ଜୋହାନ୍ସବର୍ଗ, ୨ା୧୨: ଦକ୍ଷିଣ ଆଫ୍ରିକାରେ କରୋନା ଭୂତାଣୁର ଓମିକ୍ରନ୍ ଭାରିଆଣ୍ଟ ପ୍ରଥମ ଚିହ୍ନଟ ହେବା ପରଠାରୁ ସଂକ୍ରମଣ ସ୍ଥିତି ଚିନ୍ତାଜନକ ରହିଛି। ସପ୍ତାହକ ମଧ୍ୟରେ ସେଠାରେ କୋଭିଡ୍ ପଜିଟିଭ୍ ମାମଲା ୪୦୩ ପ୍ରତିଶତ ବୃଦ୍ଧି ପାଇଛି। ମଙ୍ଗଳବାର ୪,୪୭୩ ସଂକ୍ରମିତ ଚିହ୍ନଟ ହୋଇଛନ୍ତି, ଯାହା କି ଗତ ସପ୍ତାହ ମଙ୍ଗଳବାର ଆକ୍ରାନ୍ତଙ୍କ ସଂଖ୍ୟାଠାରୁ ୮୬୮ ଅଧିକ। ଗତ ସୋମବାର ସେଠାରେ ୨,୨୭୩ ସଂକ୍ରମିତ ଚିହ୍ନଟ ହୋଇଥିଲେ। ୨୪ ଘଣ୍ଟାରେ ୪୨ ହଜାର ଲୋକଙ୍କ ନମୁନା ପରୀକ୍ଷା କରାଯାଇଥିବାବେଳେ ସେଥିରୁ ୧୦%ରୁ ଅଧିକ ଜଣ ପଜିଟିଭ ବାହାରିଛନ୍ତି। ପଜିଟିଭ୍ ରେଟ୍ ୧୦.୨ ପ୍ରତିଶତ ଉପରେ ରହିବା ଭୟଙ୍କର ବୋଲି ସେଣ୍ଟର ଫର୍ ଏପିଡେମିକ ରେସ୍ପନ୍ସ ଆଣ୍ଡ ଇନୋଭେଶନ ନିର୍ଦ୍ଦେଶକ ପ୍ରଫେସର ଟୁଲିଓ ଡେ ଓଲିଭେଇରା କହିଛନ୍ତି। ଲୋକେ ମାସ୍କ ପିନ୍ଧିବା ଏବଂ ତୁରନ୍ତ ଟିକା ନେବା ଜରୁରୀ ବୋଲି ସେ ପ୍ରକାଶ କରିଛନ୍ତି। ଟିକା ନେଇ ନ ଥିବା ବ୍ୟକ୍ତି ଓମିକ୍ରନ ଭୂତାଣୁରେ ସଂକ୍ରମିତ ହେଲେ ସେମାନେ ସୁସ୍ଥ ହେବା ସମ୍ଭାବନା କମ୍ ବୋଲି ଡାକ୍ତର ବୈଜ୍ଞାନିକମାନେ ଚେତାବନୀ ଦେଇଛନ୍ତି। ୨ ବର୍ଷରୁ କମ୍ ବୟସର ଶିଶୁ ମଧ୍ୟ କରୋନାରେ ଆକ୍ରାନ୍ତ ହେଉଛନ୍ତି। ଏ ପର୍ଯ୍ୟନ୍ତ ଦକ୍ଷିଣ ଆଫ୍ରିକାରେ ୮୯,୮୪୩ ଜଣଙ୍କ କରୋନାରେ ମୃତ୍ୟୁ ଘଟିସାରିଲାଣି।
ଦକ୍ଷିଣ କୋରିଆରେ ପ୍ରଥମ କରି ୫ ଜଣ ଓମିକ୍ରନ ଭାରିଆଣ୍ଟରେ ସଂକ୍ରମିତ ହୋଇଥିବା ବୁଧବାର ଚିହ୍ନଟ ହୋଇଛନ୍ତି। ସେମାନଙ୍କ ମଧ୍ୟରେ ଟିକାର ସମସ୍ତ ଡୋଜ୍ ନେଇଥିବା ଏକ ଦମ୍ପତି ରହିଛନ୍ତି। ଗତ ସପ୍ତାହରେ ସେମାନେ ନାଇଜେରିଆରୁ ଫେରିଥିଲେ। ଦମ୍ପତିଙ୍କ ୨ ପରିବାର ସଦସ୍ୟ ଓ ଜଣେ ସାଙ୍ଗ ଓମିକ୍ରନ୍ରେ ସଂକ୍ରମିତ ହୋଇଛନ୍ତି। ଏ ପର୍ଯ୍ୟନ୍ତ ଅଷ୍ଟ୍ରେଲିଆ, ଅଷ୍ଟ୍ରିଆ, ବେଲ୍ଜିୟମ, ବୋଟ୍ସଓ୍ବାନା, ବ୍ରାଜିଲ, କାନାଡା, ଚେକ୍ ରିପବ୍ଲିକ୍, ଡେନମାର୍କ, ଫ୍ରାନ୍ସ, ଜର୍ମାନୀ, ହଂକଂ, ଇସ୍ରାଏଲ, ଇଟାଲୀ, ଜାପାନ, ନେଦରଲାଣ୍ଡ୍ସ, ନାଇଜେରିଆ, ନରଓ୍ବେ, ପର୍ତ୍ତୁଗାଲ, ସାଉଦି ଆରବ, ସ୍ପେନ୍, ସୁଇଡେନ୍, ବ୍ରିଟେନରେ ଓମିକ୍ରନ ଭାରିଆଣ୍ଟ ଚିହ୍ନଟ ହୋଇସାରିଛି।
ଆଫ୍ରିକା ପୂର୍ବରୁ ୟୁରୋପରେ ଥିଲା ଓମିକ୍ରନ୍
ଦକ୍ଷିଣ ଆଫ୍ରିକାରେ ପ୍ରଥମେ ଓମିକ୍ରନ ଚିହ୍ନଟ ହେବା ପୂର୍ବରୁ ୟୁରୋପୀୟ ଦେଶଗୁଡ଼ିକରେ ଏହି ସୁପରମ୍ୟୁଟାଣ୍ଟ ରହିଥିଲା ବୋଲି ରିପୋର୍ଟ ପ୍ରକାଶ ପାଇଛି। ବେଲ୍ଜିୟମ, ଜର୍ମାନୀ, ନେଦରଲାଣ୍ଡ୍ସ ଆଦି ଦେଶରେ ଓମିକ୍ରନ ଭାରିଆଣ୍ଟ ପୂର୍ବରୁ ରହିଥିଲା। ନଭେମ୍ବର ୨୪ରେ ଦକ୍ଷିଣ ଆଫ୍ରିକା ୩୨ ମ୍ୟୁଟେଶନ ଥିବା ଓମିକ୍ରନ ଭାରିଆଣ୍ଟ ସମ୍ପର୍କରେ ପ୍ରଥମେ ବିଶ୍ୱକୁ ଜଣାଇଥିଲା। ହେଲେ ବେଲ୍ଜିୟମ ଏବଂ ଜର୍ମାନୀରେ ନମୁନା ପରୀକ୍ଷଣ ପରେ ନଭେମ୍ବର ୨୪ ପୂର୍ବରୁ ସେଠାରେ ଏହି ଭାରିଆଣ୍ଟ ଥିବା ସ୍ପଷ୍ଟ ହୋଇଛି। ବେଲ୍ଜିୟମରେ ଚିହ୍ନଟ ଓମିକ୍ରନ ସଂକ୍ରମିତ ପୂର୍ବରୁ ଇଜିପ୍ଟ ଭ୍ରମଣ କରିଥିଲେ। ସେ ନଭେମ୍ବର ୧୧ରେ ଇଜିପ୍ଟରୁ ଫେରିବା ପରେ ତାଙ୍କଠାରେ ଲକ୍ଷଣ ଦେଖାଦେଇଥିଲା ବୋଲି ବେଲ୍ଜିୟମ ଡାକ୍ତର ମାର୍କ ଭ୍ୟାନ୍ ରାନ୍ଷ୍ଟ ଟୁଇଟ୍ କରିଛନ୍ତି। ସେହିପରି ନଭେମ୍ବର ୧୯ରୁ ୨୩ ମଧ୍ୟରେ ପଶ୍ଚିମ ୟୁରୋପରେ ଓମିକ୍ରନ ଭାରିଆଣ୍ଟ ମିଳିଥିଲା ବୋଲି ଡଚ୍ ସ୍ବାସ୍ଥ୍ୟ କର୍ତ୍ତୃପକ୍ଷ କହିଛନ୍ତି।
