ଭୁବନେଶ୍ବର,୧୭୲୪( ବ୍ୟୁରୋ):ଓଡ଼ିଆ ସଙ୍ଗୀତ ଜଗତର ସୁନାମଧନ୍ୟ ସଙ୍ଗୀତ ନିର୍ଦ୍ଦେଶକ, କଣ୍ଠଶିଳ୍ପୀ ତଥା ଗୀତିକାର ପ୍ରଫୁଲ୍ଲ କରଙ୍କ ପରଲୋକ ଘଟିଛି। ରବିବାର ଭୁବନେଶ୍ବରର ସତ୍ୟ ନଗରସ୍ଥିତ ବାସଭବନରେ ସେ ଶେଷନିଶ୍ୱାସ ତ୍ୟାଗ କରିଛନ୍ତି। ମୃତ୍ୟୁ ବେଳକୁ ତାଙ୍କୁ ୮୩ ବର୍ଷ ହୋଇଥିଲା।
ସେ ଏକାଧାରରେ ଜଣେ ସଙ୍ଗୀତଜ୍ଞ, କଣ୍ଠଶିଳ୍ପୀ, କବି, କଥାକାର, ସ୍ତମ୍ଭକାର ଥିଲେ। ସେ ଶାସ୍ତ୍ରୀୟ ଓଡ଼ିଶୀ ସଙ୍ଗୀତରେ ଯେମିତି ପ୍ରବୀଣ, ସିନେମା ଓ ଆଧୁନିକ ସଙ୍ଗୀତରେ ସେମିତି ଥିଲେ ଲୋକପ୍ରିୟ। ପାଞ୍ଚ ଦଶନ୍ଧିରୁ ଊର୍ଦ୍ଧ୍ୱ ସଙ୍ଗୀତ ସାଧନାରେ ସେ ନିମଗ୍ନ ଥିଲେ।
ଜାଜ୍ୱଲ୍ୟମାନ ପ୍ରତିଭା ବଳରେ ସେ ସୃଷ୍ଟି କରିଛନ୍ତି ୭୦ରୁ ଊର୍ଦ୍ଧ୍ୱ ଓଡ଼ିଆ ଓ ୪ଟି ବଙ୍ଗଳା ସିନେମାର ସଙ୍ଗୀତ। ଓଡ଼ିଆ ଭାଗବତ, ଛାନ୍ଦ, ଚମ୍ପୁ, ଦେଶାତ୍ମବୋଧକ ଓ ଭକ୍ତି ରସାମତ୍କ ସଙ୍ଗୀତ ସମେତ ୧୦୦ରୁ ଊର୍ଦ୍ଧ୍ୱ ଅଣସିନେମା ସଙ୍ଗୀତ ଆଲ୍ବମ୍ ମଧ୍ୟ ସେ ପ୍ରସ୍ତୁତ କରିଥିଲେ। ସେ ଲଗାତର ୬ ଥର ସମେତ ମୋଟ ୮ ଥର ଓଡ଼ିଆ ସିନେମାର ଶ୍ରେଷ୍ଠ ସଙ୍ଗୀତକାର ଓ ଥରେ ଶ୍ରେଷ୍ଠ କଣ୍ଠଶିଳ୍ପୀର ରାଜ୍ୟ ଚଳଚ୍ଚିତ୍ର ପୁରସ୍କାର ପାଇଥିଲେ। ପ୍ରଫୁଲ୍ଲଙ୍କୁ ମିଳିଛି ରାଜ୍ୟ ସସ୍କୃତି ବିଭାଗର ସର୍ବୋଚ୍ଚ ସମ୍ମାନ ଜୟଦେବ ପୁରସ୍କାର ସହ ଅନେକ ସମ୍ମାନ ଓ ପୁରସ୍କାର। ତାଙ୍କ ବିୟୋଗରେ ଓଡ଼ିଶା ସଙ୍ଗୀତ ଜଗତରେ ଶୋକର ଛାୟା ଖେଳିଯାଇଛି।
