ମୁମ୍ବାଇ,୯।୯: ଆଗକୁ ଆସୁଥିବା ଟି୨୦ ବିଶ୍ୱକପ୍ ଲାଗି ପୂର୍ବତନ ଅଧିନାୟକ ମହେନ୍ଦ୍ର ସିଂ ଧୋନୀଙ୍କୁ ଘୋଷିତ ଭାରତୀୟ ଦଳର ମେଣ୍ଟର ଭାବେ ନିଯୁକ୍ତ କରାଯାଇଛି। ଧୋନୀଙ୍କ ନିଯୁକ୍ତି ଉପରେ ପ୍ରଶ୍ନ ଉଠାଇଛନ୍ତି ପୂର୍ବତନ ମଧ୍ୟପ୍ରଦେଶ କ୍ରିକେଟ ଆସୋସିଏଶନର ଆଜୀବନ ସଦସ୍ୟ ସଞ୍ଜୀବ ଗୁପ୍ତା। ପୂର୍ବରୁ ବହୁ କ୍ରିକେଟର ଓ ପ୍ରଶାସକଙ୍କ ବିରୋଧରେ କନଫ୍ଲିକ୍ଟ ଅଫ୍ ଇଣ୍ଟରେଷ୍ଟ (ସ୍ବାର୍ଥ ଅନ୍ତର୍ନିହିତ ଦ୍ୱନ୍ଦ୍ୱ) ଅଭିଯୋଗ ଆଣିଥିବା ସଞ୍ଜୀବ ଏ ସମ୍ପର୍କରେ ବିସିସିଆଇର ବୋର୍ଡ ମେମ୍ବରଙ୍କୁ ଏକ ପତ୍ର ପଠାଇଛନ୍ତି। ଧୋନୀଙ୍କ ନିଯୁକ୍ତି କନଫ୍ଲିକ୍ଟ ଅଫ୍ ଇଣ୍ଟରେଷ୍ଟ ନିୟମ ଭଙ୍ଗ କରୁଛି, ଏହି ନିୟମ ଅନୁସାରେ କୌଣସି ବ୍ୟକ୍ତି ଏକାଥରେ ଦୁଇଟି ପଦବିରେ ରହିପାରିବେ ନାହିଁ। ଧୋନୀ ଏବେ ଆଇପିଏଲ ଫ୍ରାଞ୍ଚାଇଜ ଚେନ୍ନାଇ ସୁପର କିଙ୍ଗ୍ସ (ସିଏସ୍କେ)ର ଅଧିନାୟକ ଅଛନ୍ତି।
ବିସିସିଆଇ ସଭାପତି ସୌରଭ ଗାଙ୍ଗୁଲି ଓ ଜୟ ଶାହଙ୍କ ସମେତ ଅନ୍ୟ ବୋର୍ଡ ମେମ୍ବରଙ୍କୁ ସଞ୍ଜୀବ ପତ୍ର ଲେଖିଛନ୍ତି। ବିସିସିଆଇ ସମ୍ବିଧାନର ଆଇନ ଅନୁସାରେ କୌଣସି ବ୍ୟକ୍ତି ଦୁଇଟି ପଦବିରେ ରହିପାରିବେ ନାହିଁ। ଏବେ ବିସିସିଆଇ ଏହାର ଆଇନଗତ ଦଳର ସହ ଆଲୋଚନା କରିବ ବୋଲି ବିସିସିଆଇର ଜଣେ ସଦସ୍ୟ ନାମ ନ କହିବା ସର୍ତ୍ତରେ କହିଛନ୍ତି।
ଭାରତୀୟ କ୍ରିକେଟ ଇତିହାସର ଅନ୍ୟତମ ସଫଳ ଅଧିନାୟକ ଧୋନୀଙ୍କ ଅଭିଜ୍ଞତାକୁ ବ୍ୟବହାର କରିବା ପାଇଁ ଟି୨୦ ବିଶ୍ୱକପ୍ ପାଇଁ ଟିମ୍ ଇଣ୍ଡିଆର ମେଣ୍ଟର ଦାୟିତ୍ୱ ଦିଆଯାଇଛି। ୨୦୨୦ରେ ଅନ୍ତର୍ଜାତୀୟ ସ୍ତରରୁ ଅବସର ନେଇଥିବା ଧୋନୀ ଭାରତ ପାଇଁ ୯୦ ଟେଷ୍ଟ, ୩୫୦ ଦିନିକିଆ ଓ ୯୮ ଟି୨୦ ମ୍ୟାଚ୍ ଖେଳିଛନ୍ତି।
