ଭୁବନେଶ୍ୱର,୫।୩(ସତ୍ୟଜିତ୍ ରାଉତ):ମାଓବାଦୀଙ୍କ ବିରୋଧରେ ଦୃଢ଼ ଅଭିଯାନ ଜାରି ରହିଛି। ଏହି ଦିଗରେ ରାଜ୍ୟ ସରକାର ପୂର୍ଣ୍ଣ ସମର୍ଥନ ଦେଉଛନ୍ତି। ଆଗାମୀ ଦୁଇ ବର୍ଷ ମଧ୍ୟରେ ଓଡିଶା ମାଓବାଦୀ ମୁକ୍ତ ହେବ ବୋଲି ସୀମା ସୁରକ୍ଷା ବଳ (ବିଏସ୍ଏଫ୍) ଓଡ଼ିଶା ଡିଆଇଜି ଧୀରେନ୍ଦ୍ର କୁମାର କହିଛନ୍ତି। ଭୁବନେଶ୍ୱର ଗଜପତି ନଗରସ୍ଥିତ ରାଜ୍ୟ ମୁଖ୍ୟାଳୟରେ ସୋମବାର ଆୟୋଜିତ ଖବରଦାତା ସମ୍ମିଳନୀରେ ଡିଆଇଜି କହିଲେ, ପୂର୍ବରୁ ମାଲକାନଗିରି, କୋରାପୁଟ, ରାୟଗଡା, ନବରଙ୍ଗପୁରରେ ମାଓବାଦୀ ହିଂସା ଦେଖାଯାଉଥିଲା। ହେଲେ ଏବେ ଏସବୁ ଅଞ୍ଚଳରେ ମାଓବାଦୀ ହିଂସା ସମ୍ପୂର୍ଣ୍ଣ କମିଯାଇଛି। ବର୍ତ୍ତମାନ କେବଳ କନ୍ଧମାଳ, କଳାହାଣ୍ଡି, ବୌଦ୍ଧରେ ମାଓବାଦୀ ଚ୍ୟାଲେଞ୍ଜ୍ ରହିଛି। ନିକଟରେ କନ୍ଧମାଳରେ ବିଏସ୍ଏଫ୍ର ଦୁଇ ବାଟାଲିଅନ୍ ପହଞ୍ଚତ୍ ଅପରେଶନ୍ ଆରମ୍ଭ କରିଛି। ମାଲକାନଗିରି, କୋରାପୁଟ, ନବରଙ୍ଗପୁର, ରାୟଗଡାରେ ମାଓବାଦୀଙ୍କ ବିରୋଧରେ ଯେଉଁ ପଦକ୍ଷେପ ଗ୍ରହଣ କରାଯାଇଥିଲା ଏବେ କନ୍ଧମାଳ, କଳାହାଣ୍ଡି, ବୌଦ୍ଧରେ ମଧ୍ୟ ସେପରି ଅପରେଶନ ଜାରି ରହିବ। କନ୍ଧମାଳ ଓ ବୌଦ୍ଧର ଆନ୍ତଃଜିଲା ସୀମାରେଖା ବଡାପାଜୁଠାରେ ନୂଆ ସିଓବି ସ୍ଥାପନା କରାଯାଇଛି। ମାଓବାଦୀ ଗଡରେ ସଫଳତାର ସହ ଅପରେଶନ କରାଯାଇ ବଡାପାଜୁ ସିଓବି କ୍ୟାମ୍ପ କରାଯାଇଛି। ଆଗାମୀ ଦିନରେ ବୌଦ୍ଧରେ ମଧ୍ୟ ଆଉ ଏକ କ୍ୟାମ୍ପ୍ ସ୍ଥାପନ କରାଯିବ। କେନ୍ଦ୍ର ଓ ରାଜ୍ୟ ସରକାରଙ୍କ ବିକାଶମୂଳକ ଯୋଜନାକୁ ଉପାନ୍ତ ଅଞ୍ଚଳରେ ପହଞ୍ଚାଇବାକୁ ବିଏସ୍ଏଫ୍ ପକ୍ଷରୁ ପୂର୍ଣ୍ଣ ପ୍ରୟାସ ଜାରି ରହିଛି। ଉପାନ୍ତ ଅଞ୍ଚଳରେ ବାସିନ୍ଦାଙ୍କୁ ମୁଖ୍ୟସ୍ରୋତକୁ ଆଣିବା ସହ ରୋଜଗାର ଦେବା ଲକ୍ଷ୍ୟ ରହିଛି। ଛତିଶଗଡ଼ ଓ ଆନ୍ଧ୍ରପ୍ରଦେଶ ସୀମା ପର୍ଯ୍ୟନ୍ତ ମଧ୍ୟ ସିଓବି ସ୍ଥାପନ ହୋଇଛି। ପୂର୍ବରୁ ସାଧାରଣ ନିର୍ବାଚନ ଓ ପଞ୍ଚାୟତ ନିର୍ବାଚନକୁ ବିଏସ୍ଏଫ୍ ଭଲ ଭାବେ ପରିଚାଳନା କରିଛି। ଆଗକୁ ଆସୁଥିବା ନିର୍ବାଚନକୁ ବିଏସ୍ଏଫ୍ ମୁକ୍ତ ଏବଂ ଅବାଧ କରିବା ଉପରେ ଗୁରୁତ୍ୱ ଦେବ ବୋଲି ଡିଆଇଜି କହିଛନ୍ତି। ଏହି ଖବରଦାତା ସମ୍ମିଳନୀରେ ଡିଆଇଜିଙ୍କ ସହ ଡିଆଇଜି (ପିଆର୍ଓ) କମାଣ୍ଡାଣ୍ଟ୍ ସୁମନ କୁମାର, ନବୀନ କୁମାର, ପି. ଡି. ଗୁପ୍ତା, ଡେପୁଟି କମାଣ୍ଡାଣ୍ଟ୍ ନରେନ୍ଦ୍ର କୁମାର ସିଂଙ୍କ ସହ ବିଏସ୍ଏଫ୍ର ଅନ୍ୟ ଅଧିକାରୀମାନେ ଉପସ୍ଥିତ ଥିଲେ।
