ନୟାଗଡ଼ ଅଫିସ,୨୨।୧୧: ନୟାଗଡ ମ୍ୟୁନିସିପାଲିଟିରେ ସ୍ମାର୍ଟ ଶ୍ମଶାନ ନାହିଁ। ପୂର୍ବରୁ ଯେଉଁ ଦୁଇ ଶ୍ମଶାନ ରହିଛି ସେଠାରେ ଶବଦାହ କରିବା ସମ୍ଭବ ନୁହେଁ। ତେଣୁ ସହରବାସୀ ହଇରାଣ ହେଉଛନ୍ତି। କେହି ଖର୍ଚ୍ଚାନ୍ତ ହୋଇ ପୁରୀ ସ୍ବର୍ଗଦ୍ୱାରକୁ ଯାଉଛନ୍ତି ଆଉ କିଏ ନିଜ ବାରିପଟେ ଶବଦାହ କରୁଛନ୍ତି। ଅନ୍ୟପଟେ ନୟାଗଡ ପୁରୁଣା ସହରର ଭାଲୁଖୋଲ ନିକଟରେ ଯେଉଁ ଶ୍ମଶାନ ରହିଛି ତାହା ଆବର୍ଜନାରେ ଭରପୂର ହୋଇ ଦୁର୍ଗନ୍ଧ ବାହାରୁଛି। ଅନ୍ୟ ଶ୍ମଶାନଟି ଖଣ୍ଡପଡା ରୋଡର କୃଷକ ବଜାର ପଛପାଖ ଜନବସତିରେ ରହିଯାଇଥିବାରୁ ଶବଦାହ ହୋଇପାରୁ ନାହିଁ। ଦୀର୍ଘ ୧୫ବର୍ଷ ଧରି ଏହି ସମସ୍ୟା ଲାଗିରହିଥିଲେ ମଧ୍ୟ ଏହାର ସମାଧାନ ହୋଇପାରୁ ନାହିଁ।
ପ୍ରକାଶ ଯେ, ପୁରୁଣା ସହର ଶ୍ମଶାନ ପାଖରେ ନୟାଗଡ଼ ସହରର ଆବର୍ଜନା ଗଦା ହୋଇ ରହୁଛି। ସନ୍ଧ୍ୟା ହେଲେ ଆବର୍ଜନାରେ ନିଅଁା ଲଗାଇ ଦିଆଯିବାରୁ ଦୁର୍ଗନ୍ଧ ହେଉଛି। ଏଣୁ ଏଠାକୁ ଶବଦାହ କରିବାକୁ ଯିବା କାଠିକର ପାଠ ହୋଇପଡୁଛି। ସେହିପରି ଖଣ୍ଡପଡା ରୋଡ୍ରେ ଥିବା ଶ୍ମଶାନ ଜବରଦଖଲରେ ଥିଲା। ବର୍ତ୍ତମାନ ଏହା ଚାରିପାଖରେ ବାସପଯୋଗୀ ଘର ହୋଇସାରିଲାଣି। ଗତ ଫେବୃୟାରୀରେ ଏହି ଶ୍ମଶାନ ଚାରିପାଖରୁ ଜବରଦଖଲ ହଟିଥିଲେ ମଧ୍ୟ ଜନବସତି କାରଣରୁ ଏଠାରେ ଶବଦାହ କରିବାକୁ ମନା କରାଯାଉଛି। ଏ ନେଇ ନୟାଗଡ଼ ମ୍ୟୁନିସିପାଲିଟିର ନିର୍ବାହୀ ଅଧିକାରୀ ସନ୍ତୋଷ କୁମାର ଜେନା କୁହନ୍ତି, ନୟାଗଡ଼ ପୁରୁଣା ସହରରେ ଖୁବ୍ଶୀଘ୍ର ସ୍ମାର୍ଟ ଶ୍ମଶାନ ନିର୍ମାଣ ହେବ। ଦେଢ଼ଏକର ଜମିରେ ହେବାକୁ ଥିବା ଶ୍ମଶାନରେ ଗୋଟିଏ ଥରରେ ୪ଟି ମୃତଦେହ ଦାହ କରାଯାଇପାରିବ। ଏଥିପାଇଁ ଦେଢ଼କୋଟି ଟଙ୍କା ମଞ୍ଜୁର ହୋଇସାରିଛି। ଟେଣ୍ଡର ପରେ କାମ ଆରମ୍ଭ ହେବ।
