ରାଉରକେଲା ଅଫିସ,୨।୬: ୨୦୨୪ ସାଧାରଣ ନିର୍ବାଚନ ପାଇଁ ରାଜନୈତିକ ଦଳଗୁଡିକ ଏବେଠାରୁ କସରତ ଆରମ୍ଭ କରିଦେଲେଣି। ତେବେ ନିର୍ବାଚନ ପୂର୍ବରୁ ବିଭିନ୍ନ ରାଜନୈତିକ ଦଳରେ କୋଣଠେସା ହୋଇ ରହିଥିବା ଟାଣୁଆ ନେତାମାନେ ଦଳବଦଳ ଆରମ୍ଭ କରିଦେଇଛନ୍ତି। ଏହି କ୍ରମରେ ସୁଯୋଗକୁ ଅପେକ୍ଷା କରିଥିବା ରାଉରକେଲା ରାଜନୀତିର ଦୁଇ ଟାଣୁଆ ନେତା ଜର୍ଜ ତିର୍କୀ ଓ ପ୍ରଶାନ୍ତ ସେଠୀ ଅନ୍ୟ ଦଳରେ ସାମିଲ ହେବାକୁ ସଜ ହେଉଛନ୍ତି। କେବଳ ଏହି ଦୁଇ ନେତା ନୁହଁନ୍ତି, ଆସନ୍ତା ସାଧାରଣ ନିର୍ବାଚନ ପୂର୍ବରୁ ବିଭିନ୍ନ ଦଳର ଏଭଳି ବହୁ ନେତା ଦଳବଦଳ କରିବେ ବୋଲି ଚର୍ଚ୍ଚା ହେଉଛି।
ଏକଦା ବିଜେଡ଼ିରେ ସକ୍ରିୟ ଭୂମିକା ନିର୍ବାହ କରୁଥିବା ଏବଂ ପରେ ବିଜେଡି ଛାଡି ରାଉରକେଲା କଂଗ୍ରେସର ମଙ୍ଗ ଧରିଥିବା ପ୍ରଶାନ୍ତ ସେଠୀ ଗୁରୁବାର କଂଗ୍ରେସରୁ ଇସ୍ତଫା ଦେଇଥିବା ଘୋଷଣା କରିଛନ୍ତି। ଆଗାମୀ ଦିନରେ ପ୍ରଶାନ୍ତ ବିଜେଡ଼ିରେ ଯୋଗଦେବା ସମ୍ଭାବନା ରହିଛି। ଏଭଳି ହେଲେ ରାଜନୈତିକ ପରିବର୍ତ୍ତନ ହେବ ବୋଲି ଚର୍ଚ୍ଚା ହେଉଛି। ପ୍ରଶାନ୍ତ ୧୯୮୦ରେ ରାଉରକେଲା ରାଜନୀତିରେ ପାଦ ଥାପିଥିଲେ। ୧୯୯୯ ମହାବାତ୍ୟାଠାରୁ ସେ ସୁନ୍ଦରଗଡ଼ ରାଜନୀତିରେ ସକ୍ରିୟ ହେଲେ। ରାଉରକେଲା ବିଧାୟକ ତଥା ତତ୍କାଳୀନ ଶ୍ରମ ମନ୍ତ୍ରୀ ସାରଦା ନାୟକଙ୍କ ଅନୁଗତ ଭାବେ ଜଣାଶୁଣା ପ୍ରଶାନ୍ତ ରାଉରକେଲାରେ ବିଭିନ୍ନ ଉନ୍ନତିମୂଳକ କାର୍ଯ୍ୟରେ ଜଡ଼ିତ ରହିଥିଲେ। ପ୍ରଶାନ୍ତ ୨୦୧୯ ବିଧାନସଭା ନିର୍ବାଚନ ପୂର୍ବରୁ କଂଗ୍ରେସରେ ଯୋଗଦେଇ ରଘୁନାଥପାଲ୍ଲୀରୁ ବିଧାୟକ ପ୍ରାର୍ଥୀ ହୋଇ ହାରିଥିଲେ। ସେ ରଘୁନାଥପାଲ୍ଲୀର ଶିଳ୍ପାଞ୍ଚଳ, ଦକ୍ଷିଣ ରାଉରକେଲା ଅଞ୍ଚଳରେ ଜନନୀ ସମ୍ପର୍କ ଓ ଆସ ବସ୍ତିକୁ ଯିବା ଅଭିଯାନ ଜାରି ରଖିଥିଲେ। ଏହା ମଧ୍ୟରେ ତାଙ୍କର ରାଜନୈତିକ ଗୁରୁ ସାରଦା ନାୟକ ଶ୍ରମ ମନ୍ତ୍ରୀ ହେବା ପରେ ପ୍ରଶାନ୍ତ ପୁନଃ ବିଜେଡ଼ିରେ ମିଶିବା ଲାଗି ରାସ୍ତା ଉନ୍ମୁକ୍ତ ଥିବା ଚର୍ଚ୍ଚା ହେଉଥିଲା। ଗୁରୁବାର ପ୍ରଶାନ୍ତ କଂଗ୍ରେସ ଛାଡ଼ିଥିବା ଘୋଷଣା କରିଥିଲେ ଏବଂ ତାଙ୍କ ଇସ୍ତଫାପତ୍ର ପିସିସି ସଭାପତି ଶରତ ପଟ୍ଟନାୟକଙ୍କ ନିକଟକୁ ପଠାଇଥିବା ଏକ ଖବରଦାତା ସମ୍ମିଳନୀରେ ସୂଚନା ଦେଇଥିଲେ। ତେବେ ଅନ୍ୟ କେଉଁ ଦଳକୁ ଯିବେ ବୋଲି ତାଙ୍କୁ ପ୍ରଶ୍ନ ପଚରାଯିବାରୁ ସମୟ ଆସିଲେ ଜାଣିବେ ବୋଲି ସେ କହିଥିଲେ।
ସେହିପରି ଜର୍ଜ ତିର୍କୀ ବିରମିତ୍ରପୁରରୁ ୧୯୯୫ ଓ ୨୦୦୦ରେ ଝାଡ଼ଖଣ୍ଡ ମୁକ୍ତି ମୋର୍ଚ୍ଚା, ୨୦୦୯ରେ ସ୍ବାଧୀନ ତଥା ୨୦୧୪ରେ ସମତା କ୍ରାନ୍ତି ଦଳ ବ୍ୟାନରରେ ନିର୍ବାଚନ ଲଢ଼ି ବିଜୟୀ ହୋଇଥିଲେ। ୨୦୧୯ରେ ସୁନ୍ଦରଗଡ଼ ଲୋକସଭା ଆସନରୁ ନିର୍ବାଚନ ଲଢ଼ି ସେ ପରାଜିତ ହୋଇଥିଲେ। ଏକଦା ବିଜେଡ଼ିରେ ରହି ଗୋଷ୍ଠୀ କନ୍ଦଳର ସମ୍ମୁଖୀନ ହେବା ଓ ପରେ ଏହି ଦଳରୁ ଓହରିଯାଇ କଂଗ୍ରେସରେ ଯୋଗ ଦେଇଥିଲେ ଜର୍ଜ। ସେ ବର୍ଷକ ତଳେ ରାଉରକେଲା କଂଗ୍ରେସ ସଭାପତି ପଦରୁ ଇସ୍ତଫା ଦେଇଛନ୍ତି । ବର୍ତ୍ତମାନ ସେ ପୁଣି ବିଜେଡିରେ ମିଶିବା ଲାଗି ଆଗ୍ରହୀ ଅଛନ୍ତି। ଆସନ୍ତା ରଥଯାତ୍ରା ପରେ ସେ ବିଜେଡ଼ିରେ ଯୋଗ ଦେବେ ସୂଚନା ଦେଇଛନ୍ତି। ବିଜେଡ଼ି ଛାଡ଼ିବା ଏକ ଭୁଲ ନିଷ୍ପତ୍ତି ଥିଲା ବୋଲି ଜର୍ଜ କହିଛନ୍ତି। ତେବେ ଜର୍ଜଙ୍କ ସହ ତାଙ୍କ ରାଜନୈତିକ ଉତ୍ତରାଧିକାରୀ ସାନପୁଅ ରୋହିତ ଯୋଶେଫ ତିର୍କୀ ମଧ୍ୟ ଶାସକ ଦଳରେ ଯୋଗଦେବେ ବୋଲି ଆଲୋଚନା ହେଉଛି।
