ନୂଆଦିଲ୍ଲୀ,୨୮।୩ : ବଙ୍ଗଳା ଖାଲି କରିବାକୁ ଜାରି କରାଯାଇଥିବା ବିଜ୍ଞପ୍ତିରେ ରାହୁଲ ଗାନ୍ଧୀ ପ୍ରତିକ୍ରିୟା ଦେଇଛନ୍ତି। ରାହୁଲ ଗାନ୍ଧୀ ଲୋକସଭା ସଚିବାଳୟକୁ ଧନ୍ୟବାଦ ଜଣାଇଛନ୍ତି। ତାଙ୍କୁ ଯାହା କୁହାଯାଇଛି ତାହା ପୂରଣ କରିବେ ବୋଲି ରାହୁଲ ଗାନ୍ଧୀ କହିଛନ୍ତି। ରାହୁଲ ଏହା ମଧ୍ୟ କହିଛନ୍ତି ଯେ ୧୨ ତୋଗଲକ ଲେନ ଘରେ ତାଙ୍କର ଅନେକ ସ୍ମୃତି ଅଛି ।
ସରକାରୀ ବଙ୍ଗଳା ଖାଲି କରିବା ନୋଟିସ ନେଇ କପିଲ ସିବଲ କେନ୍ଦ୍ର ସରକାରଙ୍କୁ ଏନେଇ କଡ଼ା ସମାଲୋଚନା କରିଛନ୍ତି। ଏହାକୁ ଛୋଟ ଛୋଟ ଲୋକଙ୍କ ଛୋଟ ରାଜନୀତି ବୋଲି ସେ କହିଛନ୍ତି।
କଂଗ୍ରେସ ନେତା ରାହୁଲ ଗାନ୍ଧୀଙ୍କୁ ବଙ୍ଗଳା ଖାଲି କରିବା ପ୍ରସଙ୍ଗରେ କଂଗ୍ରେସ ରାଷ୍ଟ୍ରୀୟ ଅଧ୍ୟକ୍ଷ ମଲ୍ଲିକାର୍ଜୁନ ଖାର୍ଗେ କହିଛନ୍ତି ରାହୁଲ ତାଙ୍କ ମାଙ୍କ ସହ ରହିପାରିବେ। ଏହା ବ୍ୟତୀତ, ଯଦି ସେ ଚାହାଁନ୍ତି, ସେ ମଧ୍ୟ ମୋ ସହିତ ରହିପାରିବେ। ବଙ୍ଗଳା ଖାଲି କରିବାକୁ ରାହୁଲ ଗାନ୍ଧୀଙ୍କୁ ଏପ୍ରିଲ ୨୨ ପର୍ଯ୍ୟନ୍ତ ଗୃହ କମିଟି ୩୦ ଦିନର ସମୟ ଦେଇଛି। ଏହା ଅତ୍ୟନ୍ତ ନିନ୍ଦନୀୟ।
ଖାର୍ଗେ କହିଛନ୍ତି ରାହୁଲଙ୍କୁ ଯେପରି ଭୟଭୀତ କରିବା ପାଇଁ ଧମକ ଦିଆଯାଉଛି ଏବଂ ଅପମାନିତ କରାଯାଉଛି ତାହା ଠିକ ନୁହେଁ। ବେଳେବେଳେ ଆମକୁ ବଙ୍ଗଳା ବିନା ୩-୪ ମାସ ବିତାଇବାକୁ ପଡେ। ମୁଁ ନିଜେ ୬ ମାସ ପରେ ବଙ୍ଗଳା ପାଇଲି। ଏହା କେବଳ ଅପମାନିତ କରିବାର ଏକ ଷଡ଼ଯନ୍ତ୍ର। ଏହାକୁ ମୁଁ ନିନ୍ଦା କରୁଛି।
