ଦାରିଙ୍ଗବାଡ଼ି,୧ା୮(ଅରୁଣ ସାହୁ): ମୋ’ କ୍ରେନ୍ ମୋତେ ଫେରାଇ ଦିଅ ମୁଁ ୬ ମାସ ପାଇଁ ଚୁକ୍ତି କରି ତେଲେଙ୍ଗାନାର ଜଣେ ଠିକାଦାରଙ୍କୁ ଦେଇଥିଲି ଆଉ ଚୁକ୍ତି ସରିବାର ୬ ମାସ ବିତିଲାଣି। ହେଲେ ଏବେ ନା ମୋ’ କ୍ରେନ୍ ମୋତେ ଫେରାଉଛନ୍ତି ନା ମୋ’ ଭଡ଼ା ପଇସା ଦେଉଛନ୍ତି। ମୁଁ ୧ ଲକ୍ଷ ୪୦ ହଜାର ଟଙ୍କା ଭଡ଼ା ଦେଇ ଟ୍ରଲର ନେଇ ଆସିଛି। ମୋ କ୍ରେନ୍ ନେଇକି ଯିବି ହେଲେ ମୁଁ କ୍ରେନ ଟିକୁ ଜଣେ ତେଲେଙ୍ଗାନାର ଠିକାଦାରଙ୍କୁ ଦେଇଥିଲି। ଏବେ ଜଣେ ଓଡ଼ିଆ ଠିକାସଂସ୍ଥା ହାତରେ ରହିଛି ବୋଲି ଦୁଃଖଭରା ନିରାଶ ଭାବନା ନେଇ ଜଣେ ଉତ୍ତରପ୍ରଦେଶ ରାଜ୍ୟର କ୍ରେନ୍ ମାଲିକ ସାହେବଲାଲ ପ୍ରଜାପତି କନ୍ଧମାଳ ପୋଲିସ ନିକଟରେ ଗୁହାରି କରିଛନ୍ତି।
ପ୍ରକାଶ ଯେ, ଉକ୍ତ କ୍ରେନ୍ ମାଲିକ ଜଣେ ତେଲେଙ୍ଗାନାର ଠିକାସଂସ୍ଥାକୁ ଭଡ଼ା ସୂତ୍ରରେ ଦେଇଥିଲେ। ଏଥିପାଇଁ ତାଙ୍କର ୬ ମାସ ପାଇଁ ଚୁକ୍ତି ହୋଇଥିଲା ଚଳିତ ଫେବୃଆରୀ ସୁଦ୍ଧା କୁଆଡ଼େ ତାଙ୍କ ଚୁକ୍ତିନାମା ସରିଛି। ଚୁକ୍ତିନାମା ସରିବା ପୂର୍ବରୁ ଠିକାସଂସ୍ଥା ପ୍ରଥମେ ଅନ୍ୟ ଜିଲାରେ କାର୍ଯ୍ୟ କରୁଥିଲେ। ଏବେ କନ୍ଧମାଳ ଜିଲା ଦାରିଙ୍ଗବାଡ଼ି ଥାନା ସିମନବାଡ଼ି ପଞ୍ଚାୟତ ଗବାଟବାଡ଼ିରେ ଉକ୍ତ କ୍ରେନ୍ ଥିବା ଶୁଣି ମାଲିକ ସାହେବଲାଲ ନିଜ କ୍ରେନ ନେବାକୁ ଏକ ଟ୍ରଲର ନେଇ ପହଞ୍ଚିଥିଲେ। ହେଲେ ସେଠାରେ ପହଞ୍ଚିବା ପରେ ଉକ୍ତ ଓଡ଼ିଆ ଠିକାସଂସ୍ଥା କ୍ରେନ୍ଟିକୁ ଫେରାଇବାକୁ ମନା କରିବା ସହ ସେ ଯାହାଠାରୁ ଆଣିଛନ୍ତି ସେ ଆସିଲେ କ୍ରେନ ଦିଆଯିବ ବୋଲି କହିଥିଲେ। ତେବେ କ୍ରେନ୍ମାଲିକ ତାଙ୍କୁ ଭଡ଼ା ଦିଆଯାଉନାହିଁ କି କ୍ରେନ୍ର ରକ୍ଷଣାବେକ୍ଷଣ ସଠିକ୍ ଭାବରେ କରାଯାଉନାହିଁ। ତେଣୁ ସେ ନେବାକୁ କହିବା ପରେ କୁଆଡେ ଓଡ଼ିଆ ଠିକାସଂସ୍ଥା ତାଙ୍କୁ ଧମକ ଚମକ ଦେବାରୁ ସାହେବଲାଲ ଦାରିଙ୍ଗବାଡ଼ି ଥାନା ଓ ପରବର୍ତ୍ତୀ ସମୟରେ କନ୍ଧମାଳ ଏସ୍ପିଙ୍କ କାର୍ଯ୍ୟାଳୟକୁ ଅଭିଯୋଗ ପାଇଁ ପହଞ୍ଚିଥିଲେ। ତେବେ ଏସ୍ପିଙ୍କ କାର୍ଯ୍ୟାଳୟରୁ ତାଙ୍କୁ ଦାରିଙ୍ଗବାଡ଼ି ପୋଲିସକୁ ନିର୍ଦ୍ଦେଶ ଦିଆଯିବ ଉକ୍ତ ସମସ୍ୟାର ପଦକ୍ଷେପ ନେବାକୁ କୁହାଯାଇ ପୁଣି ଦାରିଙ୍ଗବାଡ଼ି ଥାନାକୁ ପଠାଇଥିଲେ। କ୍ରେନ୍ ମାଲିକ ଦାରିଙ୍ଗବାଡ଼ିରେ ପହଞ୍ଚି ଅଭିଯୋଗପତ୍ର ଦେଇ ପୋଲିସଠାରୁ ନ୍ୟାୟ ଭିକ୍ଷା କରିଛନ୍ତି। ପୋଲିସ ନିକଟରେ ଅଭିଯୋଗ ପରେ ଶୁକ୍ରବାର ମଧ୍ୟାହ୍ନରେ ପୋଲିସ ଘଟଣାସ୍ଥଳରେ ପହଞ୍ଚିଥିଲା।
ଠିକାସଂସ୍ଥାରେ ଥିବା ଜଣେ କର୍ମଚାରୀ ଦୁର୍ଯ୍ୟୋଧନ ବାଗ୍ଙ୍କୁ ଉକ୍ତ କ୍ରେନ୍କୁ ଥାନାକୁ ନିଆଯିବ କହି ପ୍ରକ୍ରିୟା ଆରମ୍ଭ କରାଯାଇଛି। ସବ୍ଇନ୍ସପେକ୍ଟର ଜୟନ୍ତ କୁମାର ସେଠୀ, ଏଏସ୍ଆଇ ଶ୍ରୀନିବାସ ରାଓ, ଅର୍ଜୁନ ଶବର ସଦଳବଳ ଯାଇ କ୍ରେନକୁ ଥାନାକୁ ନେଉଥିବା ଜଣାପଡ଼ିଛି। ଏନେଇ ଓଡ଼ିଆ ଠିକାସଂସ୍ଥାର ଇଞ୍ଜିନିୟର ଜିତେନ୍ଦ୍ର ସେଠୀଙ୍କ ସହ ଯୋଗାଯୋଗ କରାଯିବାରୁ ସେ କହିଛନ୍ତି, ସେ ସାହେବଲାଲଙ୍କୁ ଜାଣିନାହାନ୍ତି କି ତାଙ୍କଠାରୁ ସେ କ୍ରେନ୍ ଆଣି ନାହାନ୍ତି। ତେଣୁ ଆମେ ଯାହାଠାରୁ କ୍ରେନ୍ ଆଣିଛୁ ତାଙ୍କୁ ଘଟଣା ସମ୍ପର୍କରେ ଜଣାଇଛୁ। ସେ ଆସିଲେ ଆମେ ଯେତେ ଶୀଘ୍ର ହେବ ଏହି ସମସ୍ୟାର ସମାଧାନ କରିବୁ ବୋଲି କହିଛନ୍ତି। ଏନେଇ ଇଞ୍ଜିନିୟର ସେଠୀ ପୋଲିସଙ୍କୁ ମଧ୍ୟ ଅବଗତ କରାଇଛୁ ବୋଲି କହିଛନ୍ତି।
