ଭୋଗରାଇ, ୧୭ା୯(ପ୍ରଦୀପ ଦାସ)ତାମିଲନାଡୁ ରାଜ୍ୟର ଚେନ୍ନାଇରୁ ନିଖୋଜ ହୋଇଯାଇଥିବା ବାଲେଶ୍ୱର ଜିଲା ଭୋଗରାଇ ବ୍ଲକ ଫୁଲବାଣୀ ଗ୍ରାମର ସୁକୁମାର ଦଳେଇ ନାମକ ବୃଦ୍ଧ ଦୀର୍ଘ ୧୨ବର୍ଷ ପରେ ଘରକୁ ଫେରିଛନ୍ତି। ନିଖୋଜ ବେଳେ ତାଙ୍କୁ ୪୫ ବର୍ଷ ହୋଇଥିଲ। କୋଲକାତାର ଏକ ସ୍ବେଚ୍ଛାସେବୀ ଅନୁଷ୍ଠାନ ତାଙ୍କୁ ଉଦ୍ଧାର କରି ଫେସ୍ବୁକ ମାଧ୍ୟମରେ ପୋଷ୍ଟ କରିବା ପରେ ପରିବାର ଲୋକେ ଚିହ୍ନଟ କରି ତାଙ୍କୁ ସେଠାରୁ ଆଣିଛନ୍ତି। ଦିନେ ନା ଦିନେ ସେ ଫେରି ଆସିବେ ବୋଲି ପରିବାର ଲୋକେ ଆଶା ବାନ୍ଧିଥିଲେ, ଯାହା ଆଜି ସଫଳ ହୋଇଛି।
ସ୍ବାମୀ ଫେରିଆସିବା ଆଶାରେ ଭାଗ୍ୟକୁ ଆଦରି ରହିଥିଲେ ସ୍ତ୍ରୀ ଚିନା। ପରଘରେ ମୂଲ ଲାଗି ପରିବାର ପ୍ରତିପୋଷଣ କରିବା ସହିତ ଛୋଟ ଛୋଟ ଦୁଇ ପୁଅ ବିଶଜିତ ଓ ଧନଞ୍ଜୟଙ୍କୁ ପାଠ ପଢାଇ ମଣିଷ କରିଛନ୍ତି। ବଡ ଝିଅକୁ ବିବାହ ମଧ୍ୟ ଦେଇଛନ୍ତି। ବହୁ ଦେବାଦେବୀଙ୍କୁ ମାନସିକ କରି ସୁକୁମାରଙ୍କ ଫେରିବା ବାଟକୁ ଚାହିଁ ବସିଥିଲେ ପୁରା ପରିବାର। ତେବେ ଦୀର୍ଘ ୧୨ ବର୍ଷର ପ୍ରତୀକ୍ଷା ପରେ ସୋସିଆଲ ମିଡିଆରୁ ବାପାଙ୍କୁ ଖୋଜି ପାଇଛନ୍ତି ଦୁଇ ପୁଅ। ମାନସିକ ଭାରସାମ୍ୟ ହରାଇ ସୁକୁମାର କାହାକୁ ଚିହ୍ନି ପାରୁ ନ ଥିଲେ ମଧ୍ୟ ବାପାଙ୍କୁ ଫେରି ପାଇ ଦୁଇ ପୁଅ ଓ ଝିଅ ଆତ୍ମବିଭୋର ହୋଇପଡିଛନ୍ତି। ଅନ୍ୟପକ୍ଷରେ ସ୍ବାମୀଙ୍କୁ ପାଖରେ ପାଇ ସ୍ତ୍ରୀ ଚିନା ନିଜର ସବୁ ଦୁଃଖକଷ୍ଟକୁ ଭୁଲି ତାଙ୍କ ସେବାରେ ଲାଗିପଡିଛନ୍ତି। ପୂର୍ବରୁ ସୋସିଆଲ ମିଡ଼ିଆ ଫେସବୁକରୁ ସୁକୁମାର କୋଲକାତାରେ ଥିବା ନେଇ ଦୁଇ ପୁଅ ଜାଣିବାକୁ ପାଇଥିଲେ। ସୁକୁମାରଙ୍କ ଫଟୋ ଦେଖି ଚିନା ତାଙ୍କ ସ୍ବାମୀଙ୍କୁ ଚିହ୍ନଟ କରିଥିଲେ। କୋଲକାତାର ସ୍ବେଚ୍ଛାସେବୀ ସଙ୍ଗଠନ ତାଙ୍କୁ ରାସ୍ତାରୁ ଉଦ୍ଧାର କରି ସମସ୍ତ ଚିକିତ୍ସା ସହିତ ସେବା ଯତ୍ନ ଯୋଗାଇ ଦେଇଥିଲେ। ତାଙ୍କୁ ପଚରାଉଚୁରା କରିବା ବେଳେ ସେ ତାଙ୍କର ଠିକଣା ପ୍ରକାଶ କରିପାରି ନ ଥିଲେ ମଧ୍ୟ ଦୀଘା, ବାଲେଶ୍ୱର, ଜଳେଶ୍ୱର, ଭୋଗରାଇ, ଚନ୍ଦନେଶ୍ୱର ଆଦି ସ୍ଥାନର ନାମ କହିଥିଲେ। ପରେ ସମ୍ପୃକ୍ତ ସ୍ବେଚ୍ଛସେବୀ ସଙ୍ଗଠନ ସୁକୁମାରଙ୍କ ଫଟୋ ସହିତ ବିବରଣୀ ସୋସିଆଲ ମିଡ଼ିଆ ଫେସବୁକରେ ପୋଷ୍ଟ କରିଥିଲେ। ଏଥିରୁ ପରିବାର ଲୋକେ ସୁକୁମାରଙ୍କୁ ଚିହ୍ନଟ କରି ସମ୍ପୃକ୍ତ ସ୍ବେଚ୍ଛାସେବୀ ସଙ୍ଗଠନ ସହିତ ଫୋନରେ ଯୋଗାଯୋଗ ପରେ କୋଲକାତା ଯାଇ ସେଠାରୁ ତାଙ୍କୁ ଘରକୁ ନେଇ ଆସିଛନ୍ତି। ସୁକୁମାର ଗାଁରେ ପହଞ୍ଚିବା ପରେ ତାଙ୍କୁ ଦେଖିବା ପାଇଁ ଲୋକଙ୍କ ଗହଳି ଲାଗିଥିଲା। ସେ କାହାକୁ ଚିହ୍ନି ପାରୁ ନ ଥିଲା ବେଳେ ଇଆଡୁ ସେଆଡୁ ବିଭିନ୍ନ ପ୍ରକାର କଥା କହୁଛନ୍ତି। ଉପଯୁକ୍ତ ଚିକିତ୍ସା ପାଇଁ ପରିବାର ଲୋକେ ଶୁକ୍ରବାର ତାଙ୍କୁ ବାଲେଶ୍ୱର ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଛନ୍ତି।