ଭୋଗରାଇ, ୧୯ା୬(ପ୍ରଦୀପ ଦାସ): ଅଭିଯୁକ୍ତ କିମ୍ବା ଅଭିଯୋଗକାରୀଙ୍କ ସହ ସୌହାର୍ଦ୍ଦ୍ୟପୂର୍ଣ୍ଣ ବ୍ୟବହାର ପ୍ରଦର୍ଶନ କରିବା ପାଇଁ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ କଡ଼ା ତାଗିଦ୍ କରିଥିବା ବେଳେ ବାଲେଶ୍ୱର ଜିଲା ଭୋଗରାଇ ଥାନା ପୋଲିସ ବର୍ବରତାର ସୀମା ଟପିଛି। ବିନା ମାମଲାରେ ଜଣେ ଯୁବକଙ୍କୁ ହାତ ଗୋଡ଼ରେ ହ୍ୟାଣ୍ଡକପ୍ ପକାଇ ୨ ଦିନ ଧରି ନିର୍ଯାତନା ଦେବା ଘଟଣା ସ୍ଥାନୀୟ ଅଞ୍ଚଳରେ ଆଲୋଡ଼ନ ସୃଷ୍ଟି କରିଛି। ଶେଷରେ ବାଲେଶ୍ୱର ଏମ୍ପି ପ୍ରତାପ ଷଡଙ୍ଗୀଙ୍କ ହସ୍ତକ୍ଷେପ ଫଳରେ ଗୁରୁବାର ଅପରାହ୍ନରେ ନିର୍ଯାତନାର ଶିକାର ଯୁବକ ଥାନାରୁ ମୁକୁଳିଛନ୍ତି। ଏସ୍ପିଙ୍କ ନିର୍ଦ୍ଦେଶକ୍ରମେ ତାଙ୍କୁ ପ୍ରଥମେ ଜଳେଶ୍ୱରପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଓ ପରେ ବାଲେଶ୍ୱର ଜିଲା ମୁଖ୍ୟ ଚିକିତ୍ସାଳୟକୁ ପଠାଇଛନ୍ତି।
ସୂଚନାନୁଯାୟୀ, ଉତ୍ତର ଭୋଗରାଇ ବାରବାଟିଆ ଗ୍ରାମର ମନ୍ମଥ ଦତ୍ତଙ୍କ ମାଇକ ଅପରେଟର ଭାବେ ଦକ୍ଷିଣ ଭୋଗରାଇ ଜୟରାମପୁର ଗ୍ରାମର କାର୍ତ୍ତିକ ଭୋଳ କାମ କରନ୍ତି। ମାଲିକ ଓ ଅପରେଟରଙ୍କ ମଧ୍ୟରେ ବାଇକ ଅଦଳବଦଳକୁ କେନ୍ଦ୍ରକରି ମାଇକ ମାଲିକଙ୍କ ସ୍ତ୍ରୀ ଜୟନ୍ତୀ ଦତ୍ତ ତାଙ୍କ ଅପରେଟର ଗାଡି ଚୋରି କରିନେଇଥିବା ଭୋଗରାଇ ଥାନରେ ୨୦ା୫ା୨୫ରିଖରେ ଅଭିଯୋଗ କରିଥିଲେ। ଅପରେଟର ଯୁବକଙ୍କୁ ବୁଧବାର ଥାନା ଅଧିକାରୀ ଡାକି ନେଇ ଜେଲ ହାଜତରେ ପୂରାଇ ମାଡ଼ ମାରିବା ଓ ହାତ, ଗୋଡ଼ ହାତରେ ବେଡ଼ି ପକାଇଥିବା ଅଭିଯୋଗ ହୋଇଥିଲା। ବାଲେଶ୍ୱର ଏମ୍ପି ପ୍ରତାପ ଚନ୍ଦ୍ର ଷଡ଼ଙ୍ଗୀ ଗୁରୁବାର ଭୋଗରାଇ ଗସ୍ତରେ ଦଳୀୟ କାର୍ଯ୍ୟକ୍ରମରେ ଯୋଗଦେବା ଅବସରରେ ଥାନା ହାଜତରେ ନିର୍ଯାତୀତ ହେଉଥିବା ଯୁବକଙ୍କ ସ୍ତ୍ରୀ ତାଙ୍କ ସ୍ବାମୀଙ୍କ ସମ୍ପର୍କରେ ଏମ୍ପି’ଙ୍କୁ ଜଣାଇଥିଲେ।
ଏହି ଘଟଣାକୁ ସେ ଗୁରୁତ୍ୱର ସହ ନେଇ ଅପରାହ୍ନରେ ଦଳୀୟ ଶତାଧିକ କର୍ମୀ ଓ ନେତାଙ୍କ ସହ ଭୋଗରାଇ ଥାନାରେ ପହଞ୍ଚିଥିଲେ। ଥାନା ହାଜତରେ ଥିବା ଯୁବକଙ୍କ ଅବସ୍ଥା ଦେଖି କ୍ଷୁବ୍ଧ ହୋଇଥିଲେ। ଭୋଗରାଇ ଥାନାଧିକାରୀ ଶ୍ରୀବଲ୍ଲଭ ସାହୁଙ୍କୁ ଯୁବକଙ୍କ ବିରୋଧରେ ଅଭିଯୋଗ ରେଜିଷ୍ଟ୍ରେଶନ କାହିଁକି ହୋଇ ନ ଥିବା ଏବଂ ଯୁବକଙ୍କୁ ୨ଦିନ ଧରି ଆଇନକୁ ଊଲ୍ଲଂଘନ କରି କାହିଁକି ନିର୍ଯାତନା ଦିଆଯାଉଥିଲା ବୋଲି ପଚାରିବାରୁ ତାହାର ଉତ୍ତର ଚାହିଁବାରୁ ଥାନା ଅଧିକାରୀ ହଡ଼ବଡେଇ ଯାଇଥିଲେ।
ଜଣେ ଗରିବ ଲୋକଙ୍କୁ ହାଜତରେ ହାତ ଗୋଡ଼ରେ ବେଡ଼ି ପକାଇ ମାଡ଼ ମାରିବା, ପଶୁଙ୍କ ଭଳି ବ୍ୟବହାର କରିବା ଓ ମାନସିକ ନିର୍ଯାତନା ଦେବା ମଧ୍ୟଯୁଗର ବର୍ବରତା ବୋଲି ଥାନା ଅଧିକାରୀଙ୍କୁ ଭର୍ତ୍ସନା କରିବା ସହିତ ଅବିଳମ୍ବେ ବଦଳି ପାଇଁ ଏସ୍ପି ରାଜପ୍ରସାଦଙ୍କୁ ଭୋଗରାଇ ଥାନାରୁ ଫୋନ ଯୋଗେ ଦାବି ରଖିଥିଲେ। ଏଥିସହିତ ଯୁବକଙ୍କୁ ବିନା ସର୍ତ୍ତରେ ଛାଡି ଦେବାକୁ ଅଡି ବସିଥିଲେ। ଏସ୍ପିଙ୍କ ହସ୍ତକ୍ଷେପ ଯୋଗୁ ହାଜତରେ ଥିବା ନିର୍ଯାତୀତ ଯୁବକଙ୍କୁ ଏମ୍ପିଙ୍କ ଉପସ୍ଥିତିରେ ପୋଲିସ ହାତ ଗୋଡ଼ରୁ ବେଡ଼ି ଖୋଲି ଡାକ୍ତରୀ ପରୀକ୍ଷା ପାଇଁ ଜଳେଶ୍ୱରପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ପଠାଇଥିଲେ।
ତେବେ ଭୋଗରାଇ ଥାନାଧିକାରୀ ଯୁବକଙ୍କୁ ମାଡ ମାରିବା ଘଟଣା ଅସ୍ବୀକାର କରିଛନ୍ତି। ଥାନାଧିକାରୀଙ୍କ ବିରୋଧରେ ନିର୍ଯାତୀତ ଯୁବକ ମଧ୍ୟ ଅଭିଯୋଗ କରିଛନ୍ତି। ଅପରପକ୍ଷରେ ଭୋଗରାଇ ଥାନା ପକ୍ଷରୁ ଯୁବକଙ୍କ ବିରୋଧରେ ଶେଷ ମୁହୂର୍ତ୍ତରେ ଏକ ମାମଲା ରୁଜୁ ହୋଇଥିବା ପୋଲିସ ସୂତ୍ରରୁ ଜଣାପଡିଛି। ଆଡିଶନାଲ ଏସ୍ପି ଦେବଜ୍ୟୋତି ଦାସ, ଜଳେଶ୍ୱର ଏସ୍ଡିପିଓ ମାନସ କୁମାର ଦେଓ ଥାନାରେ ପହଞ୍ଚି ସିସିଟିଭି ଫୁଟେଜକୁ ଅନୁଧ୍ୟାନ କରିଛନ୍ତି।
