ନୂଆଦିଲ୍ଲୀ,୧୮।୧୨: କେନ୍ଦ୍ର ମନ୍ତ୍ରୀ ଅର୍ଜୁନ ରାମ ମେଘୱାଲ ମଙ୍ଗଳବାର ଲୋକ ସଭାରେ ଏକ ରାଷ୍ଟ୍ର ଏକ ନିର୍ବାଚନ ପାଇଁ ୧୨୯ତମ ସମ୍ବିଧାନ ସଂଶୋଧନ ବିଲ ଆଗତ କରିଛନ୍ତି। ବିଲ୍ ଉପସ୍ଥାପନ ହେବା ପରେ ସଂସଦରେ ପ୍ରବଳ ହଟ୍ଟଗୋଳ ଦେଖିବାକୁ ମିଳିଥିଲା। ଫଳସ୍ବରପ ସରକାରଙ୍କୁ ଏହାକୁ ଜେପିସିକୁ ପଠାଇବାକୁ ପଡିଥିଲା। ତେବେ ଏହି ସଂସଦୀୟ କମିଟିରେ କଂଗ୍ରେସ ଏମପି ପ୍ରିୟଙ୍କା ଗାନ୍ଧୀଙ୍କୁ ବଡ଼ ଦାୟିତ୍ୱ ମିଳିଛି। କଂଗ୍ରେସ ଏହି କମିଟି ପାଇଁ ତାଙ୍କ ନାଁ ସୁପାରିଶ କରିଛି। ଏଥିସହ ଏହି କମିଟିରେ ମନୀଷ ତିୱାରୀ, ରଣଦୀପ ସୁରଜୱାଲା ଏବଂ ସୁଖଦେବ ଭଗତଙ୍କୁ ମିଳିତ ସଂସଦୀୟ କମିଟି (ଜେପିସି) ରେ କଂଗ୍ରେସ ପକ୍ଷରୁ ସାମିଲ କରାଯିବ। ସୂଚନାନୁସାରେ, ଟିଏମସିର କଲ୍ୟାଣ ବାନାର୍ଜୀ ଏବଂ ସାକେତ ଗୋଖଲେ ଏଥିରେ ଅଂଶଗ୍ରହଣ କରିବେ। ସେହିପରି ଶିବସେନା ଶିନ୍ଦେ ଦଳର ଶ୍ରୀକାନ୍ତ ଏଥିରେ ଅଂଶଗ୍ରହଣ କରିବେ।
କହିରଖୁଛୁ କି, ଯଦି ଜେପିସିରେ ଏହି ବିଲ ମଞ୍ଜୁର ହୁଏ ଏବଂ ସଂସଦର ଉଭୟ ଗୃହ ଦ୍ୱାରା ପାରିତ ହୁଏ, ତେବେ ଏହାକୁ ରାଷ୍ଟ୍ରପତି ଦ୍ରୋପଦୀ ମୁର୍ମୁଙ୍କ ଅନୁମୋଦନ ପାଇଁ ପଠାଯିବ। ରାଷ୍ଟ୍ରପତି ଦସ୍ତଖତ କରିବା ମାତ୍ରେ ଏହି ବିଲ ଆଇନରେ ପରିଣତ ହେବ। ଏହା ପରେ ୨୦୨୯ ସୁଦ୍ଧା ସମଗ୍ର ଦେଶରେ ଏକକାଳୀନ ର୍ନିବାଚନ ଅନୁଷ୍ଠିତ ହେବ।
