ପଟ୍ଟାଙ୍ଗି,୪।୧(ଡି.ଏନ.ଏ.): ଓଡ଼ିଆ ଭାଷାକୁ ସରକାରୀ କାର୍ଯ୍ୟାଳୟଠାରୁ ଆରମ୍ଭ କରି ସବୁ କ୍ଷେତ୍ରରେ ପାଳନ କରିବାକୁ କଡାକଡି ନିୟମ ରହିଛି। ସରକାର ମଧ୍ୟ ବିଭିନ୍ନ ସମୟରେ ନିର୍ଦ୍ଦେଶନାମା ଜାରି କରୁଛନ୍ତି। ମାତ୍ର ଜିଲା ଓ ବ୍ଲକ ପ୍ରଶାସନର ଇଚ୍ଛାଶକ୍ତି ଅଭାବରୁ ସୀମାନ୍ତ ଗ୍ରାମ ଗୁଡିକରେ ଓଡ଼ିଆ ଭାଷା ଲୋପ ପାଇବାକୁ ବସିଲାଣି। ଏପରି ଦେଖିବାକୁ ମିଳିଛି କୋରାପୁଟ ଜିଲା ପଟ୍ଟାଙ୍ଗି ବ୍ଲକ ଅନ୍ତର୍ଗତ କୋଟିଆ, ସୁଙ୍କି, ଅମ୍ପାବାଲି, ତଳଗୋଲୁର ପରି ପଞ୍ଚାୟତଗୁଡିକରେ। ପଟ୍ଟାଙ୍ଗି ବ୍ଲକର କୋଟିଆ ପଞ୍ଚାୟତକୁ ନେଇ ଆନ୍ଧ୍ର-ଓଡ଼ିଶା ମଧ୍ୟରେ ସୀମା ବିବାଦ ଲାଗି ରହିଛି। କୋଟିଆ ପଞ୍ଚାୟତର ଦୁଇଟି ସ୍ଥାନ ଫାଟୁସିନେରି ଓ ନେରିଡିବାଲସାରେ ଓଡିଆ ଲେଖା ରହିଥିବା କୌଣସି ନାମଫଳକ କେଉଁଠି ଲାଗିନାହିଁ। ଏ ଦିଗରେ କୋରାପୁଟ ଜିଲା ପ୍ରଶାସନ ଅବା ପଟ୍ଟାଙ୍ଗି ବ୍ଲକ ପ୍ରଶାସନ ଆଗ୍ରହ ପ୍ରକାଶ କରୁନାହିଁ। ଉକ୍ତ ୨ ପଞ୍ଚାୟତର ବିଭିନ୍ନ ଗ୍ରାମରେ ଓଡ଼ିଶାର ବିଦ୍ୟାଳୟ ରହିଥିଲେ ମଧ୍ୟ ବର୍ତ୍ତମାନ ସୁଦ୍ଧା ଏହି ବିଦ୍ୟାଳୟଗୁଡିକୁ ଶତ ପ୍ରତିଶତ ଛାତ୍ରୀଛାତ୍ର ପାଠ ପଢିବାକୁ ଆସୁନାହାନ୍ତି କି ସେମାନେ ଓଡିଆ ଭାଷା ମଧ୍ୟ କହିପାରୁନାହାନ୍ତି। ତାଡିବାଲସା, ନେରିଡିବାଲସା, ଉପରସେମ୍ବି, ଧୂଳିପଦର, ଢୋଲିଆମ୍ବ, ଫଗୁଣସିନେରି, ଫାଟୁସିନେରି ପରି ଅନେକ ଗ୍ରାମରେ ଏପରି ଦେଖିବାକୁ ମିଳିଛି। ଉକ୍ତ ଗ୍ରାମଗୁଡିକରେ ଆନ୍ଧ୍ର ସରକାର ନିଜ ବିଦ୍ୟାଳୟ ସ୍ଥାପନ କରି ତେଲୁଗୁ ଭାଷାକୁ ପ୍ରାଧାନ୍ୟ ଦେଉଥିବା ବେଳେ ସେଠାକାର ଲୋକମାନେ ମଧ୍ୟ ଏହି ଭାଷାକୁ ଶିଖିବା ଲାଗି ଗୁରୁତ୍ୱ ଦେଉଛନ୍ତି। ସେହିପରି ଓଡ଼ିଶାର ବିଦ୍ୟାଳୟଗୁଡିକରେ ସ୍ବତନ୍ତ୍ର ଭାବେ କିଛି ପିଲାଙ୍କୁ ଓଡିଆ କହିବା ପାଇଁ ଶିକ୍ଷା ପ୍ରଦାନ କରାଯାଉଛି। କିପରି ଅନ୍ୟ ପିଲାମାନେ ବା ଅଭିଭାବକମାନେ ଓଡ଼ିଆ ଭାଷା କହିପାରିବେ ସେ ନେଇ ଉଦ୍ୟମ କରାଯାଉ ନ ଥିବା ଦେଖିବାକୁ ମିଳୁଛି। ରାଜ୍ୟ ସରକାର ସମସ୍ତ ସରକାରୀ କାର୍ଯ୍ୟାଳୟଠାରୁ ଆରମ୍ଭ କରି ବେସରକାରୀ ସଂସ୍ଥାଗୁଡିକରେ ଓଡିଆ ଭାଷାରେ ଚିଠି ଲେଖାଠାରୁ ଆରମ୍ଭ କରି ନାମଫଳକ ଲଗାଇବା ବାଧ୍ୟତାମୂଳକ କରିଥିଲେ ମଧ୍ୟ ଏହା ପାଳନ କରାଯାଉଛି କି ନାହିଁ ତାହା ଜିଲା ଅବା ବ୍ଳକ ପ୍ରଶାସନ ଏଯାଏ ସୁନିଶ୍ଚିତ କରିପାରିନାହିଁ। ଏ ଦିଗରେ ଉଭୟ ଜିଲା ଓ ବ୍ଳକ ପ୍ରଶାସନ ପଦକ୍ଷେପ ଗ୍ରହଣ କଲେ ସୀମାନ୍ତରେ ଓଡ଼ିଆ ଭାଷା ପ୍ରତି ଦେଖାଦେଇଥିବା ସଙ୍କଟ ଦୂର ହୋଇପାରିବ ବୋଲି ସାଧାରଣରେ ଆଲୋଚନା ହେଉଛି।
