନଙ୍କୁ ରାୱଲପିଣ୍ଡିର ଆଦିଆଲା ଜେଲରେ ରଖାଯାଇଛି। ହ୍ବାଟସଆପ ମେସେଜରେ କୁହାଯାଇଛି, ‘ଇମ୍ରାନ ଖାନଙ୍କ ମୁକ୍ତି ପାଇଁ ଇସଲାମାବାଦ ହାଇକୋର୍ଟର ଦ୍ୱାରସ୍ଥ ହୋଇଛି। ମୁଖ୍ୟମନ୍ତ୍ରୀ ଅଲି ଅମିନ ଏକ ଆବେଦନ ଦାଖଲ କରିଛନ୍ତି। ଏଥିରେ କୁହାଯାଇଛି, ‘ଭାରତ ସହିତ ବର୍ତ୍ତମାନର ଯୁଦ୍ଧ ପରିସ୍ଥିତିକୁ ଦୃଷ୍ଟିରେ ରଖି, ଜାତୀୟ ସଦ୍ଭାବ ଏବଂ ସଂହତି ପାଇଁ ଏବଂ ଆଦିଆଲା ଜେଲରେ ଡ୍ରୋନ ଆକ୍ରମଣର ଆଶଙ୍କା ହେତୁ, ତାଙ୍କୁ ତୁରନ୍ତ ପାରୋଲ/ପ୍ରୋବେସନ ରେ ମୁକ୍ତ କରାଯିବା ଉଚିତ ବୋଲି ଅନୁରୋଧ କରାଯାଇଛି।’ କୋର୍ଟ ଆବେଦନର ଶୁଣାଣି ପାଇଁ କୌଣସି ତାରିଖ ସ୍ଥିର କରିନାହାଁନ୍ତି।
ସୂଚନାଯୋଗ୍ୟ, ପହଲଗାମ ଆତଙ୍କବାଦୀ ଆକ୍ରମଣ ପରେ ଭାରତ ଏବଂ ପାକିସ୍ତାନ ମଧ୍ୟରେ ସମ୍ପର୍କ ତିକ୍ତ ହୋଇଛି। ୨୨ ଏପ୍ରିଲରେ ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣର କଡ଼ା ଜବାବ ଦେଇ, ଭାରତୀୟ ସଶସ୍ତ୍ର ବାହିନୀ ମଙ୍ଗଳବାର ଏବଂ ବୁଧବାର ରାତିରେ ‘ଅପରେଶସନ ସିନ୍ଦୂର’ ଅଧୀନରେ ପାକ ଅଧିକୃତ କଶ୍ମୀର (ପିଓକେ) ଏବଂ ପାକିସ୍ତାନରେ ନଅଟି ଆତଙ୍କବାଦୀ ଲଞ୍ଚ ପ୍ୟାଡ ଉପରେ ସଠିକ କ୍ଷେପଣାସ୍ତ୍ର ଆକ୍ରମଣ କରିଥିଲେ।
