କୋରାପୁଟ,୧୧ା୩(ଅମିତାଭ ବେହେରା): କୋରାପୁଟସ୍ଥିତ ଶହୀଦ ଲକ୍ଷ୍ମଣ ନାୟକ ଭେଷଜ ମହାବିଦ୍ୟାଳୟ ଓ ଚିକିତ୍ସାଳୟର ଜଣେ ଅଧିକାରୀଙ୍କ ବଦଳି ଦାବି କରି ଦୀର୍ଘ ଦିନରୁ ବିବାଦ ଲାଗି ରହିଛି। ହେଲେ ବିବାଦର ସମାଧାନ ନ ହେବାରୁ ନର୍ସିଂ ଓ ପାରା ମେଡିକାଲ କର୍ମଚାରୀମାନେ ମେଡିକାଲ ଆଗରେ ଧାରଣାରେ ବସିଥିଲେ। ଏପରିକି ଅଧିକାରୀ ଜଣଙ୍କୁ ତୁରନ୍ତ ବଦଳି କରା ନ ଗଲେ ୧୨ ତାରିଖରୁ କାର୍ଯ୍ୟବନ୍ଦ ଆନ୍ଦୋଳନ କରାଯିବ ବୋଲି କର୍ମଚାରୀମାନେ ଚେତାବନୀ ଦେଇଛନ୍ତି।
ସୂଚନା ଅନୁଯାୟୀ, କୋରାପୁଟ ଶହୀଦ ଲକ୍ଷ୍ମଣ ନାୟକ ଭେଷଜ ମହାବିଦ୍ୟାଳୟ ଓ ଚିକିତ୍ସାଳୟରେ କାର୍ଯ୍ୟରତ ନର୍ସିଂ ଅଫିସର, ଲାବ୍ରୋଟାରୀ ଟେକ୍ନିସିଆନ, ରେଡିଓ ଗ୍ରାଫର ଓ ଫର୍ମାସୀ ଅଫିସରମାନଙ୍କୁ ଅଧିକାରୀ ଜଣକ ମାନସିକ ନିର୍ଯାତନ ଦେବା, ବଦଳି ଧମକ ଦେବା ସହ ଦରମା ଅଟକାଇ ହଇରାଣ କରାଯାଉଥିବ ଅଭିଯୋଗ ହୋଇଛି। ଏପରିକି କର୍ମଚାରୀମାନେ ବିବାଦର ସମାଧାନ ନେଇ ଉପରିସ୍ତ ଅଧିକାରୀଙ୍କୁ ଜଣାଇଥିଲେ।
ପ୍ରଶାସନ ପକ୍ଷରୁ ତଦନ୍ତ କମିଟି ଦ୍ୱାରା ଘଟଣାର ତଦନ୍ତ କରାଯାଇ ଥିଲେ ମଧ୍ୟ କୌଣସି ସୁଫଳ ମିଳିପାରି ନାହିଁ। ବୁଧବାର ସୁଦ୍ଧା ସରକାର ଦାବି ନ ଶୁଣିଲେ ୧୨ ତାରିଖରୁ କାର୍ଯ୍ୟବନ୍ଦ ଆନ୍ଦୋଳନ କରିବାକୁ କର୍ମଚାରୀ ସଂଘ ପକ୍ଷରୁ ଚେତାବନୀ ଦିଆଯାଇଛି।
