ସୁନ୍ଦରଗଡ଼,୨୭।୭(ଜୟନାରାୟଣ ମେଣ୍ଡୁଳି): ବିଭିନ୍ନ ଗଣମାଧ୍ୟମ, ପୋଲିସ ପ୍ରଶାସନ ପକ୍ଷରୁ ବିଭିନ୍ନ ସଚେତନତା ସୃଷ୍ଟି କରା ଯାଉଥିଲେ ମଧ୍ୟ ମୋବାଇଲ ବ୍ୟବହାରକାରୀଙ୍କ ଛୋଟ ଛୋଟ ଭୁଲ ପାଇଁ ଏବେ ଅନଲାଇନ ଟଙ୍କା ଠକେଇ ଘଟଣା ବଢ଼ିବାରେ ଲାଗିଛି। ସାଇବର ଠକଙ୍କ ଠକେଇର ଶିକାର ହେଉଥିବା ଲୋକେ ପୋଲିସର ଦ୍ବାରସ୍ଥ ହେଉଛନ୍ତି। ସୁନ୍ଦରଗଡ଼ ସହରରେ ସୋମବାର ଏଭଳି ୪ଟି ଅନଲାଇନ ଟଙ୍କା ଠକେଇ ଘଟଣା ଘଟିଥିବାର ଅଭିଯୋଗ ହୋଇଛି। ଏଭଳି ଏକ ଘଟଣା ମଧ୍ୟରେ ସୁନ୍ଦରଗଡ଼ ମୁଖ୍ୟ ଡାକଘର ସମ୍ମୁଖରେ ଇଟିଲି ବ୍ୟବସାୟ କରୁଥିବା ଜଗନ୍ନାଥ ସାହୁଙ୍କ ସହ ଘଟିଛି। ସେ ଅପରାହ୍ନରେ ଘରେ ବିଶ୍ରାମ ନେଉଥିଲାବେଳେ ତାଙ୍କୁ ଏକ ନମ୍ବରରୁ ଫୋନ ଆସିଥିଲା, ଯେଉଁଥିରେ ତାଙ୍କର ଗିଫ୍ଟ ଭାଉଚର ଲାଗିଥିବା ନେଇ କହିବା ସହ କିଛି ମୋବାଇଲରେ ଅପସନ ପ୍ରଦାନ କରିବାକୁ କହିଥିଲେ। ଏହା ଜଗନ୍ନାଥ କରିବା ପରେ ତୁରନ୍ତ ତାଙ୍କ ବ୍ୟାଙ୍କ ଆକାଉଣ୍ଟରୁ ପ୍ରଥମେ ୧୪ ହଜାର ଟଙ୍କା କଟିବା ମେସେଜ ଆସିଥିଲା, ପରେ ଫୋନରେ ଶୀଘ୍ର ତୁମ ସମସ୍ତ ଟଙ୍କା ଫେରିପାଇବ କହି ଦ୍ୱିତୀୟ ଫୋନ ଆସିଥିଲା ଏବଂ ଆଉ କିଛି ବ୍ୟାଙ୍କ ସୂଚନା ଦିଅନ୍ତୁ କହିଥିଲେ। ପ୍ରଥମେ ଜଗନ୍ନାଥ ଏହା ବୁଝି ନ ପାରି ତାଙ୍କ ପୁଅ ଶିବମକୁ ଦେଇଥିଲେ। ସେ ଟଙ୍କା ଫେରିପାଇବା ଆଶାରେ ମୋବାଇଲ ଯୋଗେ ଆଉ କିଛି ସୂଚନା ପ୍ରଦାନ କରିବା ପରେ ପୁନର୍ବାର ୩୦ହଜାର ଟଙ୍କା ତାଙ୍କ ବ୍ୟାଙ୍କ ଆକାଉଣ୍ଟରୁ କଟିଗଲା। ତଥାପି ସେ ଟଙ୍କା ଫେରି ପାଇବା ନେଇ ଆଶା ରଖିଥିଲେ। ସକାଳ ପର୍ଯ୍ୟନ୍ତ ଟଙ୍କା ନ ଫେରି ପାଇବାରୁ ଠକାମୀର ଶିକାର ହୋଇଥିବା ଜାଣି ଟାଉନ ଥାନାରେ ଏକ ଏତଲା ଦେଇଥିଲେ। ସେହିପରି ଏକ ବିଦ୍ୟାଳୟ ଶିକ୍ଷୟିତ୍ରୀଙ୍କ ଆକାଉଣ୍ଟରୁ ୨୦ ହଜାର, ଅନ୍ୟ ଜଣେ ଶିକ୍ଷୟିତ୍ରୀଙ୍କ ଆକାଉଣ୍ଟରୁ ଓ ଶିକ୍ଷକଙ୍କ ଆକାଉଣ୍ଟରୁ ଅନୁରୂପଭାବେ ଅନଲାଇନ ଟଙ୍କା ଠକେଇ ହୋଇଥିବା ନେଇ ଟାଉନ ଥାନାରେ ରିପୋର୍ଟ ହୋଇଛି। ଏହାକୁ ନେଇ ପୋଲିସ ଅନୁସନ୍ଧାନ ଆରମ୍ଭ କରିବା ସହିତ ଏଭଳି ଅଜଣା ବ୍ୟକ୍ତିଙ୍କ ଫୋନ କଲ କିମ୍ବା ମେସେଜ ପ୍ରତି ସତର୍କ ରହିବାକୁ ଜନସାଧାରଣଙ୍କୁ ପୋଲିସ ଅନୁରୋଧ କରିଛି।
