ଦାରିଙ୍ଗବାଡ଼ି,୧ା୫(ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡ଼ିଠାରେ ମା’ ଠାକୁରାଣୀଙ୍କ ଯାତ୍ରା ୯ମ ଦିନରେ ପହଞ୍ଚିଛି। ଏହି ୯ଦିନ ଧରି ଦାରିଙ୍ଗବାଡ଼ିି ଉତ୍ସବମୁଖର ହୋଇପଡ଼ିଥିବା ବେଳେ ପ୍ରତିଦିନ ମା’ଙ୍କ ଦର୍ଶନ ପାଇଁ ଶ୍ରଦ୍ଧାଳୁଙ୍କ ଭିଡ଼ ଦେଖିବାକୁ ମିଳିଛି। ଅଷ୍ଟମ ଦିନରେ ମା’ ଠାକୁରାଣୀ ଲୋହାରସାହି ଘଟ ପରିକ୍ରମାରେ ଯାଇ ସେଠାରେ ସାହି ବାସିନ୍ଦାଙ୍କୁ ଦର୍ଶନ ଦେଇଥଲେ ଓ ସାହିବାସିନ୍ଦା ବଡ଼ ଧୂମ୍ଧାମରେ ପୂଜାର୍ଚ୍ଚନା କରି ଯଜ୍ଞ ପୂଜାପାଠ କରି ମା’ଙ୍କୁ ବିଦାୟ ଦେଇଥିଲେ। ସେହିପରି ନବମ ଦିନରେ ଗୌଡ଼ ସାହି ବାସିନ୍ଦା ବିରାଟ ପଟୁଆରରେ ଆସି ମା’ଙ୍କ ବାପଘର ତଥା ଅସ୍ଥାୟୀ ମନ୍ଦିରରେ ଆସି ପହଞ୍ଚିଥିଲେ। ସେଠାରେ ପହଞ୍ଚି ମା’ବୁଢ଼ୀ ଠାକୁରାଣୀଙ୍କୁ ପୂଜାର୍ଚ୍ଚନା ସହ ଆଳତି କରାଯାଇଥିଲା। ଗୌଡ଼ସାହି ପକ୍ଷରୁ ଗଜା ମୁହାଁ ଓ ପଣା ହାଣ୍ଡି ନେଇ ମା’ଠାକୁରାଣୀଙ୍କୁ ନିମନ୍ତ୍ରଣ କରାଯାଇଥିଲା। ବିରାଟ ପଟୁଆରରେ ସାହି ବାସିନ୍ଦା ଗୌଡ଼ ସାହିରୁ ବାହାରିବା ବେଳେ ଚଇତି ଘୋଡା ନୃତ୍ୟ ସମେତ ଘଣ୍ଟ, ବାଦ୍ୟ, ସିଂଘ ବାଦ୍ୟ, ଦଣ୍ଡ ବାଦ୍ୟ, ଢୋଲ,ଦଣ୍ଡ ପତାକା ଆଦି ଶୋଭାଯାତ୍ରାରେ ଦର୍ଶକଙ୍କୁ ଆକର୍ଷିତ କରିଥିଲା। ଗୌଡ଼ ସାହିର କର୍ମକର୍ତ୍ତା ତଥା ଠାକୁରାଣୀ ଯାତ୍ରାର ମୁଖ୍ୟ ପୂଜକ ବୁଲୁ ତ୍ରିପାଠୀଙ୍କ ସମେତ ଚନ୍ଦନ ତ୍ରିପାଠୀ, ସାଲୁ ଗୌଡ଼, ଲେଙ୍କା ନାୟକ, ଯୁଧିଷ୍ଠିର ପ୍ରଧାନ, ଦିଲୀପ ବେଣିଆ, ଅଜିତ ସାହୁ, ଅବକାଶ ବେହେରା, ଅନିଲ ସାହୁ, ସୁଶୀଳ ସାହୁ ପ୍ରମୁଖ କାର୍ଯ୍ୟକ୍ରମ ପରିଚାଳନା କରିଥିଲେ। ସେହିପରି ବିଳମ୍ବିତ ରାତିରେ ଗ୍ରୀନବାଡ଼ି ବାସିନ୍ଦାଙ୍କ ପକ୍ଷରୁ ସ୍ଥାନୀୟ କଳାକାରମାନେ ମୁକ୍ତ ମଞ୍ଚରେ ନାଟକ ପ୍ରତିଯୋଗିତାରେ ‘ଲୁହରେ ଲେଖା ମୋ କପାଳ ରେଖା’ ନାଟକ ପରିବେଷଣ କରିଥିଲେ। ଏହି ସମସ୍ତ କାର୍ଯ୍ୟକ୍ରମକୁ ମା’ ଠାକୁରାଣୀ ପୂଜା କମିଟି ପକ୍ଷରୁ ପରିଚାଳନା କରାଯାଇଥିଲା।
