ଶେରଗଡ଼,୨୯ା୧୦(ଡି.ଏନ୍.ଏ.): ଗଞ୍ଜାମ ଜିଲା ବଳରାମପୁର ନିକଟସ୍ଥ ଭୀମପୁରା ଗ୍ରାମରେ ଗୁରୁବାର ସକାଳେ ଏକ ଅଘଟଣ ଘଟିଛି। ବାର୍ହା ଶିକାର ପାଇଁ ବୋମା ଭିଡୁଥିବା ବେଳେ ବିସ୍ଫୋରଣ ଘଟି ଜଣଙ୍କର ମୃତ୍ୟୁ ଘଟିଥିବା ବେଳେ ଦୁଇଜଣ ଗୁରୁତର ହୋଇଛନ୍ତି। ମୃତ ବ୍ୟକ୍ତି ଜଣଙ୍କ ହେଲେ ଉକ୍ତ ଗ୍ରାମର ବୁଲୁ ମଲ୍ଲିକ (୪୦)। ଗୁରୁତର ଦ୍ୱୟ ହେଲେ ନନ୍ଦିଆ ନାୟକ (୪୦), ପ୍ରକାଶ ମାଝି (୫୦)। ଦୁଇ ଗୁରୁତରଙ୍କୁ ପ୍ରଥମେ ଶେରଗଡ଼ ଡାକ୍ତରଖାନାକୁ ଅଣାଯାଇଥିଲା ସେମାନଙ୍କୁ ପ୍ରାଥମିକ ଚିକିତ୍ସା ପରେ ବ୍ରହ୍ମପୁର ବଡ଼ଡାକ୍ତରଖାନାକୁ ପଠାଯାଇଛି। ସେମାନଙ୍କ ଅବସ୍ଥା ଗୁରୁତର ଥିବା ଡାକ୍ତର ମନ୍ନଥ କୁମାର ବେହେରା କହିଛନ୍ତି।
ନନ୍ଦିଆଙ୍କ କହିବା ଅନୁଯାୟୀ, ସେମାନେ ଆଜି ରାତିରେ ବାର୍ହା ଶିକାର କରିବା ପାଇଁ ବୁଲୁଙ୍କ ଛାତ ଉପରେ ବୋମା ଭିଡୁଥିଲେ। ବୋମା ଉପରେ ହାତ ପଡ଼ିଯିବାରୁ ଏହା ଫାଟିଥିଲା। ସେଠାରେ ଉପସ୍ଥିତ ଥିବା ପ୍ରକାଶ ଏବଂ ନନ୍ଦିଆ ମଧ୍ୟ ଆହତ ହୋଇଥିଲେ।
ପରିବାର ପକ୍ଷରୁ ଦୁଇ ଗୁରୁତରଙ୍କୁ ଶେରଗଡ଼ ଡାକ୍ତରଖାନାକୁ ଅଣାଯାଇଥିଲା। ଶେରଗଡ ଥାନାକୁ ଖବର ଦେବାରୁ ଏସ୍ଆଇ ବିଦେଶୀ ସେଠୀ ପହଞ୍ଚି ଗୁରୁତରଙ୍କୁ ଚିକିତ୍ସା କରାଇବା ସହ ତଦନ୍ତ ଆରମ୍ଭ କରିଥିଲେ। ଆସିକା ଏସ୍ଡିପିଓ ସୂର୍ଯ୍ୟମଣି ପ୍ରଧାନ, ଆସିକା ଥାନାଧିକାରୀ ପ୍ରଶାନ୍ତ କୁମାର ସାହୁ, ଆଇପିଏସ ଅଧିକାରୀ ଜି.ରାଘେବେନ୍ଦ୍ର ପ୍ରମୁଖ ଭୀମପୁରରେ ପହଞ୍ଚିଛନ୍ତି। ସାଇଣ୍ଟିଫିକ୍ ଟିମ୍ ବୋମା ଭିଡ଼ିବା ସ୍ଥଳ ପରିଦର୍ଶନ କରିଛନ୍ତି। ବଡ଼ଗଡ଼ ଥାନାଧିକାରୀ ପ୍ରତାପ ଚନ୍ଦ୍ର ତ୍ରିପାଠୀ ଏକ ମାମଲା ରୁଜୁ କରିବା ସହ ବୁଲଙ୍କ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ଆସିକା ପଠାଇଛନ୍ତି।
