ଦିଗପହଣ୍ଡି,୧୪।୩(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ବ୍ଳକ ଫାସିଗୁଡ଼ା ପଞ୍ଚାୟତ ଜଲମେରିପଲ୍ଲୀ ଗ୍ରାମର ବୁଲୁ ନାଇକ(୪୨) ଦାଦନ ଶ୍ରମିକ ଭାବେ କାମ କରିବାକୁ ମହାରାଷ୍ଟ୍ରର ମୁମ୍ବାଇ ଯାଉଥିଲେ। ହେଲେ ପୁନେ ଜିଲା ଦଉଣ୍ଡ ରେଲୱେ ଷ୍ଟେଶନରୁ ବୁଲୁ ନିଖୋଜ ହୋଇଯାଇଥିବା ଜଣାପଡିଛି। ଏନେଇ ବୁଲୁଙ୍କ ବାପା ଗୋବିନ୍ଦ ନାଇକ ଦିଗପହଣ୍ଡି ଥାନାରେ ଏତଲା ଦେଇଛନ୍ତି।
ଗତ ସୋମବାର ଜଲମେରୀ ପଲ୍ଲୀ ଗ୍ରାମର ଗୋବିନ୍ଦ ନାଇକଙ୍କ ପୁଅ ବୁଲୁ ତାଙ୍କ ଦୁଇ ସାଙ୍ଗଙ୍କ ସହ ମିଶି ମୁମ୍ବାଇ ଯିବା ପାଇଁ ବ୍ରହ୍ମପୁର ରେଲୱେ ଷ୍ଟେଶନ ଯାଇଥିଲେ। ସେଠାରୁ ସେମାନେ କୋଣାର୍କ ଏକ୍ସପ୍ରେସ ଟ୍ରେନ ଯୋଗେ ମୁମ୍ବାଇ ଅଭିମୁଖେ ଯାଇଥିଲେ । ମଙ୍ଗଳବାର ରାତି ପ୍ରାୟ ସାଢ଼େ ୯ ଟାରେ ଟ୍ରେନଟି ମହାରାଷ୍ଟ୍ରର ପୁନେ ଜିଲା ଦଉଣ୍ଡ ଷ୍ଟେଶନରେ ପହଞ୍ଚି ଥିଲା । ସେତିକିବେଳେ ବୁଲୁ ପିଇବା ପାଣି ଆଣିବାକୁ ପ୍ଳାଟଫର୍ମରେ ଓହ୍ଲାଇଥିଲେ। ଏହି ସମୟରେ ଟ୍ରେନ ଛାଡ଼ି ଦେଇଥିଲା । ଏନେଇ ତାଙ୍କ ଦୁଇ ସାଙ୍ଗ ବୁଲୁଙ୍କ ପରିବାର ଲୋକଙ୍କୁ ଫୋନ କରି ଜଣାଇଥିଲେ।
ଖବର ପାଇ ବୁଲୁଙ୍କ ସମ୍ପର୍କୀୟ ଲୋକେ ଦଉଣ୍ଡ ଷ୍ଟେଶନରେ ପହଞ୍ଚି ବହୁ ଖୋଜାଖୋଜି କରିବା ପରେ ତାଙ୍କ ସନ୍ଧାନ ନ ମିଳିବାରୁ ସେଠାକାର ରେଲୱେ ଥାନାରେ ଲିଖିତ ଭାବେ ଜଣାଇଥିଲେ। ବୁଲୁଙ୍କ ନିଖୋଜ ସମ୍ପର୍କରେ ସେଠାକାର ପୋଲିସ ପାଖରୁ କୌଣସି ସୂଚନା ନ ପାଇବା ପରେ ନିରାଶ ହୋଇ ସମ୍ପର୍କୀୟ ଗ୍ରାମକୁ ଫେରି ଆସିଥିଲେ। ପୁଅ ବୁଲୁର ଫେରିବା ବାଟକୁ ଚାହିଁ ବସିଥିବା ମା’, ବାପା ଓ ସମ୍ପର୍କୀୟ ଏନେଇ ଫାସିଗୁଡ଼ା ପଞ୍ଚାୟତ ସରପଞ୍ଚ ପ୍ରତିନିଧି ଶିବରାମ ପ୍ରଧାନଙ୍କୁ ସାକ୍ଷାତ କରି ସମସ୍ତ ଘଟଣା ଜଣାଇଥିଲେ।
ପରେ ଶିବରାମ ବୁଲୁଙ୍କ ପରିବାର ଲୋକଙ୍କୁ ସାଙ୍ଗରେ ନେଇ ଦିଗପହଣ୍ଡି ଥାନାରେ ପହଞ୍ଚି ଆଇଆଇସି କିଶୋର କୁମାର ସାମଲଙ୍କ ସହ ସବିଶେଷ ଆଲୋଚନା କରିଥିଲେ। ଆଇଆଇସି ଙ୍କ ପରାମର୍ଶ କ୍ରମେ ବୁଲୁଙ୍କ ବାପା ପୁଣି ଥରେ ଏତଲା ଦେବା ପରେ ପୋଲିସ ନିଖୋଜ ମାମଲା ରୁଜୁ କରି ତଦନ୍ତ ଚଳାଇଥିବା ବେଳେ ନିଖୋଜ ପୁଅର ସନ୍ଧାନ ପାଇଁ ପରିବାର ଲୋକେ ଗଞ୍ଜାମ ଜିଲାପାଳ ଭି. କୀର୍ତ୍ତି ଭାସନ ଏବଂ ଦିଗପହଣ୍ଡି ବିଧାୟକ ଡ଼.ସିଦ୍ଧାନ୍ତ ମହାପାତ୍ରଙ୍କ ଦୃଷ୍ଟି ଆକର୍ଷଣ କରିଛନ୍ତି।
