ନୟାଗଡ଼ ଅଫିସ/ ଗଣିଆ,୧୬ା୧୨(ଡି.ଏନ୍.ଏ.): ନୟାଗଡ଼,ବୌଦ୍ଧ, କଟକ ଓ ଅନୁଗୋଳ ଜିଲାର ଅଂଶ ବିଶେଷକୁ ନେଇ ଗଠିତ ସାତକୋଶିଆ ଅଭୟାରଣ୍ୟ ଦେଇ ପ୍ରବାହିତ ମହାନଦୀର ସୁନାଖଣିଆ ଓ ବଡମୂଳରେ ଚଳିତ ବର୍ଷ ଇଣ୍ଡିଆନ ସ୍କିମରଙ୍କ ସମେତ ବିଦେଶାଗତ ପକ୍ଷୀଙ୍କ ଦେଖିବାକୁ ମିଳିନି। ଇଣ୍ଡିଆନ ସ୍କିମର ବୌଦ୍ଧ ଜିଲା କୁସଙ୍ଗ ରେଞ୍ଜର ଟିକରପଡ଼ା ଓ ମାରଡ଼ା ମହାନଦୀର ବାଲିପଠାରେ ଦେଖିବାକୁ ମିଳୁଛନ୍ତି, ନୟାଗଡ଼ ଆମ ଜିଲାର ସୀମାନ୍ତ ଅଞ୍ଚଳ ଅଟେ। ନୟାଗଡ଼ ଜିଲାର ସୁନାଖଣିଆ ଓ ବଡମୂଳ ଅଞ୍ଚଳରେ ମହାନଦୀର ବାଲିପଠା ଚଳିତ ବର୍ଷ ସୃଷ୍ଟି ହୋଇନି। ଏଠାରେ ପାଣିର ଧାର ଚାଲିଛି। ଏଣୁ ସୁନାଖଣିଆ ଓ ବଡମୂଳ ପସନ୍ଦ ଆସି ନ ଥାଇ ପାରେ ବୋଲି ପରିବେଶବିତ୍ମାନେ କହିଛନ୍ତି। ଅପରପକ୍ଷେ ସାତକୋଶିଆ ଗଣ୍ଡର ନୀଳ ଜଳରାଶିରେ ବିଦେଶାଗତ ପକ୍ଷୀଙ୍କ ବିଚରଣର ଦୃଶ୍ୟ ଅତ୍ୟନ୍ତ ମନମୁଗ୍ଧକର। ଏଠାରେ ଇଣ୍ଡିଆନ ସ୍କିମର ଦଳ ଦଳ ହୋଇ ବିଚରଣ କରିଥାନ୍ତି। ଗୋଟିଏ ଦଳରେ ଅତିକମରେ ୫୦ରୁ ୬୦ ପକ୍ଷୀ ରହିଥାନ୍ତି। ହେଲେ ବିଦେଶଗତ ପକ୍ଷୀମାନେ ଆସି ନ ଥିବାରୁ ନୟାଗଡ଼ ଜିଲାର ପର୍ଯ୍ୟଟକମାନେ ସେମାନଙ୍କୁ ଦେଖିବାର ମଜା ନେଇ ପାରି ନାହାନ୍ତି।
ସୂଚନା ଅନୁଯାୟୀ, ପ୍ରାୟ ୮ ବର୍ଷ ହେଲା ଶୀତଋତୁରେ ବଡ଼ମୂଳ ନଦୀପଠାରେ ଇଣ୍ଡିଆନ ସ୍କିମର ଦେଖା ଯାଉଥିଲେ। ୨୦୨୧-୨୨ ଆର୍ଥିକ ବର୍ଷରେ ବଡ଼ମୂଳରେ ଇଣ୍ଡିଆନ ସ୍କିମର ଆସି ନ ଥିଲେ। କିନ୍ତୁ ଇଣ୍ଡିଆନ ସ୍କିମର ସୁନାଖଣିଆରେ ଦେଖା ଯାଇଥିଲେ। ତେବେ ସାତକୋଶିଆ ଗଣ୍ଡ ଓ ବିଭିନ୍ନ ଜଳାଶ୍ରୟରେ ୨୦୨୧-୨୨ ଆର୍ଥିକ ବର୍ଷରେ ୫୫ ପ୍ରଜାତିର ୨୧୨୦ ଦେଶୀବିଦେଶୀ ପକ୍ଷୀଙ୍କ ସମାଗମ ହୋଇଥିବା ମହାନଦୀ ବନ୍ୟ ପ୍ରାଣୀ ବିଭାଗ ପକ୍ଷରୁ ପକ୍ଷୀଗଣନାରେ ଜଣାପଡିଥିଲା। ୫୫ ପ୍ରଜାତି ମଧ୍ୟରୁ ୯ପ୍ରଜାତିର ୪୮୮ ବିଦେଶୀ ପକ୍ଷୀ ଆସିଥିଲେ। ବିଦେଶୀ ପକ୍ଷୀଙ୍କ ମଧ୍ୟରେ ଇଣ୍ଡିଆନ ସ୍କିମର ପର୍ଯ୍ୟଟକଙ୍କ ପ୍ରଥମ ପସନ୍ଦ ଥିଲେ। ବିଦେଶୀ ପକ୍ଷୀଙ୍କ ମଧ୍ୟରେ ଇଣ୍ଡିଆନ ସ୍କିମର୧୪୧ ଆସିଥିବାବେଳେ କେଂଟି ପ୍ଲୋଭର ୬୪ଟି ଆସିଥିଲେ। ସେହିଭଳି ଲିଟିଲ କିଙ୍ଗଡ୍ ପ୍ଲୋଭର ୨୪, କମନ କୁଇଙ୍ଗ ସେଙ୍କ୨୭, ଲିଟିଲଷ୍ଟିଟଣ୍ଟ ୫, କମନ ସ୍ୟାଣ୍ଡ ପିପର୨୩, ରୁଡି ସେଲଡକ ୭୧, ଗେଟ କର୍ମୋନେଣ୍ଟ ୧୩୧, ହୁଇସ୍କଡ ଟର୍ମ ୨ଟି ଥିଲେ। ଦେଶୀ ପକ୍ଷୀଙ୍କ ମଧ୍ୟରେ ଇଣ୍ଡିଆନ ସାଗ୍ ୧୦୪, ଲିଟିଲ କରମୋରାଟ ୩୦୮, ଓରିଏଣ୍ଟାଲ ଡାଟର ୨, ବ୍ଲକ ଡ୍ରଙ୍ଗୋ୧୯ ରହିଥିଲେ। ଏହିପରି ୪୬ ପ୍ରଜାତିର ୧୬୩୨ ଦେଶୀ ପକ୍ଷୀଙ୍କୁ ଦେଖିବାକୁ ମିଳିଥିଲା।
ଏନେଇ ପରିବେଶବିତ୍ ଅନ୍ତର୍ଯ୍ୟାମୀ ସାହୁ ଓ ସଞ୍ଜୟ ସାହୁ କୁହନ୍ତି, ମହାନଦୀ ବାଲୁକା ପଠା, ଶୀତଋତୁର ପରିବେଶ ଓ ଖାଦ୍ୟର ସୁବିଧା ବିଦେଶାଗତ ପକ୍ଷୀଙ୍କୁ ଟାଣି ଆଣୁଥିଲା। ପରିବେଶରୁ କିଛି ଗୋଟିଏ ନ ମିଳିଲେ ସେମାନଙ୍କ ପସନ୍ଦ ହେବନି। ଯାହା ଚଳିତ ବର୍ଷ ଦେଖା ଯାଇଛି ବୋଲି ଅନୁଭବ କରାଯାଉଛି। ବାଲିପଠା ନ ଥିବାରୁ ଇଣ୍ଡିଆନ ସ୍କିମର ପରି ବିଦେଶାଗତ ପକ୍ଷୀ ଆସି ଫେରି ଯାଇଥିବେ। ସେହିପରି ଭୟର ପରିବେଶ ଦେଖାଦେଲେ ଇଣ୍ଡିଆନ ସ୍କିମରଙ୍କୁ ଆଉ ଦେଖିବାକୁ ମିଳେନା। ଏହାର ବି ସମୀକ୍ଷା ହେବା ଦରକାର। ଏନେଇ ମହାନଦୀ ବନ୍ୟ ପ୍ରାଣୀ ବନଖଣ୍ଡର ଭାରପ୍ରାପ୍ତ ଅଧିକାରୀ କ୍ଷମା ଷଡ଼ଙ୍ଗୀ କୁହନ୍ତି, ଚଳିତ ବର୍ଷ ଇଣ୍ଡିଆନ ସ୍କିମର ସମେତ ବିଦେଶଗତ ପକ୍ଷୀଙ୍କୁ ଟିକରପଡ଼ା ସମ୍ମୁଖ ମାରଡା ବିଟ୍ ଅଞ୍ଚଳ ମହାନଦୀ ପଠାରେ ଦେଖିବାକୁ ମିଳିଛି। ପ୍ରାଥମିକ ସୂଚନା ଅନୁସାରେ ୫୮୬ ଇଣ୍ଡିଆନ ସ୍କିମର ଆସିଛନ୍ତି। ପକ୍ଷୀ ଗଣନା ପରେ ସବିଶେଷ ତଥ୍ୟ ଜଣାପଡିବ।
