ଅହମ୍ମଦାବଦ୍, ୨୩।୨ : ବିଶ୍ୱ ଟେଷ୍ଟ ଚାମ୍ପିୟନଶିପ (ଡବ୍ଲ୍ୟୁଟିସି) ଫାଇନାଲ ପାଇଁ ଯୋଗ୍ୟତା ହାସଲ କରିବା ହେଲେ ଭାରତୀୟ ଦଳକୁ ଚଳିତ ଇଂଲଣ୍ଡ ବିପକ୍ଷ ସିରିଜ୍ର ବଳକା ଦୁଇଟି ଟେଷ୍ଟରୁ ଗୋଟିଏ ମ୍ୟାଚ୍ ଜିତିବାକୁ ପଡ଼ିବ। ଅନ୍ୟ ମ୍ୟାଚ୍କୁ ଅତିକମ୍ରେ ଡ୍ର’ ରଖିବା ଦରକାର। କିନ୍ତୁ ଅଧିନାୟକ ବିରାଟ କୋହଲି ଉଭୟ ମ୍ୟାଚ୍କୁ ଜିତିବାକୁ ଚାହାନ୍ତି। ଆଉ ବର୍ତ୍ତମାନ ଡବ୍ଲ୍ୟୁଟିସି ପଏଣ୍ଟ ଟେବୁଲ ଲାଗି ଚିନ୍ତିତ ନ ଥିବା ଭର୍ଚୁଆଲ ଖବରଦାତା ସମ୍ମିଳନୀରେ ସେ କହିଛନ୍ତି।
ଗୋଟିଏ ମ୍ୟାଚ୍ ଜିତିବା ଓ ଅନ୍ୟଟିକୁ ଡ୍ର’ ରଖିବାକୁ ଆମେ ଲକ୍ଷ୍ୟ ରଖିନାହୁଁ। ଉଭୟ ଟେଷ୍ଟ ଜିତିବାକୁ ଚେଷ୍ଟା କରିବୁ। ଆମ ପାଇଁ ଏହା ଦୁଇଟି କ୍ରିକେଟ ମ୍ୟାଚ୍ ଏବଂ ଏହାକୁ ଆମେ ଗୁରୁତ୍ୱ ଦେଉଛୁ। ଆଗାମୀ ୫ ଦିନିଆ ମ୍ୟାଚ୍ ଜିତିବାକୁ ଯାହା ଦରକାର ପଡ଼ିବ, ତାହା କରିବାକୁ ଆମେ ପ୍ରସ୍ତୁତ। ପରେ ଆମେ ପରବର୍ତ୍ତୀ ମ୍ୟାଚ୍ ସମ୍ପର୍କରେ ଚିନ୍ତା କରିବୁ ବୋଲି କୋହଲି କହିଛନ୍ତି। ୪ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ୍ ଏବେ ୧-୧ର ବରାବର ସ୍ଥିତିରେ ଅଛି। ଉଭୟ ଦଳ ମଧ୍ୟରେ ବୁଧବାରଠାରୁ ମୋଟେରା ଷ୍ଟାଡିୟମରେ ଆରମ୍ଭ ହେବାକୁ ଯାଉଛି ତୃତୀୟ ତଥା ଦିବାରାତ୍ର ଟେଷ୍ଟ ମ୍ୟାଚ୍।
