ନୂଆଦିଲ୍ଲୀ,୨୮ ।୬: ଦେଶରେ ବଢି ଚାଲିଥିବା କରୋନା ସଂକ୍ରମଣକୁ ଦେଖି କେନ୍ଦ୍ର ସରକାର ଭାଇରସର ନୂଆ ଭାରିଏଣ୍ଟକୁ ଚିହ୍ନିବା ପାଇଁ ନୂଆ ଯୋଜନା ପ୍ରସ୍ତୁତ କରିଛନ୍ତି । ଏଥିପାଇଁ ଏଥର ହସ୍ପିଟାଲରେ ଭର୍ତ୍ତି ହୋଇଥିବା କରୋନା ସଂକ୍ରମିତଙ୍କର ସାମ୍ପଲର ଜିନୋମ ସିକ୍ୱେଂସିଂଗ କରାଯିବ । ଏଥିରେ ଦେଖାଯିବ ଯେ ଏମିତି କେଉଁ କାରଣ ରହିଲା ଯେଉଁଥିପାଇଁ ଜଣେ ସଂକ୍ରମିତଙ୍କୁ ହସ୍ପିଟାଲରେ ଭର୍ତ୍ତି ହେବାକୁ ପଡିଲା । ସଂକ୍ରମିତଙ୍କ ସ୍ଥିତି ଓ ଜୀବନ ପ୍ରତି ବିପଦ ଅଛି କି ନା ତାହା ଦେଖାଯିବ । ଏହାସହ ଟିକାକରଣ ଓ ଅନ୍ୟ ରୋଗ ସମ୍ପର୍କରେ ମଧ୍ୟ ତଥ୍ୟ ନିଆଯିବ ।
କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟର ସୂଚନା ଅନୁଯାୟୀ, ଦେଶରେ ଏପର୍ଯ୍ୟନ୍ତ କରୋନା ଭାଇରସର କୌଣସି ନୂଆ ଭାରିଏଣ୍ଟ ଥିବା ସୂଚନା ମିଳିନାହିଁ । ଏବେ ପର୍ଯ୍ୟନ୍ତ ଓମିକ୍ରନର ସବ ଭାରିଏଣ୍ଟ ସାମ୍ନାକୁ ଆସିଛି । ଦିଲ୍ଲୀ-ମହାରାଷ୍ଟ୍ର ସମେତ ଅନ୍ୟ କିଛି ରାଜ୍ୟରେ ଏହାର ପ୍ରଭାବ ଦେଖିବାକୁ ମିଳିଛି । ହେଲେ କିଛି ଦେଶରେ କରୋନା ସଂକ୍ରମିତଙ୍କ ମୃତ୍ୟୁ ସଂଖ୍ୟା ବଢିବା ସହ ହସ୍ପିଟାଲରେ ରୋଗୀଙ୍କ ସଂଖାରେ ବି ବୃଦ୍ଧି ଘଟିଛି । ସେଥିପାଇଁ କେନ୍ଦ୍ର ସରକାରଙ୍କ ବିଭିନ୍ନ କୋଭିଡ-୧୯ ସମିତି ଜିନୋମ ସିକ୍ୱେଂସିଂଗ ମାଧ୍ୟମରେ ବର୍ତ୍ତମାନ ସ୍ଥିତି ଜାଣିବାକୁ ଏଭଳି ଯାଜନା କରିଛନ୍ତି ।
