ଲକ୍ଷ୍ନୌ,୩।୧୨: ଉତ୍ତରପ୍ରଦେଶର ମୌନପୁରୀ ତହସିଲରେ ଏକ ଅଜବ ମାମଲା ସାମ୍ନାକୁ ଆସିଛି। ଏଠାରେ ଜଣେ ବୃଦ୍ଧ ମହିଳା ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନାମରେ ନିଜର ସମସ୍ତ ଜମି କରିବାକୁ ତହସିଲରେ ପହଞ୍ଚିଥିଲେ। ଏହା ଦେଖି ଉପସ୍ଥିତ ଲୋକେ ମଧ୍ୟ ଆଶ୍ଚର୍ଯ୍ୟ ହୋଇଯାଇଥିଲେ। ପ୍ରଧାନମନ୍ତ୍ରୀ ମୋଦିଙ୍କ ନାମରେ ସେ ତାଙ୍କର ସମସ୍ତ ଜମି କରିବେ ବୋଲି ମହିଳା କହିଛନ୍ତି। ଏହା ପଛର କାରଣ ଭାବପ୍ରବଣତା ଅଟେ। ବିକାଶ ବ୍ଲକ କିଶନିର ଚିତ୍ରୟାନ ଗ୍ରାମରୁ ଆସିଥିବା ପୁରନ ଲାଲଙ୍କ ସ୍ତ୍ରୀ ୮୫ ବର୍ଷୀୟା ବିଟନ ଦେବୀ ତହସିଲର ଓକିଲ କୃଷ୍ଣ ପ୍ରତାପ ସିଂଙ୍କ ନିକଟରେ ପହଞ୍ଚିଥିଲେ। ସେ ଓକିଲଙ୍କୁ କହିଛନ୍ତି ଯେ, ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନାମରେ ତାଙ୍କୁ ୧୨ ବିଘା ଜମି ଦେବାକୁ ଚାହୁଁଛନ୍ତି। ଓକିଲମାନେ ତାଙ୍କ ବୁଝାଇବାକୁ ଚେଷ୍ଟା କରିଥିଲେ ମଧ୍ୟ ସେ ନିଜ ଜିଦ୍ରେ ଅଡି ବସିଥିଲେ। ସେ କହିଥିଲେ ମୋ ସ୍ବାମୀଙ୍କ ମୃତ୍ୟୁ ହୋଇଯାଇଛି, ଦୁଇ ପୁଅ ମୋ ଯତ୍ନ ନେଉନାହାନ୍ତି। ସରକାରଙ୍କ ପକ୍ଷରୁ ମିଳୁଥିବା ପେନଶନ୍ରେ ଚଳୁଛି। ତେଣୁ ମୋ ନାଁରେ ଥିବା ଜମିବାଡି ମୁଁ ପ୍ରଧାନମନ୍ତ୍ରୀଙ୍କ ନାଁରେ କରିବାକୁ ଚାହୁଁଛି। ଓକିଲମାନେ ମହିଳାଙ୍କ କଥା ଶୁଣି ବୁଝାବାକୁ ଚେଷ୍ଟା କରିଥିଲେ। ସେ ନ ଶୁଣିବାରୁ ଉପଜିଲାପାଳଙ୍କ ଏନେଇ କଥା ହେବେ ବୋଲି ମହିଳାଙ୍କୁ ଓକିଲମାନେ ଆଶ୍ୱାସନା ଦେଇ ଘରକୁ ପଠାଇଥିଲେ। କିନ୍ତୁ ଦୁଇଦିନ ମହିଳା ଜଣଙ୍କୁ ପୁଣି ଥରେ ତହସିଲ ଆସି ନିଜ କଥା ଦୋହରାଇଥିଲେ।
