ମୁମ୍ବାଇ/ବେଙ୍ଗାଲୁରୁ,୨୯।୧୨ : ମହାରାଷ୍ଟ୍ର ଏବଂ କର୍ନାଟକ ମଧ୍ୟରେ ସୀମା ବିବାଦ ପରେ ବର୍ତ୍ତମାନ ଆଲମାଟି ଡ୍ୟାମ ବିବାଦର ଏକ ନୂଆପ୍ରସଙ୍ଗରେ ପରିଣତ ହୋଇଛି। ମହାରାଷ୍ଟ୍ରର ଉପମୁଖ୍ୟମନ୍ତ୍ରୀ ଦବେନ୍ଦ୍ର ଫଡନାଭିସ କହିଛନ୍ତି ଯେ ବନ୍ୟା ପରିସ୍ଥିତି ଶେଷ ନହେବା ପର୍ଯ୍ୟନ୍ତ ସେ ଏହି ବନ୍ଧର ଉଚ୍ଚତା ବୃଦ୍ଧି କାର୍ଯ୍ୟ ବନ୍ଦ କରିବାକୁ କର୍ନାଟକକୁ କହିବେ। ଯଦି କର୍ନାଟକ ସରକାର ଏଥିରେ ସହମତ ନୁହଁନ୍ତି ତେବେ ମହାରାଷ୍ଟ୍ର ସରକାର ସୁପ୍ରିମକୋର୍ଟ ଯିବେ ବୋଲି ସେ ଧମକ ଦେଇଛନ୍ତି।
ମହାରାଷ୍ଟ୍ରର ସାଙ୍ଗଲି ଏବଂ କୋଲହାପୁର ଜିଲାରେ ଆଲମାଟି ଡ୍ୟାମର ଉଚ୍ଚତା ବୃଦ୍ଧି ଯୋଗୁଁ ବନ୍ୟା ପରିସ୍ଥିତି ସୃଷ୍ଟି ହୋଇଛି। ଏହି ବନ୍ଧଟି କୃଷ୍ଣା ନଦୀ ଉପରେ ନିର୍ମିତ। ମହାରାଷ୍ଟ୍ର ସରକାର ବନ୍ୟା ପରିସ୍ଥିତି ସମ୍ପର୍କରେ ଏକ ଅଧ୍ୟୟନ କରୁଛନ୍ତି। ତେଣୁ, ସରକାର ଚାହୁଁଛନ୍ତି ଯେ ଉଚ୍ଚତା ବଢ଼ାଇବା କାର୍ଯ୍ୟ ଅଧ୍ୟୟନ ସମ୍ପୂର୍ଣ୍ଣ ନହେବା ପର୍ଯ୍ୟନ୍ତ ବନ୍ଦ କରାଯାଉ।
ମହାରାଷ୍ଟ୍ର ବିଧାନସଭା ଅଧିବେଶନରେ ଫଡନାଭିସ କହିଛନ୍ତି ଯେ ଯଦି କର୍ନାଟକ ଆମର ଅନୁରୋଧ ଶୁଣେ ନାହିଁ, ତେବେ ଆମେ ସୁପ୍ରିମକୋର୍ଟଙ୍କ ନିକଟକୁ ଯିବୁ। ଦୁଇ ରାଜ୍ୟ ମଧ୍ୟରେ ସୀମା ବିବାଦ ସୁପ୍ରିମକୋର୍ଟରେ ବିଚାରାଧୀନ ଅଛି। ଏହାକୁ ନେଇ ବିବାଦ ଜାରି ରହିଛି। ଉଭୟ ରାଜ୍ୟର ବିଧାନସଭାରେ ପ୍ରସ୍ତାବ ପାରିତ କରି ୮୦୦ରୁ ଅଧିକ ସୀମାନ୍ତ ଗ୍ରାମ ଉପରେ ସେମାନଙ୍କର ନିଜସ୍ବ ଦାବି ଉପସ୍ଥାପନ କରାଯାଇଛି। ସୂଚନାଯୋଗ୍ୟ ଯେ ଉଭୟ ରାଜ୍ୟରେ ଭାଜପା ସରକାର ଅଛନ୍ତି।
ମହାରାଷ୍ଟ୍ର ସରକାର ଜଳ ସମ୍ପଦ ବିଭାଗର ପୂର୍ବତନ ମୁଖ୍ୟ ସଚିବ ନନ୍ଦ କୁମାର ଭଡନେରାଙ୍କ ଅଧ୍ୟକ୍ଷତାରେ ଏକ କମିଟି ଗଠନ କରି ରାଜ୍ୟରେ ବନ୍ୟା ପରିସ୍ଥିତି ଉପରେ ଆଲମାଟି ଡ୍ୟାମର ଉଚ୍ଚତା ବୃଦ୍ଧି ହେବାର ପ୍ରଭାବ ଆକଳନ କରୁଛନ୍ତି। କର୍ନାଟକ ସରକାର ଡ୍ୟାମର ଉଚ୍ଚତାକୁ ୫୨୪ ମିଟରକୁ ବୃଦ୍ଧି କରିବାକୁ ଚାହୁଁଛନ୍ତି। ଏହି କାରଣରୁ କୋଲହାପୁର ଏବଂ ସାଙ୍ଗଲିରେ ବନ୍ୟା ପରିସ୍ଥିତି ସୃଷ୍ଟି ହୋଇପାରେ।
ମହାରାଷ୍ଟ୍ରର ଦୁଇଟି ଜିଲାରେ ୨୦୧୯ରେ ହୋଇଥିବା ଭୟଙ୍କର ବନ୍ୟା ପରେ ଏହି ଅଧ୍ୟୟନ ଦଳ ଗଠନ କରାଯାଇଥିଲା। ୨୭ ମେ ୨୦୨୦ରେ ଦାଖଲ ହୋଇଥିବା ପ୍ରାଥମିକ ରିପୋର୍ଟରେ କୁହାଯାଇଥିଲା ଯେ ଯଦି କୃଷ୍ଣା ନଦୀ ଉପରେ ଆଲମାଟି ଏବଂ ହିପର୍ଗି ଡ୍ୟାମର ଉଚ୍ଚତା ବୃଦ୍ଧି ହୁଏ ତେବେ କୋଲହାପୁର ଏବଂ ସାଙ୍ଗଲିରେ କୌଣସି ପ୍ରତିକୂଳ ପ୍ରଭାବ ପଡ଼ିବ ନାହିଁ। ତେବେ ସେପ୍ଟେମ୍ବର ୨୦୨୧ରେ ଭଡନେରା ତତ୍କାଳୀନ ମୁଖ୍ୟମନ୍ତ୍ରୀ ଉଦ୍ଧବ ଠାକରେଙ୍କୁ ଲେଖିଥିଲେ ଯେ ରିପୋର୍ଟ ପ୍ରସ୍ତୁତ ହେବା ପରେ କର୍ନାଟକରେ ଚେକ ଡ୍ୟାମ ବିଷୟରେ କୌଣସି ସୂଚନା ନାହିଁ ଯାହା କୋଲହାପୁର ଏବଂ ସାଙ୍ଗଲିରେ ବନ୍ୟା ପରିସ୍ଥିତି ସୃଷ୍ଟି କରିପାରେ।
