କାକଟପୁର,୩।୯(ଡି.ଏନ୍.ଏ.): ଗୁଜରାଟର ସୁରଟରେ ଜଣେ ଓଡ଼ିଆ ଦାଦନ ଶ୍ରମିକଙ୍କୁ କେତେଜଣ ଯୁବକ ଏକ ଘରେ ରଖି ନୃଶଂସ ଭାବେ ମାଡ଼ ମାରୁଥିବାର ଅଭିଯୋଗ ହେଉଛି। ଆକ୍ରମଣ ସମୟର ଏକ ଭିଡିଓ କିଛିଦିନ ହେବ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ତେବେ ଆକ୍ରମଣର ଶିକାର ହୋଇଥିବା ଯୁବକ ଜଣକ ପୁରୀ ଜିଲା କାକଟପୁର ବ୍ଲକ ଅଧୀନ ଶ୍ରୀରାମପୁର ଗ୍ରାମର ମୁନ୍ନା ଦାସ। ଆକ୍ରମଣ ସମୟର ଭିଡିଓ ମୁନ୍ନାଙ୍କ ପରିବାର ଲୋକ ଦେଖିବା ପରେ ପୁଅଙ୍କୁ ସୁରଟରୁ ଉଦ୍ଧାର କରିବା ପାଇଁ ପ୍ରଶାସନ ନିକଟରେ ଅନୁରୋଧ କରିଛନ୍ତି। ଏଥିସହ ଯେଉଁ ଠିକାଦାର ତାଙ୍କ ପୁଅଙ୍କୁ କାମ ଦେବା ନଁାରେ ସୁରଟ ନେଇଥିଲେ ତାଙ୍କ ବିରୋଧରେ ଅଭିଯୋଗ ଆଣିଛନ୍ତି। ଭିଡିଓଟିରେ ଦେଖିବାକୁ ମିଳିଛି ଯେ, ଜଣେ ଯୁବକ ମୋବାଇଲ ଚୋରି କରିଥିବା ନେଇ ୫/୬ଜଣ ଯୁବକ ସଂଘବଦ୍ଧ ହୋଇ ମାଡ଼ ମାରୁଛନ୍ତି। କିନ୍ତୁ ଯୁବକ ମୋବାଇଲ ଚୋରି କରି ନ ଥିବା ନେଇ ବାରମ୍ବାର କହିବା ସତ୍ତ୍ୱେ ମାଡ଼ ମରାଯାଉଛି।
ସୂଚନା ମୁତାବକ, କାକଟପୁର ବାଜପୁର ଗ୍ରାମର ଉକ୍ତ ଠିକାଦାର ୩ବର୍ଷ ପୂର୍ବେ ମୁନ୍ନାଙ୍କ ଘରକୁ ଆସି ସୁରଟରେ ଏକ କମ୍ପାନୀରେ ତାଙ୍କୁ ରଖେଇଦେବେ ବୋଲି କହିଥିଲେ। ମୁନାଙ୍କ ପରିବାର ଲୋକଙ୍କ ଅନିଚ୍ଛା ସତ୍ତ୍ୱେ, ଠିକାଦାର ମୁନ୍ନାଙ୍କୁ ଭଲ କାମରେ ରଖିବେ ଓ ସେଠାରେ ଭଲରେ ସେ ରହିବ ବୋଲି କହି ନେଇଥିଲେ। କିନ୍ତୁ ମୁନ୍ନା ଯିବାର ୩ବର୍ଷ ହେବା ସତ୍ତ୍ୱେ ଆଉ ଘରକୁ ଫେରି ନାହାନ୍ତି। କରୋନାର ଦୁଇ ବର୍ଷ ମଧ୍ୟରେ ବି ଛାଡ଼ି ନ ଥିଲେ ଠିକାଦାର। ସେଠାରେ ତାଙ୍କୁ ରଖି ଜୋର ଜବରଦସ୍ତି ଅତ୍ୟାଚାର ସହ କାମ କରାଉଥିଲେ। ଦରମା ମଧ୍ୟ ଠିକ ଭାବେ ଦିଅନ୍ତି ନାହିଁ ବୋଲ ପରିବାର ଲୋକ କହୁଛନ୍ତି। ଏପରିକି ମୁନା ଯେବେ ତାଙ୍କ ପାରିଶ୍ରମିକ ମାଗନ୍ତି, ଠିକାଦାର ମିଛ ଘଟଣାରେ ତାଙ୍କୁ ଅନ୍ୟ ଯୁବକଙ୍କ ଦ୍ୱାରା ବିଭିନ୍ନ ମିଛ ଆରୋପ ଲଗାଇ ମାରପିଟ କରନ୍ତି। ତେଣୁ ପରିବାର ଲୋକ ପୁଅକୁ ଉଦ୍ଧାର କରିବା ପାଇଁ କାକଟପୁର ଥାନାର ଦ୍ୱାରସ୍ଥ ହୋଇଛନ୍ତି। ଏହି ଘଟଣାର ତଦନ୍ତ କରାଯାଇ ପୁଅଙ୍କୁ ସେଠାରୁ ଉଦ୍ଧାର କରି ଓଡ଼ିଶା ଫେରାଇ ଆଣିବାକୁ ତାଙ୍କ ପରିବାର ଓ ଗ୍ରାମବାସୀ ପ୍ରଶାସନକୁ ଆକୁଳ ନିବେଦନ କରିଛନ୍ତି।
