ଇଂଲଣ୍ଡ,୧୩।୭: ଇଂଲଣ୍ଡ ଓ ଭାରତ ମଧ୍ୟରେ ଚାଲିଥିବା ତୃତୀୟ ଟେଷ୍ଟ ମ୍ୟାଚର ଚତୁର୍ଥ ଦିବସରେ ଇଂଲଣ୍ଡ ବ୍ୟାଟର ହ୍ୟାରୀ ବ୍ରୁକଙ୍କ ବିଫଳତାକୁ ନେଇ ଶ୍ରୀଲଙ୍କାର ପୂର୍ବତନ କ୍ରିକେଟର କୁମାର ସାଙ୍ଗାକାରା ତୀବ୍ର ସମାଲୋଚନା କରିଛନ୍ତି। ଲର୍ଡ଼ସ ପିଚ୍ରେ ବ୍ରୁକ ଭାରତୀୟ ପେସର ଆକାଶ ଦୀପଙ୍କ ବିପକ୍ଷରେ ଦୁଇଟି ଚୌକା ଓ ଗୋଟିଏ ଛକା ମାରି ଦମଦାର ବ୍ୟାଟିଂ କରୁଥିବା ଦେଖାଯାଉଥିଲା। କିନ୍ତୁ ମଧ୍ୟାହ୍ନ ଭୋଜନ ବିରତି ପୂର୍ବରୁ ମାତ୍ର ୧୫ ମିନିଟ୍ ବାକି ଥାଉ, ସେ ଏକ ଅବିଚାରିତ ସଟ୍ ଖେଳି ଆକାଶ ଦୀପଙ୍କ ବଲରେ ବୋଲ୍ଡ ହୋଇଥିଲେ। ପେସରଙ୍କ ବିପକ୍ଷେ ସୁଇପ୍ ସଟ୍ ଖେଳିବାକୁ ଯାଇ ବ୍ରୁକ ନିଜର ମିଡ଼ଲ ଷ୍ଟମ୍ପ ହରାଇଥିଲେ।
ଏହି ଘଟଣା ଉପରେ କମେଣ୍ଟ୍ରୀ କରୁଥିବା ସାଙ୍ଗାକାରା ବ୍ରୁକଙ୍କ ଏହି ଆକ୍ରମଣାତ୍ମକ ପନ୍ଥାକୁ ନେଇ କହିଛନ୍ତି, “ଏହା ବାଜବଲ ନୁହେଁ, କେବଳ ଅହଂକାର।” ସେ ବ୍ରୁକଙ୍କ ଏହି ଅବିଚାରିତ ସଟ୍କୁ “ଅହଂକାର” ବୋଲି ଅଭିହିତ କରି ଏହା ଇଂଲଣ୍ଡର ଆକ୍ରମଣାତ୍ମକ ‘ବାଜବଲ’ ଶୈଳୀରୁ ଭିନ୍ନ ବୋଲି ମନ୍ତବ୍ୟ ଦେଇଛନ୍ତି।
Relentless and rewarded! 🙌🏻👏🏻#AkashDeep’s disciplined length proves too good for #HarryBrook, as a costly shot sends his middle-stump flying! 🔥#ENGvIND 👉 3rd TEST, DAY 4 | LIVE NOW on JioHotstar 👉 https://t.co/vo6bbH9n2o pic.twitter.com/xIL09UHRtR
— Star Sports (@StarSportsIndia) July 13, 2025
ମ୍ୟାଚର ସ୍ଥିତି କହିବାକୁ ଗଲେ, ଭାରତୀୟ ବୋଲରମାନେ ଚତୁର୍ଥ ଦିବସରେ ଇଂଲଣ୍ଡକୁ ୯୮/୪ରେ ଅଟକାଇ ଦେଇଥିଲେ। ମହମ୍ମଦ ସିରାଜ ଦୁଇଟି ଓପନିଂ ଓ୍ୱିକେଟ ନେଇଥିବା ବେଳେ ବେନ ଡକେଟ (୧୨) ଓ ଓଲି ପୋପ (୪) ତାଙ୍କ ବଲରେ ଆଉଟ ହୋଇଥିଲେ। ସିରାଜଙ୍କ ଏକ ସିମ୍ ବଲରେ ପୋପ ଏଲବିଡବ୍ଲୁ ହୋଇଥିଲେ, ଯାହା ରିଭ୍ୟୁ ପରେ ନିଶ୍ଚିତ ହୋଇଥିଲା। ଏହାପରେ ୧୫ତମ ଓଭରରେ ନୀତୀଶ କୁମାର ରେଡ୍ଡୀ ଜାକ କ୍ରଲେଙ୍କୁ (ଦ୍ୱିତୀୟ ଥର ପାଇଁ) ଆଉଟ କରିଥିଲେ। ଆକାଶ ଦୀପ ମଧ୍ୟ ବ୍ରୁକଙ୍କୁ ୨୩ ରନରେ ବୋଲ୍ଡ କରି ଇଂଲଣ୍ଡକୁ ଚତୁର୍ଥ ଝଟକା ଦେଇଥିଲେ।
ଉଲ୍ଲେଖଯୋଗ୍ୟ, ଶୁକ୍ରବାର ଭାରତ ନିଜର ପ୍ରଥମ ଇନିଂସରେ ୩୮୭ ରନରେ ଅଲଆଉଟ ହୋଇଥିଲା, ଯାହା ଇଂଲଣ୍ଡର ପ୍ରଥମ ଇନିଂସ ସ୍କୋର ସହ ସମାନ ଥିଲା। ଏହି ମ୍ୟାଚରେ ଭାରତୀୟ ବୋଲରମାନଙ୍କ ଆକ୍ରମଣାତ୍ମକ ପ୍ରଦର୍ଶନ ଇଂଲଣ୍ଡର ‘ବାଜବଲ’ ଶୈଳୀକୁ ପ୍ରତିହତ କରିଛି, ଯାହା ମ୍ୟାଚର ଫଳାଫଳ ଉପରେ ଗୁରୁତ୍ୱପୂର୍ଣ୍ଣ ପ୍ରଭାବ ପକାଇପାରେ।
