ଦାରିଙ୍ଗବାଡ଼ି,୭ା୬(ଅରୁଣ ସାହୁ): ଓଡ଼ିଶାର ପର୍ଯ୍ୟଟନକ୍ଷେତ୍ର ଦାରିଙ୍ଗବାଡ଼ି ଓଡ଼ିଶାର କଶ୍ମୀର ଭାବେ ଜଣାଶୁଣା କିନ୍ତୁ ଗ୍ରୀଷ୍ମ ପ୍ରବାହରେ ଏବେ ଅସମ୍ଭାଳ ହୋଇପଡ଼ିଛି ଏହି ଥଣ୍ଡା ଅଞ୍ଚଳ। ସକାଳ ୮ଟାରୁ ଖରାର ପ୍ରଭାବ ଯୋଗୁ ଜରୁରୀକାର୍ଯ୍ୟ ନ ଥିଲେ ଲୋକମାନେ ଘରୁ ପଦାକୁ ଗୋଡ଼ ବାହାର କରୁନାହାନ୍ତି। ଶନିବାର ମଧ୍ୟାହ୍ନ ସୁଦ୍ଧା ତାପମାତ୍ରାରେ ବୃଦ୍ଧି ଘଟି ୩୪ ଡିଗ୍ରୀରେ ପହଞ୍ଚିଥିବା ବେଳେ ୪୦ ଡିଗ୍ରୀ ତାପମାତ୍ରା ଥିବା ଭଳି ଅନୁଭବ ହେଉଥିବା ଅଞ୍ଚଳବାସୀ କହିଛନ୍ତି। ଗତ କିଛି ଦିନ ହେଲା ଏଭଳି ଗରମ ଓ ପ୍ରଚଣ୍ଡ ଖରା ଯୋଗୁ ଦୋକାନବଜାର ରାସ୍ତାଘାଟ ଜନଶୂନ୍ୟ ହୋଇଥିବା ଦେଖିବାକୁ ମିଳିଛି। ବର୍ଷା କାଁ ଭାଁ ଗାଁ ତଥା ଡାବୁଲୁମାହା, ସୁଲୁମାହା, ବ୍ରାହ୍ମଣୀଗାଁ ଆଦି ଅଞ୍ଚକରେ ଶୁକ୍ରବାର ହାଲୁକା ବର୍ଷା ହୋଇଥିବା କିଛି ସ୍ଥାନରେ ପାଗ ମେଘୁଆ କରିଥିଲା କିନ୍ତୁ ଶନିବାର ଏହାର ବିପରୀତ ସ୍ଥିତି ଦେଖିବାକୁ ମିଳିଛି। ସକାଳ ସମୟରୁ ପ୍ରଚଣ୍ଡ ଖରା ଲୋକଙ୍କୁ ଅସ୍ତବ୍ୟସ୍ତ କରିପକାଇଥିଲା। ଗତ କିଛି ଦିନ ହେଲା ବର୍ଷା ନ ହେବାରୁ କୂଅ, ପୋଖରୀ ଜଳସ୍ତର କମିବାରେ ଲାଗିଛି।
ଅନ୍ୟପକ୍ଷରେ ଦାରିଙ୍ଗବାଡ଼ିକୁ ଆସୁଥିବା ପର୍ଯ୍ୟଟକ ନିରାଶ ହେଉଛନ୍ତି। ସହରରେ ଶୀତତାପ ନିୟନ୍ତ୍ରଣ ଘରେ ରହି ଦିନ ବିତାଉଥିବା ପର୍ଯ୍ୟଟକ ଦାରିଙ୍ଗବାଡ଼ିରେ ପହଞ୍ଚିଲା ପରେ ଶୀତତାପ ନିୟନ୍ତ୍ରଣ କୋଠରି ବୁକିଂ କରି ରହୁଛନ୍ତି ଏଭଳି ପରିସ୍ଥିତିରେ ପର୍ଯ୍ୟଟକ ନିରାଶ ହେଉଛନ୍ତି।
