ଭୁବନେଶ୍ୱର,୨୬।୩(ବ୍ୟୁରୋ): ଘର ଦେବା ଆଳରେ ଜମାକାରୀଙ୍କଠାରୁ କେଶରୀ ଇଷ୍ଟେଟ୍ ସଂସ୍ଥା ସାଢ଼େ ୫କୋଟି ଟଙ୍କା ଠକେଇ ମାମଲାର ବେଆଇନ ଅର୍ଥ କାରବାର ଦିଗକୁ ନେଇ ପ୍ରବର୍ତ୍ତନ ନିର୍ଦ୍ଦେଶାଳୟ(ଇଡି) ତଦନ୍ତ ଜୋରଦାର ଚଳାଇଛି। ଶୁକ୍ରବାର ଇଡି ପକ୍ଷରୁ ସଂସ୍ଥାର ନିର୍ଦ୍ଦେଶକ ଅକ୍ଷୟ କୁମାର ଚୌଧୁରୀଙ୍କ ଘର ସମେତ ୪ଟି ସ୍ଥାନରେ ଚଢ଼ାଉ କରି ବହୁ ଗୁରୁତ୍ୱପୂର୍ଣ୍ଣ କାଗଜ ପତ୍ର ଜବତ କରିଥିବାବେଳେ ଶନିବାର ଅକ୍ଷୟଙ୍କ ଭାଇ ତଥା ସଂସ୍ଥାର ଏମ୍ଡି ଅଜୟ ଚୌଧୁରୀଙ୍କ ଘରୁ ଦେଢ଼ କେଜି ସୁନା ଜବତ କରିଥିବା ବିଶେଷ ସୂତ୍ରରୁ ସୂଚନା ମିଳିଛି, ଯାହାର ଆନୁମାନିକ ମୂଲ୍ୟ କୋଟିଏ ଟଙ୍କା ଉପରେ ହେବ ବୋଲି ଜଣାପଡ଼ିଛି। ଏହାସହ ପୁରୀସ୍ଥିତ ମେ ଫେୟାର ହୋଟେଲରେ ହୋଇଥିବା ଝିଅ ବାହାଘର ସମୟରେ ଜମାକାରୀଙ୍କ ୮୦ ଲକ୍ଷରୁ ଅଧିକ ଟଙ୍କା ଖର୍ଚ୍ଚ କରିଥିବା ଇଡି ଜାଣିବାକୁ ପାଇଛି। ତେଣୁ ଏହାର କାଗଜପତ୍ର ସବୁ ଜବତ କରି ଅଧିକ ଖୋଳତାଡ଼ ଚଳାଇଛି। ଶୁକ୍ରବାର ଫରେଷ୍ଟ ପାର୍କ ପ୍ଲଟ ନଂ.୨୬୧, ସୂର୍ଯ୍ୟନଗର ଏ୬ସ୍ଥିତ ବାସଭବନ, କେଶରୀ ଟକିଜ୍ ନିକଟସ୍ଥ ସଂସ୍ଥାର ଅଫିସ ଓ ଗଞ୍ଜାମ ଜିଲା ବ୍ରହ୍ମପୁରର ଗୋଟିଏ ସ୍ଥାନରେ ଇଡି ପକ୍ଷରୁ ଯାଞ୍ଚ କରାଯାଇ ବହୁ ଗୁରୁତ୍ୱପୂର୍ଣ୍ଣ କାଗଜପତ୍ର ସହ ଟଙ୍କା ଓ ସୁନା ଆଦି ଜବତ କରାଯାଇଥିବା ସୂଚନା ମିଳିଛି।
ସୂଚନା ଅନୁଯାୟୀ, ଏହି ସଂସ୍ଥା ୨୦୦୮ରେ ପୋଖରୀପୁଟ ନିକଟରେ ୩୦ଟି ଡୁପ୍ଲେକ୍ସ ପ୍ରୋଜେକ୍ଚ ଆରମ୍ଭ କରିଥିଲା। ଏଥିପାଇଁ ଲୋକଙ୍କଠାରୁ ୩୦ଲକ୍ଷ ଲେଖାଏ ନେଇଥିଲା। ଏଠାରେ ଘର ନିର୍ମାଣ ବିଳମ୍ବ ହେବାରୁ ଲୋକମାନେ ଟଙ୍କା ଫେରିପାଇବା ପାଇଁ ଦାବି କରିଥିଲେ। ପରେ ସଂସ୍ଥା ୨୦୧୩ରେ ଯଦୁପୁର ମୌଜାରେ ଅନ୍ୟ ଏକ ପ୍ରୋଜେକ୍ଟ ଆରମ୍ଭ କରିଥିଲା। ସେଠାରେ ୪୪ଟି ଡୁପ୍ଲେକ୍ସ ପାଇଁ ଉକ୍ତ ଲୋକଙ୍କ ଠାରୁ ଆଉ କିଛି ଟଙ୍କା ନିଆଯାଇଥିଲା। ଏଭଳିଭାବରେ ୧୮ରୁ ଊର୍ଦ୍ଧ୍ୱ ବ୍ୟକ୍ତିଙ୍କଠାରୁ ଉକ୍ତ ସଂସ୍ଥା ସାଢ଼େ ୫କୋଟି ଟଙ୍କା ନେଇ ଠକେଇ କରିଥିଲା। ଏନେଇ ଜମାକାରୀମାନେ ୨୦୨୦ରେ ଅଭିଯୋଗ କରିବା ପରେ କ୍ରାଇମ୍ବ୍ରାଞ୍ଚର ଅର୍ଥନୈତିକ ଅପରାଧ ଶାଖା (ଇଓଡବ୍ଲ୍ୟୁ) ଏକ ମାମଲା (ନଂ.୬/୨୦୨୦) ରୁଜୁ କରି ତଦନ୍ତ କରିବା ସହ ସେହିବର୍ଷ ସେପ୍ଟେମ୍ବର ୮ରେ ନିର୍ଦ୍ଦେଶକ ଅକ୍ଷୟ କୁମାର ଚୌଧୁରୀଙ୍କୁ ଗିରଫ କରି କୋର୍ଟ ଚାଲାଣ କରିଥିଲା। ଏଥିସହ ଅକ୍ଷୟଙ୍କ ବଡ଼ଭାଇ ତଥା ଏମ୍ଡି ଅଜୟ ଚୌଧୁରୀଙ୍କ ସମେତ ଆଉ କିଛି ଲୋକଙ୍କୁ ମଧ୍ୟ ଇଓଡବ୍ଲ୍ୟୁ ଅଭିଯୁକ୍ତ ଦର୍ଶାଇଥିଲା। ପରେ ଏହି ମାମଲାର ବେଆଇନ ଅର୍ଥ କାରବାର ଦିଗକୁ ନେଇ ଇଡି ଏକ ମାମଲା ରୁଜୁ କରି ତଦନ୍ତ କରୁଛି।
