ବରଗଡ଼,୧୯।୩(ପ୍ରେମାନନ୍ଦ ଖମାରୀ): ରବିଧାନ ସଂଗ୍ରହ ପ୍ରକ୍ରିୟା ପାଇଁ ଚାଷୀଙ୍କ ଧାନବିକ୍ରି ପଞ୍ଜୀକରଣ ଚାଲିଛି। ଶୁକ୍ରବାର ଏଥିପାଇଁ ଆବେଦନ ଅବଧି ସରିଯିବ। ଅନ୍ୟପଟେ ବରଗଡ଼ ଜିଲାର ଅନେକ ଚାଷୀ ଏପର୍ଯ୍ୟନ୍ତ ଖରିଫ ଧାନ ବିକ୍ରି କରି ପାରି ନ ଥିବାରୁ ରବିଧାନ ବିକ୍ରି ପଞ୍ଜୀକରଣ ପାଇଁ ଆବେଦନ କରି ପାରି ନାହାନ୍ତି। ଏଭଳି ସ୍ଥିତିରେ ପଞ୍ଜୀକରଣ ଅବଧିକୁ ଆହୁରି ଏକମାସ ବୃଦ୍ଧି କରିବାକୁ ବିଭିନ୍ନ ଚାଷୀ ସଂଗଠନ ଦାବି କରିଆସୁଛନ୍ତି। ତେବେ ଦେବଦେବୀ ତଥା ମହାପ୍ରଭୁଙ୍କ ନାମରେ ରହିଥିବା ଜମିକୁ ଚାଷ କରୁଥିବା ଚାଷୀଙ୍କୁ ଧାନବିକ୍ରି ପଞ୍ଜୀକରଣ ଅଡୁଆ ସାଜିଛି। ସେଭଳି ଜମିର ଧାନବିକ୍ରି ପଞ୍ଜୀକରଣ ପାଇଁ କୌଣସି ସରକାରୀ ନିର୍ଦ୍ଦେଶ ନାହିଁ କହି ଦାୟିତ୍ୱରେ ରହିଥିବା ପ୍ରାଥମିକ କୃଷି ସମବାୟ ସମିତି କର୍ମଚାରୀମାନେ ସିଧାସଳଖ ମନା କରି ଦେଉଥିବା ଅଭିଯୋଗ ହୋଇଛି। ଏହାକୁ ନେଇ ଦେବଦେବୀଙ୍କ ନାମରେ ରହିଥିବା ଜମିକୁ ଚାଷ କରୁଥିବା ଚାଷୀଙ୍କ ଚିନ୍ତା ବଢ଼ିଯାଇଛି।
ଏହି କ୍ରମରେ ଗୁରୁବାର ଜିଲାର ଭେଡେନ ତହସିଲ ଅନ୍ତର୍ଗତ ବିଭିନ୍ନ ଗ୍ରାମର ଚାଷୀମାନେ ବରଗଡ଼ ଜିଲାପାଳଙ୍କୁ ଫେରାଦ ହୋଇଥିଲେ। ଦେବଦେବୀଙ୍କ ନାମରେ ରହିଥିବା ଜମିର ଧାନବିକ୍ରି ପଞ୍ଜୀକରଣ କରିବା ଦିଗରେ ବିହିତ ପଦକ୍ଷେପ ନେବା ଦାବିରେ ସେମାନେ ଜିଲାପାଳ ଆଦିତ୍ୟ ଗୋୟଲଙ୍କୁ ଏକ ଦାବିପତ୍ର ପ୍ରଦାନ କରିଛନ୍ତି। ଦାବିପତ୍ରରେ ଉଲ୍ଲେଖ କରିଛନ୍ତି, ଦେବୋତ୍ତର ବିଭାଗ ତଥା ବିଭିନ୍ନ ଦେବଦେବୀ, ମହାପ୍ରଭୁଙ୍କ ନାମରେ ରହିଥିବା ଜମିରେ ସେମାନେ ଦୀର୍ଘବର୍ଷ ହେଲା ଧାନଚାଷ କରିଆସୁଛନ୍ତି। ସେଥିରୁ ଅମଳ ଧାନରୁ ଭୋଗ ପ୍ରସ୍ତୁତ କରି ଦେବଦେବୀ, ମହାପ୍ରଭୁଙ୍କ ନିୟମିତ ୨ଥର ଭୋଗ ଅର୍ପଣ କରି ଆସୁଛନ୍ତି। ଏହା ସହିତ ବଳକା ଧାନକୁ ସରକାରଙ୍କ ନୀତି ନିୟମାନୁଯାୟୀ, ପଞ୍ଜୀକରଣ କରି ସରକାରଙ୍କ ନିର୍ଦ୍ଧାରିତ ସରକାରୀ ସହାୟକ ମୂଲ୍ୟରେ ବିକ୍ରି କରି ଆସୁଥିଲେ। ମାତ୍ର ଏଥର ଦେବଦେବୀ, ମହାପ୍ରଭୁଙ୍କ ନାମରେ ରହିଥିବା ଜମିର ଧାନବିକ୍ରି ପଞ୍ଜୀକରଣ ପାଇଁ ପ୍ରାଥମିକ କୃଷି ସମବାୟ ସମିତିର କର୍ମଚାରୀମାନେ ମୌଖିକଭାବେ ମନା କରି ଦେଉଛନ୍ତି। ତେବେ ସେଭଳି କଟକଣା ପାଇଁ କିଛି ସରକାରୀ ନିର୍ଦ୍ଦେଶନାମା ରହିଛି କି ବୋଲି ପଚାରିଲେ ବିଭାଗୀୟ କର୍ମଚାରୀମାନେ କିଛି ସ୍ପଷ୍ଟୀକରଣ ଦେଉନାହାନ୍ତି କିମ୍ବା ସେଭଳି କିଛି ନିର୍ଦ୍ଦେଶନାମା ମଧ୍ୟ ଦେଖାଉ ନଥିବା ଅଭିଯୋଗ ହୋଇଛି। ଅନ୍ୟପଟେ ପଡ଼ୋଶୀ ସମ୍ବଲପୁର, ସୁବର୍ଣ୍ଣପୁର ଜିଲାରେ ଦେବୋତ୍ତର ବିଭାଗ ତଥା ଦେବଦେବୀ, ମହାପ୍ରଭୁଙ୍କ ନାମରେ ରହିଥିବା ଜମିର ଧାନବିକ୍ରି ପଞ୍ଜୀକରଣ ହେଉଛି ବୋଲି ଚାଷୀମାନେ କହିଛନ୍ତି। ଏହି କ୍ରମରେ ବରଗଡ଼ ଜିଲାର ଚାଷୀଙ୍କୁ ମଧ୍ୟ ସେଭଳି ଧାନବିକ୍ରି ପଞ୍ଜୀକରଣର ସୁଯୋଗ ଦେବା ପାଇଁ ଚାଷୀମାନେ ଜିଲାପାଳଙ୍କୁ ନିବେଦନ କରିଛନ୍ତି। ଭେଡେନ ବ୍ଲକ ସିଂହେନପାଲିର ଜଗଦୀଶ ମହାପାତ୍ର, ଅଲେଖ ମହାପାତ୍ର, ଭେଡେନର ଅନ୍ତର୍ଯ୍ୟାମୀ ଦେହେରୀ, ଶରତ ମହାପାତ୍ର, ଆନନ୍ଦ ମହାପାତ୍ର, ଦିପକ ଦାଶ, ଟିକେଶ୍ୱର ଦେହେରୀଙ୍କ ସମେତ ଅନେକ ଚାଷୀ ଦାବିପତ୍ର ପ୍ରଦାନ ପାଇଁ ଜିଲାପାଳଙ୍କ କାର୍ଯ୍ୟାଳୟକୁ ଆସିଥିଲେ।
Dharitri – Odisha’s No.1 Odia Daily
