ଥୁଆମୂଳ ରାମପୁର,୩୦।୩(ଦୁର୍ଗା କୀର୍ତ୍ତି): କଳାହାଣ୍ଡି ଜିଲା ଥୁଆମୂଳ ରାମପୁର ଥାନା ଅଧୀନ ବାଗଡିଆଣି-ଲାଠିଆଗୁଡ଼ା ଛକ ନିକଟରେ ଏକ ବାଇକ ଦୁର୍ଘଟଣାରେ ଜଣେ ଛାତ୍ରଙ୍କ ମୃତ୍ୟୁ ଘଟିଥିବା ବେଳେ ଅନ୍ୟ ଜଣେ ଛାତ୍ର ଗୁରୁତର ହୋଇଛନ୍ତି। ସୂଚନାଯୋଗ୍ୟ, ରବିବାର ଅପରାହ୍ନରେ ଥୁଆମୂଳ ରାମପୁର ଥାନା ଅନ୍ତର୍ଗତ ବଡ଼ଛତ୍ରଙ୍ଗ ପଞ୍ଚାୟତ ଦାବିରିଗୁଡ଼ା ଗ୍ରାମର ରାଇଧର ନାଏକଙ୍କ ପୁଅ ମଣ୍ଟୁ ନାଏକ (୨୩) ଏବଂ କବିସନ ନାଏକଙ୍କ ପୁଅ ଉମାଶଙ୍କର ନାଏକ(୨୫) ଦୁହେଁ ଏକ ବାଇକ୍ ଯୋଗେ କୌଣସି କାମ ନେଇ ଥୁଆମୂଳ ରାମପୁର ଆସିଥିଲେ। କାମ ସାରି ସେମାନେ ଗାଁକୁ ଫେରୁଥିବା ବେଳେ ଡୁମେର ପଦର ଗ୍ରାମର ଦୁର୍ଗା ନାଏକଙ୍କ ପୁଅ ଦିପେନ୍ଦ୍ର ନାଏକ(୨୨) ଏବଂ ସତ୍ୟ ନାରାୟଣ ନାଏକଙ୍କ ପୁଅ ଫିରୋଜ ନାଏକ(ଚିକୁନ) ଭବାନୀପାଟଣାରେ ପଢୁଥିବା ତାଙ୍କ କଲେଜରୁ ବାର୍ଷିକ +୨ ପରୀକ୍ଷା ସାରି ଘରକୁ ଫେରୁଥିଲେ।
ସେତିକିବେଳେ ବାଗଡିଆଣି-ଲାଠିଆଗୁଡ଼ା ଛକ ନିକଟରେ ମଣ୍ଟୁ ଏବଂ ଉମାଶଙ୍କରଙ୍କ ହିରୋ ଏଚ୍ଏଫ ଡିଲକ୍ସ (ଓଡ଼ି୦୮କେ୬୧୮୦) ବାଇକଙ୍କୁ ପଛ ପଟୁ ପିଟିଥିଲା ଫିରୋଜ (ଚିକୁନ) ଏବଂ ଦିପେନ୍ଦ୍ରଙ୍କ କେଟିଏମ୍(ଓଡ଼ି୦୮ଏମ୧୩୯୭) ବାଇକ୍ l ଫଳରେ ଦୁଇ ବାଇକରେ ଥିବା ୪ଜଣ ରାସ୍ତାରେ ଛିଟିକି ପଡ଼ିଥିଲେ। ସ୍ଥାନୀୟ ଜନସାଧାରଣ ସହଯୋଗରେ ଆମ୍ବୁଲାନ୍ସ ଯୋଗେ ଆହତମାନଙ୍କୁ ଥୁଆମୂଳ ରାମପୁର ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିଲା।
ଡାକ୍ତର ସେମାନଙ୍କୁ ପ୍ରଥମିକ ଚିକିତ୍ସା କରି ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରିଥିଲେ। ସେଠାରେ ଚିକିତ୍ସାଧିନ ଅବସ୍ଥାରେ ଫିରୋଜ ନାଏକ(ଚିକୁନ) ନାମକ ଯୁବକଙ୍କ ମୃତ୍ୟୁ ଘଟିଥିବା ସୂଚନା ମିଳିଛି I ଅନ୍ୟପକ୍ଷେ ଗୁରୁତର ଦିପେନ୍ଦ୍ରଙ୍କୁ ବୁର୍ଲା ମେଡିକାଳକୁ ରେଫର୍ କରାଯାଇଛି।
ଅନ୍ୟପକ୍ଷେ ଦାବିରିଗୁଡ଼ା ଗ୍ରାମର ମଣ୍ଟୁ ନାଏକ ଏବଂ ଉମାଶଙ୍କର ନାଏକ ଥୁଆମୁଳ ରାମପୁର ଥାନାରେ ଆତ୍ମସମର୍ପଣ କରିଥିବା ସୂଚନା ମିଳିଛି। ପୋଲିସ ଘଟଣାର ତଦନ୍ତ ଆରମ୍ଭ କରିଛି।
