ନୂଆଦିଲ୍ଲୀ,୧୮।୧୨ : ସମ୍ପ୍ରତି ଦେଶରେ ହଠାତ ହାର୍ଟ ଆଟାକରେ ଅନେକ ମୃତ୍ୟୁ ମାମଲା ସାମ୍ନାକୁ ଆସୁଛି। କେତେବେଳେ ପାର୍ଟିରେ ନାଚିବା ବେଳେ, ବେଳେବେଳେ ଖେଳିବା ସମୟରେ, ଜିମ କରିବା ସମୟରେ ଏଭଳି ଘଟୁଛି। ସବୁ ବୟସର ଲୋକମାନେ ଏହି ପରିସ୍ଥିତି ଦେଇ ଗତି କରୁଛନ୍ତି । ବର୍ତ୍ତମାନ ଡାକ୍ତରମାନେ ଏ ବିଷୟରେ ଏକ ଆଶ୍ଚର୍ଯ୍ୟଜନକ ତଥ୍ୟ ଦେଇଛନ୍ତି। ଡାକ୍ତରଙ୍କ ଅନୁଯାୟୀ ହାର୍ଟ ଆଟାକ ଘଟଣା କରୋନା ସହିତ ଜଡିତ ହୋଇ ଥାଇପାରେ।
ଏମ୍ସର ହୃଦରୋଗ ପ୍ରଫେସର ଡାକ୍ତର ରାକେଶ ଯାଦବ କହିଛନ୍ତି ଯେ ଏହା ଦୀର୍ଘ ଦିନ ଧରି କୋଭିଡ ସହିତ ସଂଯୁକ୍ତ ମାମଲା ହୋଇପାରେ। ସେ କହିଛନ୍ତି ଯେ ବର୍ତ୍ତମାନ ସମୟରେ ହାର୍ଟ ଆଟାକ ବୃଦ୍ଧି ଘଟଣାରେ କୌଣସି ସଠିକ ତଥ୍ୟ ଉପଲବ୍ଧ ନାହିଁ, କିନ୍ତୁ ଆଗକୁ ଆସୁଥିବା ଘଟଣାକୁ ଦେଖିଲେ ଏହା କରୋନା ମହାମାରୀ ସହ ଜଡିତ ହୋଇପାରେ।
ଗଣମାଧ୍ୟମ ରିପୋର୍ଟ ଅନୁଯାୟୀ ପ୍ରଫେସର ରାକେଶ ଏବଂ ତାଙ୍କ ସହକର୍ମୀମାନେ ୨୦୨୦ ମସିହାରେ ଇଣ୍ଡିଆନ ହାର୍ଟ ଜର୍ନାଲରେ ଏକ ସମ୍ପାଦକୀୟ ପ୍ରକାଶ କରିଥିଲେ। ଏଥିରେ କରୋନା କାରଣରୁ ହାର୍ଟ ଆଟାକ ମୃତ୍ୟୁ ବିଷୟରେ ଉଲ୍ଲେଖ କରାଯାଇଥିଲା। ଏହି ରିପୋର୍ଟରେ ସେ କରୋନା ଯୋଗୁ ଅନିୟମିତ ହୃଦସ୍ପନ୍ଦନ ଏବଂ ଦୁର୍ବଳ ହୃଦୟ ମାଂସପେଶୀ ସମ୍ପର୍କରେ ଦର୍ଶାଇଥିଲେ।
ଲକ୍ଷଣକୁ ଅଣଦେଖା କରନ୍ତୁ ନାହିଁ ବୋଲି ପ୍ରଫେସର କହିଛନ୍ତି। କରୋନା ଭାଇରସ ସଂକ୍ରମଣର ଇତିହାସ ଏବଂ ହୃଦୟ ସମ୍ବନ୍ଧୀୟ ସମସ୍ୟାର ଆଶଙ୍କା ମଧ୍ୟରେ ଏକ ଲିଙ୍କକୁ ସମର୍ଥନ କରୁଥିବା ପ୍ରମାଣ ବଢୁଥିବା ନେଇ ସେ ଗୁରୁତ୍ୱାରୋପ କରିଛନ୍ତି। ଲୋକମାନେ ସେମାନଙ୍କର ବୟସ କିମ୍ବା ଫିଟନେସ ପ୍ରତି ଧ୍ୟାନ ଦେବା ଉଚିତ। ହାର୍ଟ ଆଟାକର ଆଶଙ୍କା ହ୍ରାସ କରିବା ପାଇଁ ସମୟ ସମୟରେ ସ୍ବାସ୍ଥ୍ୟ ଯାଞ୍ଚ କରିବା ଅତ୍ୟନ୍ତ ଜରୁରୀ ଅଟେ।
ଏମ୍ସର ପ୍ରଫେସର ତଥା ଫୋରେନସିକ ମେଡିସିନ ଏବଂ ଟକ୍ସିକୋଲୋଜି ବିଭାଗର ପ୍ରଫେସର ଡାକ୍ତର ସୁଧୀର ଗୁପ୍ତାଙ୍କ ଅନୁଯାୟୀ,ହାର୍ଟ ଆଟାକ କିମ୍ବା ଅନ୍ୟାନ୍ୟ ବିପଦ କାରଣରୁ ହଠାତ ମୃତ୍ୟୁ ହେଉଥିବା ଯୁବବର୍ଗମାନଙ୍କଠାରେ ପୋଷ୍ଟ ମର୍ଟମ କରାଯିବା ଉଚିତ। ଏହା ମଧ୍ୟ ପ୍ରକୃତ କାରଣ ଜାଣିବା ପାଇଁ ସାହାଯ୍ୟ କରିବ। ସେ କହିଛନ୍ତି, ଯଦି ମୃତ୍ୟୁ କିଛି ଅଜ୍ଞାତ ହାର୍ଟ ଆଟାକ ଯୋଗୁ ହୋଇଥାଏ, ତେବେ ପରିବାରକୁ ଏହି ରୋଗର କାରଣ ଜାଣିବା ପାଇଁ ସ୍କ୍ରିନିଂ କରିବାକୁ କୁହାଯାଇପାରେ। ଏହା ଦ୍ୱାରା ରୋଗ ଚିହ୍ନଟ କରାଯାଇପାରେ।
