ନୂଆପଡ଼ା,୧୯ା୧୧ (ମକାରୁ ବେମାଲ): ନୂଆପଡ଼ା ଉପନିର୍ବାଚନରେ ଅର୍ଥବଳ ନ ହେବାରୁ ଦ୍ୱିତୀୟ ସ୍ଥାନରେ ରହିଲୁ ବୋଲି କଂଗ୍ରେସରୁ ପ୍ରାର୍ଥୀ ହୋଇଥିବା ଘାସିରାମ ମାଝୀ କହିଛନ୍ତି। ମଙ୍ଗଳବାର ଜିଲା କଂଗ୍ରେସ କାର୍ଯ୍ୟାଳୟଠାରେ ଆୟୋଜିତ ଖବରଦାତା ସମ୍ମିଳନୀରେ ଘାସିରାମ କହିଛନ୍ତି, ମୁଁ ହାରିଥିଲେ ମଧ୍ୟ ବିଜୟ ହୋଇଛି ବୋଲି ମନେ କରୁଛି। ହେବିୱେଟ ନେତା ଆସି ନିର୍ବାଚନ ପ୍ରଚାର କରିବାର କାର୍ଯ୍ୟକ୍ରମ ରହିଥିଲା। ବିହାର ନିର୍ବାଚନ ପାଇଁ ସମୟ ଦେଇପାରିଲେ ନାହିଁ। ରାଜ୍ୟର ପୂର୍ବତନ ମନ୍ତ୍ରୀ, ବିଧାୟକ ଓ ବର୍ତ୍ତମାନର ଏମ୍ପି, ବିଧାୟକ ସହ ପଡୋଶୀ ରାଜ୍ୟ ଛତିଶଗଡର ମନ୍ତ୍ରୀ, ବିଧାୟକ ଓ ନେତାମାନେ ଆସି କଂଗ୍ରେସ ଦଳ ପାଇଁ ପ୍ରଚାର କରିଥିଲେ। ପ୍ରଦେଶ କଂଗ୍ରେସ ସଭାପତି ଭକ୍ତ ଚରଣ ଦାସ ନିର୍ବାଚନ ପ୍ରଥମରୁ ଶେଷ ଯାଏ ପ୍ରୟାସ କରିଛନ୍ତି। ବରିଷ୍ଠ ନେତା ନିରଞ୍ଜନ ପଟ୍ଟନାୟକ, ଜୟଦେବ ଜେନା, ଜଗନ୍ନାଥ ପଟ୍ଟାନାୟକ ପ୍ରମୁଖ ଆସି ଅକ୍ଲାନ୍ତ ପରିଶ୍ରମ କରିଥିଲେ। ଆମର ଭଲ ପ୍ରଦର୍ଶନ ରହିଥିଲା। ଲୋକେ କଂଗ୍ରେସକୁ ସମର୍ଥନ ମଧ୍ୟ ଦେଉଥିଲେ। ବାହୁବଳ ରହିଛି, ଅର୍ଥବଳ ନ ହେବାରୁ ଦ୍ୱିତୀୟ ସ୍ଥାନରେ ରହିଗଲୁ। ଆଗାମୀ ପଞ୍ଚାୟତ ନିର୍ବାଚନ ଓ ୨୦୨୯ ସାଧାରଣ ନିର୍ବାଚନରେ ଦଳ ଭଲ ପ୍ରଦର୍ଶନ କରିବ ବୋଲି ଆଶା କରୁଛି। ନୂଆପଡାବାସୀ କଂଗ୍ରେସ ଦଳ ସହିତ ରହି ସମର୍ଥନ ଦେଇଥିବାରୁ ଧନ୍ୟବାଦ ଜ୍ଞାପନ କରୁଛି ବୋଲି ମାଝୀ କହିଥିଲେ। ଏହି ସମୟରେ ଭକ୍ତରାମ ଶବର, ଈଶାକ ମହମ୍ମଦ, ପବନ ଶର୍ମା, ହରି ମାଝି, ଶାହରୁଖ ଖାନ, ଉମାକାନ୍ତ ବନଛୋର ପ୍ରମୁଖ ଉପସ୍ଥିତ ଥିଲେ।
