ନୂଆଦିଲ୍ଲୀ, ୨୪ା୪ (ଆଇଏଏନ୍ଏସ୍):ଭାରତରେ ଅତି ଧନୀ ବ୍ୟକ୍ତି ବା ‘ଅଲଟ୍ରା-ରିଚ୍’ ଲୋକଙ୍କ ସଂଖ୍ୟାରେ ବଡ଼ଧରଣର ବୃଦ୍ଧି ପରିଲକ୍ଷିତ ହୋଇଛି। ଗୁରୁବାର ପ୍ରକାଶିତ ‘ନାଇଟ୍ ଫ୍ରାଙ୍କ୍’ ରିପୋର୍ଟ ଅନୁଯାୟୀ, ଭାରତରେ ଅଲଟ୍ରା-ହାଇ୍-ନିଟ୍-ଓ୍ବର୍ଥ ଇଣ୍ଡିଭିଜୁଆଲ (ୟୁଏଚ୍ଏନ୍ଡବ୍ଲ୍ୟୁଆଇ) ବ୍ୟକ୍ତିଙ୍କ ସଂଖ୍ୟା (ଯେଉଁମାନଙ୍କ ସମ୍ପତ୍ତି ପ୍ରାୟ ୨୫୦ କୋଟି ଟଙ୍କାରୁ ଅଧିକ) ବର୍ତ୍ତମାନ ୧୯,୮୭୭ ରହିଛି। ୨୦୩୧ ସୁଦ୍ଧା ଏହି ସଂଖ୍ୟା ୨୭% ବୃଦ୍ଧି ପାଇ ୨୫,୨୧୭ରେ ପହଞ୍ଚିବାର ସମ୍ଭାବନା ଅଛି। ବିଶ୍ୱସ୍ତରରେ ଅତି-ଧନୀ ଲୋକଙ୍କ ସଂଖ୍ୟା ଦୃଷ୍ଟିରୁ ଭାରତ ଏବେ ଷଷ୍ଠ ସ୍ଥାନରେ ରହିଛି। ନାଇଟ୍ ଫ୍ରାଙ୍କ୍ ରିପୋର୍ଟ ହେଉଛି ବିଶ୍ୱର ସମ୍ପତ୍ତି, ବିଳାସପୂର୍ଣ୍ଣ ନିବେଶ ଏବଂ ରିଅଲ ଇଷ୍ଟେଟ ବଜାର ଉପରେ ଆଧାରିତ ଏକ ପ୍ରମୁଖ ବାର୍ଷିକ ରିପୋର୍ଟ। ଏହି ରିପୋର୍ଟ ମୁଖ୍ୟତଃ ନାଇଟ୍ ଫ୍ରାଙ୍କ୍ ଏଲ୍ଏଲ୍ପି ନାମକ ଏକ ବିଶ୍ୱସ୍ତରୀୟ ସ୍ବାଧୀନ ରିଅଲ ଇଷ୍ଟେଟ ପରାମର୍ଶଦାତା ସଂସ୍ଥା ଦ୍ୱାରା ପ୍ରସ୍ତୁତ ଏବଂ ପରିଚାଳିତ। ଏହାର ମୁଖ୍ୟ କାର୍ଯ୍ୟାଳୟ ଲଣ୍ଡନରେ ଅଛି। ଏହି ରିପୋର୍ଟରେ ବିଶ୍ୱ ତଥା ଭାରତର ଆର୍ଥିକ ଅଭିବୃଦ୍ଧିକୁ ନେଇ ଅନେକ ତଥ୍ୟ ପ୍ରକାଶ ପାଇଛି।
ଗତ ୫ ବର୍ଷ ମଧ୍ୟରେ ଭାରତରେ ବିଲିୟନେୟାର (ଯେଉଁମାନଙ୍କ ସମ୍ପତ୍ତି ପ୍ରାୟ ୮୪୦୦ କୋଟି ଟଙ୍କାରୁ ଅଧିକ)ଙ୍କ ସଂଖ୍ୟା ୫୮% ବୃଦ୍ଧି ପାଇ ୨୦୭ରେ ପହଞ୍ଚିଛି। ଆମେରିକା ଏବଂ ଚାଇନା ପରେ ଭାରତ ଏବେ ବିଶ୍ୱର ତୃତୀୟ ବୃହତ୍ତମ ବିଲିୟନେୟାର ଦେଶ। ୨୦୩୧ ସୁଦ୍ଧା ଏହି ସଂଖ୍ୟା ଆହୁରି ୫୧% ବଢ଼ି ୩୧୩ ରେ ପହଞ୍ଚିବ ବୋଲି ଆଶା କରାଯାଉଛି। ରିପୋର୍ଟ ଅନୁସାରେ, ସମ୍ପତ୍ତି କେବଳ କିଛି ସ୍ଥାନରେ ସୀମିତ ନ ରହି ଏବେ ବିଭିନ୍ନ ସହରକୁ ବ୍ୟାପିବାରେ ଲାଗିଛି। ମୁମ୍ବାଇ ଏବେ ମଧ୍ୟ ୩୫.୪% ଅଂଶଧନ ସହ ଦେଶର ଶୀର୍ଷରେ ରହିଛି। ଦିଲ୍ଲୀ (୨୨.୮%), ଚେନ୍ନାଇ ଏବଂ ହାଇଦ୍ରାବାଦରେ ଧନୀଙ୍କ ସଂଖ୍ୟା ବହୁତ ବଢ଼ିଛି। ଅନ୍ୟପଟେ, ବେଙ୍ଗାଲୁରୁରେ ଅତି-ଧନୀଙ୍କ ସଂଖ୍ୟାରେ ସାମାନ୍ୟ ହ୍ରାସ ଘଟିଛି।
ନାଇଟ୍ ଫ୍ରାଙ୍କ୍ ଇଣ୍ଡିଆର ଅଧ୍ୟକ୍ଷ ଶିଶିର ବୈଜଲ କହିଛନ୍ତି, ଭାରତୀୟ ଅର୍ଥନୀତି ଏବେ ଅଧିକ ଉଦ୍ୟୋଗୀଭିତ୍ତିକ ହେବାକୁ ଯାଉଛି। ଡିଜିଟାଲାଇଜେଶନ, ଶେୟାର ବଜାରର ସଫଳତା ଏବଂ ପାରିବାରିକ ବ୍ୟବସାୟର ଅଭିବୃଦ୍ଧି ଯୋଗୁ ଦେଶରେ ସମ୍ପତ୍ତି ସୃଷ୍ଟି ହେବାର ନୂଆ ସୁଯୋଗ ସୃଷ୍ଟି ହୋଇଛି। ନାଇଟ୍ ଫ୍ରାଙ୍କ୍ର ଗ୍ଲୋବାଲ ହେଡ୍ ଲିୟାମ ବେଲିଙ୍କ କହିବାନୁଯାୟୀ, ବିଶ୍ୱସ୍ତରରେ ଭାରତ ପରି ଉଦୀୟମାନ ଅର୍ଥନୀତିଗୁଡ଼ିକ ଏବେ ସମ୍ପତ୍ତି ବଣ୍ଟନ କ୍ଷେତ୍ରରେ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରୁଛନ୍ତି।
Dharitri – Odisha’s No.1 Odia Daily
