ଭୁବନେଶ୍ୱର,୧୫।୪: ଲୋକପ୍ରିୟତାର ପରୀକ୍ଷା ହେବ ଉପ ନିର୍ବାଚନ। ଛୋଟ ନିର୍ବାଚନ ହେଲେ ଦେଖେଇବ ବଡ଼ ପ୍ରଭାବ। ଆଗକୁ ରାଜ୍ୟର ପ୍ରମୁଖ ୩ଦଳ ବିଜେଡି ଭାଜପା ଓ କଂଗ୍ରେସ ପାଇଁ ବଡ଼ ଆହ୍ବାନ ହେବାକୁ ପଞ୍ଚାୟତ ଉପ ନିର୍ବାଚନ। ଉପ ନିର୍ବାଚନ ପାଇଁ ନିର୍ବାଚନ କମିଶନର ପ୍ରକ୍ରିୟା ଆରମ୍ଭ କରିଥିବାବେଳେ ୩ଦଳ ମଧ୍ୟ ଏନେଇ ଅଣ୍ଟା ଭିଡିଛନ୍ତି।
ପଞ୍ଚାୟତରେ ପଦ ଖାଲି ପଡିଲେ ୬ମାସରେ ନିର୍ବାଚନ ହେବା କଥା ହେଲେ ଏହା ଏଯାଏ ଖାଲି ପଡିଛି। କିନ୍ତୁ ପ୍ରକ୍ରିୟା ଆରମ୍ଭ ହୋଇଛି। ତେବେ ପ୍ରଥମ ଥର ସରକାରକୁ ଆସିବା ପରେ ଭାଜପା ପାଇଁ ଏହି ନିର୍ବାଚନ ହେବ ବଡ଼ ପରୀକ୍ଷା। ଏହି ୧୦ମାସର ସରକାରର କାମ ଉପରେ ଜନତା କେତେ ସନ୍ତୁଷ୍ଟ ତାହା ଏହି ଉପ ନିର୍ବାଚନରେ ଜଣାପଡିବ। ସୁଭଦ୍ରା ଯୋଜନା, ଧାନର ଏମଏସପି ବୃଦ୍ଧି, ବୟସ୍କଙ୍କୁ ଭତ୍ତା ଓ ଶ୍ରୀମନ୍ଦିର ଚାରିଦ୍ୱାର ଖୋଲିବା ପ୍ରସଙ୍ଗକୁ ନେଇ ଭାଜପା ଭୋଟରଙ୍କ ପାଖକୁ ଯିବ।
ସେହିପରି ପିସିସି ସଭାପତି ଭକ୍ତ ଦାସଙ୍କ ପାଇଁ ଏହି ନିର୍ବାଚନ ଅଗ୍ନିପରୀକ୍ଷା ରହିବ। ସେହିଭଳି ବିଜେଡି ମଧ୍ୟ ବିରୋଧୀ ସ୍ଥିତି ଜାହିର କରିବା ପାଇଁ ଜୋର ଲଗାଇବ। ୨୪ବର୍ଷ କ୍ଷମତାରେ ରହିବା ପରେ ନିକଟରେ ବିଜେଡିରେ ଏବେ ଦଳୀୟ କନ୍ଦଳ ତେଜିଛି। ଓ୍ବକଅଫ ନେଇ ବିବାଦ ଘନେଇଛି। ତେବେ ପଞ୍ଚାୟତ ଉପ ନିର୍ବାଚନରେ ଦଳକୁ ଗଡ ରକ୍ଷା କରିବା ପାଇଁ ବଡ଼ ଚ୍ୟାଲେଞ୍ଜ ହୋଇପାରେ। ସେହିଭଳି ଭକ୍ତଙ୍କ ନେତୃତ୍ୱରେ ଦଳ ଏବେ ମଇଦାନକୁ ଓହ୍ଲାଇବ। ଦଳର ସବୁ ବିଧାୟକ ବିଧାନସଭାରୁ ସସପେଣ୍ଡ ହେବା ଓ ମାର୍ଚ୍ଚ ୨୭ରେ ଆନ୍ଦୋଳନ ପରେ ଦଳର କର୍ମୀଙ୍କୁ ଜୋସ୍ ମିଳିଛି।
ଏନେଇ ଭକ୍ତ କହିଛନ୍ତି, ଯେଉଁଠି ନିର୍ବାଚନୀ ଚିହ୍ନ ଉପରେ ସିଧାସଳଖ ନିର୍ବାଚନ ହେବ ଆମେ ସେଠାରେ ପ୍ରତିଦ୍ୱନ୍ଦିତା କରିବୁ। ଏନେଇ ରଣନୀତି କ’ଣ କରିବୁ ଗୋଟିଏ କମିଟି ଗଠନ କରିବୁ।
ଓଡ଼ିଶାରେ ,୧୩୪ଟି ଖାଲି ପଦ ପୂରଣ ପାଇଁ ଉପନିର୍ବାଚନ ହେବ। ଏହି ପଦଗୁଡ଼ିକ ମଧ୍ୟରେ ୫ଟି ଜିଲା ପରିଷଦ ସଦସ୍ୟ, ୪୧ଟି ପଞ୍ଚାୟତ ସମିତି ସଦସ୍ୟ, ୪୫ଟି ସରପଞ୍ଚ ଏବଂ ୨୭୨ଟି ୱାର୍ଡ ସଭ୍ୟ ପଦ ରହିଛି। ଏହା ସହିତ, ୭୭୧ଟି ୱାର୍ଡରେ ପୂର୍ବରୁ ସଂରକ୍ଷିତ ବର୍ଗ ପାଇଁ ନିର୍ବାଚନ ହୋଇପାରି ନଥିଲା, କାରଣ ସେଠାରେ ପ୍ରାର୍ଥୀ ଉପଲବ୍ଧ ନଥିଲେ। ଏବେ ଏହି ୱାର୍ଡଗୁଡ଼ିକୁ ଅଣସଂରକ୍ଷିତ ଘୋଷଣା କରାଯାଇ ନୂଆ ର୍ନିବାଚନ କରାଯିବ।
ଏହି ଉପନିର୍ବାଚନ ପ୍ରକ୍ରିୟା ଏପ୍ରିଲ ୧୧, ୨୦୨୫ରୁ ଆରମ୍ଭ ହୋଇଛି। ଏସଇସି ନିର୍ଦ୍ଦେଶ ଅନୁଯାୟୀ, ନିର୍ବାଚନ ସୁରୁଖୁରୁରେ ସମ୍ପନ୍ନ କରିବା ପାଇଁ ଜିଲା ପ୍ରଶାସନକୁ ନିର୍ଦ୍ଦେଶ ଦିଆଯାଇଛି। ଏହା ସ୍ଥାନୀୟ ପ୍ରଶାସନକୁ ସୁଦୃଢ଼ କରିବା ଏବଂ ଗ୍ରାମ୍ୟ ଉନ୍ନୟନ କାର୍ଯ୍ୟକୁ ତ୍ୱରାନୱିତ କରିବା ଲାଗି ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ବୋଲି ବିବେଚନା କରାଯାଉଛି।
